Hayot maktabidan saboq olib...

Surxondaryo - mamlakatimizning betakror, goʻzal goʻshalaridan biridir. Bu yerlarni qish faslida ham yashillik tark etmaydi. Oʻlkamizning  noyob durdonasi hisoblangan, qadimiy ilm-fan-madaniyat va maʼrifat oʻchogʻi, buyuk daholar beshigi boʻlgan Termiz shahrining taʼrifi jahon ahlining hayratiga-hayrat qoʻshmoqda. Mana shu qadimiy, tabarruk shahar mustaqillik yillarida, ayniqsa soʻnggi yillarda hozirgi zamon shaharsozligi talablariga muvofiq zamonaviy meʼmorchilik-qurilish uslublari asosida boshdan-oyoq yangidan qurilmoqda va yangicha qiyofa kasb etmoqda. Loyiha boʻyicha shaharni yangilash 2030-yilgacha davom etadi.

Mana shu betakror goʻzal shaharda, Janubiy-Gʻarbiy harbiy okrugiga qarashli harbiy qismlarda bizning  tumanimiz yoshlaridan bir qanchasi muddatli harbiy xizmatlarini namunali ado etmoqdalar. Mana shunday ibratli harbiy xizmat qilayotgan yoshaskarlardan biri - toʻlqinlik Odilboyev Azamat Farhod oʻgʻlidir. U bu yerda oʻtgan  2013-yil 25-fevraldan buyon maxsus harbiy qismda zamonaviy harbiy axborot-aloqa texnologiyalari tarmogʻida xizmat qilib kelmoqda. U bu yerda xizmat qilish jarayonida harbiy intizomga va tezkor ishlashga koʻnikma hosil qilib, irodasi yanada mustahkamlandi. Ikkinchidan, zamonaviy axborot aloqa texnologiyalarini bosqichma-bosqich oʻzlashtirishga erishdi. Bu esa kelgusida shu soha boʻyicha oliy oʻquv dargohlarida oʻqishga kirib yetuk mutaxassis boʻlib yetishishga zamin hozirlaydi.

- Muddatli harbiy xizmat menga juda koʻp narsalarni berdi. Men uchun armiya xizmati ulkan hayot maktabi boʻlib qoldi. Bu esa mening navbatdagi mustaqil hayotimda juda qoʻl kelishini chuqur anglab va tushunib turibman. Ishonchim komilki, bu yil yozda Toshkent axborot texnologiyalari universitetiga oʻqishga kirib, soha boʻyicha yetuk mutaxassis boʻlib yetishaman, - deydi qahramonimiz Azamat Odilboyev telefon orqali bogʻlanganimizda.

Azamatning oʻziga ishonch bilan gapirishida jon bor. Chunki u muddatli harbiy xizmatni oʻtash jarayonida murakkab harbiy aloqa texnologiyalari bilan ishlash va zarurat tugʻilganida bu texnologiya uskunalarini taʼmirlash sirlarini puxta egalladi, qism qoʻmondonligining nazariga tushdi.

Biz unga qadaming shaxdam, ezgu orzu-niyatlaring ushalaversin, deb qolamiz.

Qobul ShOMURODOV.

(Foto - uza.uz)