Amudaryoda 67 ming nafardan ortiq bolalar 13 xil infektsiyaga qarshi profilaktik emlanadi

Mamlakatimizda inson salomatligiga katta eʼtibor berilayotgani sababli fuqarolarimizning oʻrtacha umr koʻrish davomiyligi 1990-yildagi 67 yoshdan 2017-yilda 74 yoshni tashkil etgan ekan. Bu davrda bolalar oʻlimi 3 barobarga kamaygan.

Bularga avvalambor tibbiyot sohasini isloh qilish orqali fuqarolarga koʻrsatilayotgan tibbiy yordam orqali erishilmoqda.Muhtaram Prezidentimiz Sh.Mirziyoyevning 2018-yil 2-dekabr kuni qabul qilgan “Oʻzbekiston Pespublikasi sogʻliqni saqlash tizimini tubdan takomillashtirish boʻyicha kompleks chora-tadbirlar toʻgʻrisida”gi Farmonida mamlakatimizda sogʻliqni saqlash tizimini isloh qilishning eng muhim yoʻnalishlari belgilab berildi.

Ushbu Farmonda tibbiy yordamning samaradorligi, sifati va ommabopligini oshirish, shuningdek tibbiy standartlashtirish tizimini shakllantirish, tashxis qoʻyish va davolashning yuqori texnologik usullarini joriy etish, patronaj xizmati va dispanserizatsiyaning samarali modellarini yaratish orqali sogʻlom turmush tarzini qoʻllab-quvvatlash va kasalliklarni profilaktika qilish, tibbiy genetikani, ayollar va bolalarga shoshilinch va ixtisoslashgan tibbiy yordamni rivojlantirish asosida, zamonaviy skrining dasturlarini joriy etish, “Ona va bola” hududiy koʻp tarmoqli tibbiyot majmualari va maʼlumotlar tizimlarini shakllantirish asosida onalik va bolalikni muhofaza qilish tizimini takomillashtirish yuzasidan qator vazifalar belgilandi.

Albatta bunday vazifalar tibbiyot xodimlari zimmasiga katta masʼuliyat yuklaydi. Bu masʼuliyat esa har bir shifokordan oʻz vazifasiga vijdonan yondashishni talab qiladi.

Bugungi kunda biz amudaryolik shifokorlar oʻz faoliyatimizni muhtaram Prezidentimizning sogʻliqni saqlash yuzasidan belgilab bergan eng muhim yoʻnalishlari boʻyicha tashkil etayapmiz.

Shu asosda tumanimizda 67000 nafardan ziyod bolalarga tibbiy xizmat koʻrsatish ishlari yangi bosqichga koʻtarilmoqda. 49 ta maktabgacha taʼlim muassasalarida tarbiyalanayotgan bolajonlarni, maktablar, kollejlar va akademik litseyda taʼlim olayotgan bolalarni profilaktik koʻriklardan oʻtkazish, yuqumli kasalliklarning oldini olish maqsadida 13 turli infektsiyaga qarshi profilaktik emlash, patronaj hamshiralar ishlarini yaxshi yoʻlga qoʻyish masalalariga katta eʼtibor berilayotir.

Biz 2019-yilda ham bor kuch-gʻayratimizni va tajribalarimizni yurtdoshlarimiz salomatliklarini muhofaza qilishga safarbar etamiz.

Zokir OʻPOZBOYeV, tuman tibbiyot birlashmasi boshligʻining onalik va bolalikni muhofaza qilish boʻyicha oʻrinbosari, qon banki boʻlimi mudiri.