Tadbirkorlik – bugungi dolzarb vazifa

Men yarim asrdan ortiq umrimning katta qismini qishloq xoʻjaligisiz tasavvur qilolmayman. 1978-yilda Xitoy qishlogʻi markazidagi 2-sonli umumtaʼlim maktabini bitkazishim bilanoq qishloq xoʻjaligiga oʻralashdim va sobiqOxunboboyev nomli kolxozda paxtakor dehqon boʻlib ishlab kelayotgan rahmatlik dadam Yaxshiboy Eshchonovning eng yaqin yordamchisiga aylandim. Dadamdan yer sirlarini va dehqonchilik hadisini oʻrgandim. Dadam bir umr oddiy paxtakor boʻlib ishlab, ziroatchilik ilmini puxta egallagan, bu boradagi tajribalarini barchaga oʻrgatishga harakat qiladigan bagʻrikeng saxiy inson edi.

Keyin oddiy paxtakorlikdan paxtachilik brigadasi ish boshqaruvchisi, soʻngra paxtachilik brigadasi boshligʻi boʻlib ishladim. 1993-yili qishlogʻimizda "Namuna” urugʻchilik xoʻjaligi tashkil etilgach, xoʻjalik boshqaruvi kotibi, 1998-yildan esa yana mazkur xoʻjalikda paxtachilik brigadasi boshligʻi boʻlib ishladim. 2002-yil mart oyidan boshlab esa "Shoʻrqalʼa” fermer xoʻjaligini tashkil etib, to ayni kunlargacha paxtachilikni rivojlantirishga oʻzimning baholi qudrat hissamni qoʻshib kelmoqdaman.

Fermer xoʻjaligimizda har yili paxtadan moʻl hosil yetishtirib kelinadi va oldingi saflarda paxta tayyorlash boʻyicha yillik shartnomaviy rejamizni ortigʻi bilan bajarib kelmoqdamiz. Joriy 2013-yilda 87 gektar paxta maydonidan yillik shartnomaviy rejadagi 181 tonna oʻrniga 210 tonnadan ortiq yuqori navli paxta hosilini davlat xazinasiga yetkazib berdik. Paxtadan olgan daromadimiz ham 200 million soʻmdan oshib ketdi.

Ona zamin – bizning bitmas tuganmas boyliklarimiz xazinasidir. Faqat ishning koʻzini bilib yerni ishlasak, ekinlarimizni risoladagidek parvarish qilsak ziroatimiz moʻl, daromadlarimiz moʻmay boʻladi. Buni yakunlanayotgan 2013 yishloq xoʻjalik yili natijalari yaqqol koʻrsatib turibdi.

Endilikda faqat paxtaning daromadiga koʻz tikib oʻtirish yaramaydi. Bunday bir nuqtaga tikilib umid qiladigan turgʻun holatlar davri oʻtib ketdi. Oʻzlarimizning ichki rezerv va imkoniyatlarimizni ishga solib, fermer xoʻjaligimizni koʻp tarmoqli xoʻjalikka aylantirish, har bir ishga, har bir ishlab chiqarish quvvatiga, har bir yashirinib yotgan rezerv va imkoniyatlarga ijodiy yondoshib tadbirkorlikni rivojlantirgan holda yangi quvvatlarni ishga tushirish hisobiga yangi ish oʻrinlari yaratish bugungi shiddatkor davrning qatʼiy talabi boʻlib qoldi.

Biz hozirgi kunda oʻz ishimizni mana shu talablar asosida tashkil qilib, bu sohada ham bir qancha yaxshi natijalarga erishmoqdamiz.

Deputatlik faoliyatimga toʻxtaladigan boʻlsam, deputatlik vakolati menga ijtimoiy hayot jarayonlariga yanada chuqurroq kirib borishga, davr nafasini teranroq anglashga, xalqimizning kundalik turmushini, yashash tarzini atroflicha oʻrganish va tahlil qilishga undadi, oilalardagi ogʻizbirchilik, ayniqsa yangi oilalarda tinchlik-totuvlik masalalarini joylardagi oʻzini-oʻzi boshqarish organlari rahbarlari va mahalla faollari bilan hamkorlikda hal qilish yaxshi samara bermoqda. Negaki oilalardagi ogʻizbirchilik va mehr-oqibat muhiti elimiz tinchligi, osoyishtaligini, farovonligi va obodligini taʼminlaydi.

Mamlakatimizda tadbirkorlikni qoʻllab-quvvatlash va keng miqyosda rivojlantirish, bu boradagi yangi-yangi loyihalarni amalga oshirish davlatimiz siyosatining ustuvor yoʻnalishiga aylangan ekan, joylarda bu borada hali juda koʻp ishlarni bajarishimiz, shart-sharoitlar va qulayliklar yaratishimiz, tadbirkor boʻlmoqchi boʻlgan kishilarni, ayniqsa yoshlarni har jihatdan qoʻllab-quvvatlashimiz zarur. Buning uchun joylarning oʻzida imkoniyat yaratishimiz, turmushning, aholining talab-ehtiyojlarini yanada chuqurroq oʻrganishimiz, yanada yaxshiroq, yanada farovonroq yashash imkoniyatlarini ishga solishimiz lozim. Negaki, davr, dunyo shiddat bilan rivojlanish yoʻlidan bormoqda. Biz uchun, qolaversa tadbirkorlar uchun davrdan orqada qolish mumkin emas. Aslida bu hayotda har birimiz tadbirkor, ishbilarmon boʻlishimiz kerak.

Men faoliyat olib borayotgan 14-Xitoy saylov okrugida bir qancha tadbirkorlar aholining kundalik hayotlari uchun zarur boʻlgan savdo maishiy va texnikaviy servis xizmatlarini bajarmoqdalar. Masalan, Xitoy qishlogʻi markazida tadbirkor Olimboy Qurbonboyev sholi va bugʻdoy un xarozi ishlatib, aholining hurmatini qozonmoqda. Hayitboy Reyimov va Davlatyor Xolmenovlar oʻz doʻkonlarida aholining kundalik ehtiyoj mollari bilan savdo-sotiq qilmoqdalar. Olimboy Saparboyev va Ergash Hayitboyevlar yengil mashinalar uchun texnikaviy servis xizmati koʻrsatmoqda.

Fermerlarimiz iqtisodiyotimizning bosh tayanchiga aylanayotgan hozirgi kunda fermer xoʻjaliklarini koʻp tarmoqli fermer xoʻjaliklariga aylantirish dolzarb vazifa boʻlib turibdi. "Ashirboyev Aminboy”, "Sobirov Xidirboy”, "Oyjanov Oʻngʻarboy” va oʻzim boshqarayotgan "Shoʻrqalʼa” fermer xoʻjaliklarida paxtachilik, gʻallachilik va pillachilikdan tashqari chorvachilik, parrandachilik, baliqchilik va bogʻdorchilikni rivojlantirish yoʻlida saʼy-harakat qilinmoqda va dastlabki ijobiy natijalarga erishilmoqda. Bu natijalar hali davr talabi darajasida emas, albatta. Bu borada amalga oshiradigan koʻlamdor ishlarimiz, ishga solinadigan imkoniyatlarimiz va yangi-yangi loyihalar hali orldinda. Buning uchun belni mahkam bogʻlab, zoʻr gʻayrat-shijoat bilan ishlashimiz kerak.

Jabbor EShChANOV,

"Shoʻrqalʼa” fermer xoʻjaligi raisi, xalq deputatlari tuman Kengashi deputati.