MEHNAT BILAN OBOD XONADON

Qilichboy ovulidagi “Xizr eli” mahallasida ehtiromga sazovor bir oila bor. Bu oilaning pir-u badavlat sohiblari – Karimboy ota bilan Qurbongul momolarning elda hurmat-u izzati baland. Oilada ular oʻrnatgan tartib-intizom, sarishtalik, obod-axloq va hamjihatlikka barchaning havasi keladi.

Hayot poydevorini halol mehnat bilan qurib, umr kechirayotgan Karimboy ota va Qurbongul momo

7 oʻgʻil va 3 qizni voyaga yetkazishdi.

Katta oʻgʻil oʻqituvchilik kasbini tanladi. Qolganlari esa ota izidan borib, dehqonchilikka ixlos qoʻydi. Farzandlar ota-onalaridan halollikni, mehnatkashlikni, mehr-oqibat va totuvlikni oʻrganib ulgʻayishdi.

Mehnatga hamdam boʻlgan bu xonadonga birin-ketin tushgan kelinlar ham oiladagi ezgu odatlarga esh boʻlib, tezda moslashib ketishdi.

– Mahallamizda bu oilaga havas qiladiganlar koʻp, – deydi faxr bilan ovuldagi “Rajapov Omonboy” fermer xoʻjaligining raisi Omonboy Rajabov. – Otaning oʻgʻillari Hamza va Joʻrabek xoʻjalikning mohir mexanizatorlari. Bahodir esa eng ilgʻor pudratchi. Ular bu yilgi mavsumda 3 gektarga ekilgan gʻoʻza nihollarini astoydil parvarishlab, moʻl hosil yetishtirishdi. Ayni kunlarda 5 nafar kelin va bir qiz birgalikda kuniga jami 700 kilogrammdan ziyod paxta terib, xirmonga hissa qoʻshishmoqda. Oʻzlari yaratgan fayzli bogʻ va tomorqadan daromad topib, xonadonlarini obod qilib yashayotgan Karimboy ota va Qurbongul momoning farzandlariga qoʻshilib, kelinlari ham bu yilgi mavsumda paxta terib, mavsum boshidan buyon jami 8 mln. soʻmdan ziyod daromad oldilar.

Mehnat bilan obod bu xonadonda Karimboy ota bilan Qurbongul momo 6 oʻgʻil, 6 kelin, 15 nafarga yaqin nevaralari bilan ahil-inoq hayot kechirishmoqda. Roʻzgʻori boʻlak boʻlgan katta oʻgʻil ham oilasi bilan har kuni shu yerda, katta xonadon ogʻushida.Bir dasturxon atrofida oʻtirib, jamul-jam boʻlib yashayotgan oiladagi totuvlik, hamjihatlikka har qancha havas qilsa arziydi.

Ozoda XUDOYBERGANOVA.