NILUFARNING DUNYoSI

Tumanimizda intiluvchan, ijodiy izlanuvchan yoshlar koʻp. Soʻnggi ikki-uch yil ichida oʻzlarining fikr doirasi kengligi, bilimdonligi bilan ajralib turadigan isteʼdodli yoshlar, ayniqsa, badiiy ijod sohasida oʻz qobiliyatlarini namoyon etishmoqda. Qunduzoy Yusupova, Umida Erdosheva, Dildora Rajabova, Iroda Yerdosheva, Dinora Karimboyeva, Aziza Madrahimova, Behzod Allaqulov, Sardorbek Kenjaboyevlar allaqachon ilk kitoblarini sheʼriyat muxlislariga taqdim etishdi.

Tumanimiz yosh ijodkorlari safiga qoʻshilayotgan Nilufar Ozodova ham ijod mashaqqatlarini yurakdan his etib, sabr-bardosh bilan oldinga intilayotganlardan. U oʻzining jajji kitobchasini “Nigohimdagi dunyo” deb nomlabdi. 2018-yilda “Qaraqalpaqstan” nashriyotida chop etilgan Nilufarning ilk kitobchasini varaqlar ekansiz, uning nigohlarida aks etgan dunyoning turfa ranglarini koʻrasiz. Uning Vatan, doʻstlik, tabiat mavzusidagi sheʼrlarida kindik qoni tomgan tuproqqa cheksiz muhabbat, ona tabiatga nisbatan mehr, bir-birovga samimiy munosabat aks etib turadi.

Nilufarning sheʼrlarida aksariyat yosh ijodkorlarning mashqlaridagi kabi kamchiliklar ham bor. Ayniqsa, Nilufarning soʻz boyligi yetishmasligi bois, qofiyabozlikka berilib, sheʼriy talablarga amal qilmasligi natijasida sheʼrlarida ichki ohang hamda vazn buzilishi holatlari kuzatiladi. Nilufar kelajakda bu kabi nuqsonlardan xoli sheʼrlar ijod etishiga ishonamiz. Ijodda oʻz dunyosini yaratishga intilayotgan shoira qizimizga barkamollik tilaymiz.

Robiya Yoʻldosheva.