"Xalq banki"ning Amudaryo tumani filiali faoliyatidan lavha (video)

Mamlakatimizda bank tizimi faoliyatini yanada takomillashtirish maqsadida bu borada ham islohotlar amalga oshirilmoqda. Banklarda xizmat koʻrsatish turlari kengaytirilib, aholi va tadbirkorlarga qator qulayliklar yaratilmoqda.

Tumanimizdagi aktsiyadorlik tijorat Xalq banki filialida ham xizmat koʻrsatish tizimini yaxshilash, sifatini oshirish va mijozlarga qulaylik yaratish boʻyicha zarur chora-tadbirlar koʻrilmoqda. Shuningdek, tizimning isloh qilinishida katta ahamiyatga ega boʻlayotgan tegishli qarorlar va hujjatlar ijrosi taʼminlanishi bank xodimlari faoliyatida mehnat unumdorligini, ish samaradorligini oshirmoqda.

Xalq banki tuman filialida Plastik karta terminal operatsiyalari va hujjatlar sektori, Buxgalteriya, Kredit, Pensiya, Jamgʻarib boriladigan pensiya taʼminoti boʻlimlari hamda Valyuta ayriboshlash shoxobchasi, Jamgʻarma operatsiyalar va mini banklar shoʻʼbasi aholi va tadbirkorlarga xizmat koʻrsatib kelmoqda. Undan tashqari, aholiga qulaylik yaratish maqsadida tuman IIBning Migratsiya va fuqarolikni rasmiylashtirish boʻlinmasi, Notarial xizmat koʻrsatish boʻlinmasi, Fuqarolik holatlari dalolatnomalarini yozish boʻlimi hamda 6-sonli Beruniy tumanlararo gaz taʼminoti uchastkasi tuman hududida maxsus kassalar ham tashkil etilgan. Bank tomonidan 151 ta xususiy korxonalarga, 2 ta davlat korxonalariga, 77 ta nodavlat notijorat tashkilotlariga, 1 ta chet el kapitali ishtirokidagi korxonalar va 131 nafar yakka tartibdagi tadbirkorlarga samarali bank xizmatlari koʻrsatib kelinmoqda. Yil davomida bankka 41 mijoz jalb qilingan.

Bankning Plastik karta terminal operatsiyalari va hujjatlar sektori boʻlimida 3 nafar xodim moliyalashtirilgan mablagʻlarni plastik kartaga oʻtkazish xizmatlarini bajarib kelmoqdalar. Buxgalteriya boʻlimida esa umumiy hisob-kitob yuritiladi va mijozlarga ham xizmat koʻrsatiladi. Kredit boʻlimida Xalq banki tuman filiali tomonidan tadbirkorlarni qoʻllab-quvvatlash maqsadida berilayotgan kreditlarni ajratish amalga oshiriladi. Shu paytga qadar bank tomonidan Prezidentimizning 3777-sonli Qarori asosida oilaviy tadbirkorlikni rivojlantirish uchun 7 foizdan 240 mln. 300 ming soʻmlik, 5242-son Farmoniga asosan yoshlarni hunarmandchilikka jalb qilish maqsadida 7 foizda 51 mln. 500 ming soʻmlik, naslli qoramollarni chet eldan ketirish uchun Vazirlar Mahkamasi qarori asosidagi nizomga koʻra, 5,5foizdan 2 mlrd. 600 mln. soʻmlik, tadbirkorlarni qoʻllab-quvvatlash maqsadida, aylanma mablagʻni shakllantirish uchun 1 mlrd. 30 mln. soʻmlik kreditlar ajratildi. Shuningdek, “Obod qishloq” dasturi, namunaviy uy jihozlari va maishiy texnikalar sotib olish maqsadlari uchun ham moliyaviy isteʼmol kreditlari berildi.

Bankda tashkil qilingan Pensiya va nafaqa toʻlovlari boʻlimida nafaqalarni tarqatish boʻyicha jami 21 nafar xodim ish olib bormoqda. Nafaqa pullari sayyor kassalarga bank tomonidan 3 ta xizmat mashinalarida yetkazilib, fuqarolarga oʻz vaqtida berilishi taʼminlanmoqda. Xalq banki tuman filiali tomonidan 49 ta ovul va mahallalarda yashovchi 14 ming 520 nafar nafaqaxoʻrlarga 7 mlrddan ziyod naqd koʻrinishdagi pullar yetkazib berilmoqda.

Xalq banki tuman filialida faoliyat koʻrsatayotgan Jamgʻarib boriladigan pensiya taʼminoti boʻlimida aholiga ish haqi hisobidan pensiya taʼminotiga qoʻshimcha tariqasida jamgʻarib boriladigan mablagʻlarni qayd etib borishlari uchun daftarchalar tarqatiladi. Boʻlimda daftarchalarga muntazam ravishda oʻtkazilgan pullar kirim va chiqim qilish amalga oshiriladi.

Valyuta ayriboshlash shoxobchasida ham fuqarolarning chet el valyutalarini Markaziy bank kurslari asosida erkin almashtirishlarini taʼminlash maqsadida xizmat koʻrsatib kelinmoqda. Bankda tashkil qilingan 1 ta jamgʻarma kassa, 1 ta kommunal kassa va 3 maxsus kassada mijozlarga qulay sharoit yaratilgan. Kassalarda kommunal, byudjet va boshqa turdagi toʻlovlar onlayn tarzida oʻz vaqtida qabul qilinmoqda. Mijozlar hisob raqamlariga ham oʻtkazilib borilmoqda.

Bankdagi Plastik kartochkalar tizimini rivojlantirish shoʻʼbasi boʻlimi tomonidan xoʻjalik yurituvchi subʼektlarda foydalanilayotgan toʻlov terminallari nazorat qilib boriladi. Bu yerda pensiya, ish haqi va unga tenglashtirilgan toʻlovlar elektron tarzda jismoniy shaxslarning plastik kartalariga oʻz vaqtida oʻtkaziladi. Shuningdek, mijozlarga korporativ plastik kartalar boʻyicha majburiyatlar hisobvaragʻini ochadi hamda yaroqsiz holga kelganda yangi korporativ kartalar ochib berish kabi xizmatlar ham bajariladi.

Bugungi kunda aktsiyadorlik tijorat Xalq banki tomonidan koʻrsatilayotgan sifatli xizmatlardan aholi va tadbirkorlar juda mamnun.

O.Xudoyberganova.