Maktab imiji taʼlim sifatini belgilaydi

Hozirgi kunda umumtaʼlim muassasalarining oʻziga xos imijini yaratish vazifa qilib qoʻyilmoqda. Xoʻsh, taʼlim muassasasi imiji nima? Imij – yaʼni oʻziga xos qiyofa – maktabning joylashishi, mevali, manzarali daraxtlar, gullar bilan bezatilishi, oʻquvchilarga taʼlim berish darajasi, oʻqituvchilarning salohiyati, taʼlim olayotgan yoshlarning yutuqlari, oʻqituvchi va oʻquvchilarning kiyinishi, muomala odobini ham oʻz ichiga qamrab oladi.

75 nafar tajribali va malakali ustozlar 736 nafar oʻquvchilarga taʼlim-tarbiya berayotgan bizning 11-sonli umumtaʼlim maktabimizda ham bugungi kun talablari oʻz aksini topmoqda.

Maktabimiz oʻquvchilarimizning har xil koʻrik-tanlovlarda, bilimlar bellashuvlarida, fanlar olimpiadasida erishgan koʻrsatkichlari boʻyicha tumanda birinchi oʻnlikdan joy olganligi ustoz oʻqituvchilarning qay darajada mehnat qilayotganliklarini koʻrsatadi.

Bola qalbi – ochilmagan qoʻriq. Uni tarbiyalash, ilmli qilish oʻqituvchi mahoratiga bogʻliq. Shularni hisobga olib, jamoamiz aʼzolarining malakasini oshirib borishiga erishayapmiz.

Maktabimizda oʻtgan oʻquv yili oxirida oʻquvchilarning sinf rahbari, ota-onalari ishtirokida majlis oʻtkazib, oʻquvchi maktab formasining yangicha imijini qabul qildik.

Yangi oʻquv yilida esa bolalar ana shu formada kelishlarini taʼminladik. Bu taklifimizni ota-onalar ham maʼqullashdi. Chunki yangi oʻquv yiliga oʻgʻlini, qizini kiyintirish uchun bozorga olib borgan ota-ona avvalo eng maqbulini tanlashda qiynaladi. Qolaversa, farzandi u qanday matodan tikilgan, yoshiga, gavdasiga mos kelganini emas, koʻrimli va qimmat kiyimlarni talab qilishi hammaga ayon. Bizning tanlagan formamiz esa 30-35 ming soʻmlar atrofida boʻldi. Bu ota-onalarni yangi oʻquv yiliga kiyim olib berish tashvishidan qutqardi. Eng muhimi esa sinfda barcha oʻquvchilarning tinch-xotirjamligini taʼminladi. Diqqatini chalgʻituvchi qimmatbaho kiyimlar kiyilishiga barham berildi. Oʻqituvchilarning ham maxsus maktab formada boʻlishi nur ustiga aʼlo nur boʻldi.

Maktab taʼlim-tarbiyasida ikkinchi darajali ishning oʻzi yoʻq. Sinfxonalarni, koridorlarni taʼlimga aloqador suratlar, ibratli maqollar, gullar bilan bezatish, koʻrgazmali qurollar asosida interfaol usullardan foydalanib darsni oʻtish kabi muhimdir. Chunki chor-atrofidagi goʻzallik bolaning didini oʻstirishga xizmat qiladi. Shu boisdan ham maktabimizning tashqi va ichki koʻrinishini imkoniyatlarimiz darajasida yaxshilashga harakat qilayapmiz. Obodonlashtirish, koʻkalamzorlashtirishga eʼtiborni kuchaytirib, kichik-kichik gulzorlar tashkil etdik. Kelgusi koʻklamda mevali, manzarali daraxtlar oʻtqazish uchun ariqlar qazib, tayyorlab qoʻydik va qaysi hududga qaysi sinf masʼul ekanligini ham belgiladik.

Oʻz kasbining fidoyisi, tinmay oʻz malakasini oshirib, bu bilimlarini oʻz joyida qoʻllab seminar-treninglar tashkil qilayotgan oʻqituvchilarimiz maqsadi muassasamiz ichki qiyofasi yaʼni taʼlim-tarbiya sifatini yuqori pogʻonalarga koʻtarishdir.

Ustoz niyati doimo ezgu boʻladi. Biz hozir sinfxona partalarida oʻtirgan bolajonlarimizning qiyofasida ertagi kunning yetuk insonlari, malakali mutaxassislarni, oʻz yurtining fidoyilarini koʻrgimiz keladi. Butun faoliyatimiz orzularimizning ijobat boʻlishiga qaratilgan.

Barcha oʻqituvchilarni, ustozlarni kasb bayrami bilan qutlab, shogirdlar kamolini koʻrib, uzoq umr koʻrishini tilayman.

Zulfiya YuSUPOVA,

11-sonli umumtaʼlim maktabi direktori.