MAVSUMGA PUXTA TAYYoRGARLIK KOʻRILDI

Qishloq xoʻjaligida yerdan samarali foydalanish, davlat buyurtmalarini bajarish hamda oziq-ovqat mahsulotlarini ishlab chiqarish hajmini kengaytirish maqsadida tumandagi fermer xoʻjaliklarining asosiy maydonlariga 2019-yil hosili uchun ekiladigan qishloq xoʻjaligi ekinlari turlari va miqdori belgilandi. Unga koʻra, joriy yilda tumandagi 366 ta fermer xoʻjaliklari va qishloq xoʻjaligi korxonalarida jami 3350 gektar maydonga gʻalla, 1565 gektar maydonga sabzavot, 450 gektar maydonga poliz, 50 gektar yerga dukkakli ekinlar, 890 gektar maydonga moyli ekinlar, 390 gektar maydonga sholi, 992 gektar maydonga ozuqabop ekinlar ekilishi, 18 gektar maydonda intensiv bogʻ va 50 gektar maydonda yangi tokzorlar tashkil etilishi belgilangan.

Tumanda 2019-yil hosili uchun 366 ta fermer xoʻjaliklari va qishloq xoʻjaligi korxonalari tomonidan jami 15250 gektar maydonga chigit ekish hamda davlatga 32550 tonna paxta xom ashyosini yetkazib berish boʻyicha kontraktatsiya shartnomalari tuzildi.

2019-yil hosili uchun tumanda 4530 gektar maydonga paxtaning “S-47-27” navi, 9120 gektar maydonga “Sulton” navi, 1600 gektar maydonga yangi “Buxoro – 102” va “Buxoro-8” navlari ekilishi rejalashtirilgan.

Ekish mavsumida talab qilinadigan 183 tonna urugʻlik chigit dorilanib, ekishga shay qilib qoʻyildi. Urugʻlik chigitlari fermer xoʻjaliklariga 16 ta chigit tarqatish shoxobchalari tomonidan yetkazib berildi. Chigit ekish ishlarini sifatli amalga oshirish maqsadida 260 ta chigit ivitish oʻralari qazilib, mavsumga shay qilib qoʻyildi.

Chigit ekish ishlarini uyushqoqlik bilan oʻz muddatida va sifatli oʻtkazish maqsadida tuman boʻyicha 65 ta otryad tuzilib, ularga zarur texnika va mexanizmlar biriktirildi.

Bir soʻz bilan aytganda, tumanimizda yangi ekish mavsumi puxta tayyorgarliklar bilan kutib olinayapti.

A.Jumaniyozov.