“SOGʻLOM AYoL” OYLIGI DAVOM ETMOQDA

Oʻzbekiston Respublikasi Prezidentining 2018yil 2-fevraldagi “Xotin-qizlarni qoʻllab-quvvatlash va oila institutini mustahkamlash sohasidagi faoliyatini tubdan takomillashtirish chora-tadbirlari toʻgʻrisida”gi PF-5325-son Farmoni, Oʻzbekiston Respublikasi Vazirlar Mahkamasining 2018yil 10-maydagi 352-son “Qizlar va fertil yoshidagi ayollarga koʻrsatiladigan akusher-ginekologik tibbiy yordam xizmatlar samaradorligini oshirish chora-tadbirlari toʻgʻrisida”gi Qarori, Sogʻlikni saqlash vazirligining 2019-yil 21-maydagi 11-02/260 raqamli koʻrsatma xati ijrosini taʼminlash,  ambulatoriya-poliklinika muassasalari tomonidan  joylarda tugʻish yoshidagi ayollarning reproduktiv salomatligini yaxshilash, onalar va bolalar oʻlimining oldini olish maqsadida tumanimizda 2019-yil  3-iyun va  6-iyul kunlari oraligʻida  umumiy amaliyot shifokorlari, tor soxa mutaxassislari ishtirokida “Sogʻlom ayol” oyligi oʻtkazilmoqda.  Tumandagi koʻp tarmoqli markaziy poliklinika, qishloq oilaviy poliklinikalari va QVPlarda umumiy amaliyot shifokorlari, akusher-ginekologlar bilan birgalikda homiladorlikka mutlaq va nisbiy monelegi bor ayollar roʻyxati boʻyicha “Sogʻlom ayol oyligi”  oylik  tarmoq rejasi asosida profilaktik tibbiy koʻrik va sogʻlomlashtirish ishlari olib borilmoqda. “Sogʻlom ayol” oyligini oʻtkazish uchun birlashma maʼmuriyati tomonidan barcha shart-sharoitlar yaratilgan.

Shu kungacha jami 9041 nafar ayol profilaktik tibbiy tekshiruvdan oʻtkazildi. Shundan 8201 nafari tugʻish  yoshidagi, 1402 nafari ekstragenital kasallik aniqlangan tugʻish yoshidagi ayollardir. 1409 nafar ayolga ambulator davo tavsiya qilinib,  109 nafar ayolga statsionarda davolanishlari uchun zarur choralar koʻrildi.

Sogʻlomlashtirish oyligida  mutaxassislar tomonidan istalmagan tugʻruqning oldini olish choralari koʻrilmoqda. Shuningdek, oʻsmir qizlar tibbiy koʻrigi natijalariga koʻra 148 nafar qizlarga ambulator davo choralari tavsiya etildi.

“Sogʻlom ayol” oyligining oʻtkazilishidan  koʻzlangan maqsad, mazmun va  mohiyati  toʻgʻrisida umumiy amaliyot shifokorlari, patronaj hamshiralar tomonidan aholi oʻrtasida keng tushuntirish-targʻibot ishlari olib borilmoqda.

Ayol-qizlarimiz – oilamiz farishtalari, sogʻlom va barkamol avlodni dunyoga keltiruvchi va tarbiyalovchilardir. Demak, har bir ayol oʻz sogʻligiga eʼtibor berar ekan, bu barkamol avlod kelajagiga eʼtibor, sogʻlom kelajak uchun masʼuliyat hissi bilan yashash deganidir. Men shifokor  sifatida tumanimizdagi har bir ayol-qiz “Sogʻlom ayol” oyligida faol ishtirok qilib, salomatligini tibbiy koʻrikdan oʻtkazishini va ona Vatan, jamiyat oldidagi oʻz burchini ado etishini tavsiya qilaman.

J. YaVKAShEV, tuman tibbiyot birlashmasi

salomatlik markazi mudiri.