GʻOʻZALARNI SUGʻORIShNI SIFATLI OʻTKAZISh, SOLIQ SIYoSATIDAGI OʻZGARIShLAR TARGʻIBOTIGA BAGʻIShLANGAN YIGʻILISh OʻTKAZILDI
Shu yil 7-iyul kuni Qilichboy ovulida gʻoʻza parvarishidagi eng muhim tadbirlarni oʻz muddatlarida va sifatli amalga oshirish masalalariga bagʻishlangan yigʻilish boʻlib oʻtdi. Tadbirga tuman agrar sohasi masʼul xodimlari, sektorlar rahbarlari, MMTPlar va fermer xoʻjaliklari rahbarlari ishtirok etdilar.
Yigʻilishni tuman hokimi S.Yoʻldoshev ochdi va gʻoʻza nihollarini sugʻorishni oʻz muddatlarida, sifatli oʻtkazish borasidagi dehqonlar, soha xodimlari oldida turgan vazifalarga, mavsum davomida suvdan tejab-tergab foydalanishga erishishda yangi texnologik usullardan foydalanish afzalliklariga keng toʻxtaldi.
MMTPlar, fermer xoʻjaliklari raislari gʻoʻzalarni sugʻorishda egiluvchan koʻchma quvurlardan foydalanish borasidagi oʻz tajribalari bilan oʻrtoqlashdilar.
Shuningdek, tuman hokimi S.Yoʻldoshev soliq sohasida amalga oshirilayotgan islohotlar, sohaga joriy etilayotgan yangiliklar haqida ham batafsil maʼlumotlar berdi. Taʼkidlandiki, “Soliq va bojxona imtiyozlari berilishini yanada tartibga solish chora-tadbirlari toʻgʻrisida”gi 2019-yil 27-iyun kungi mamlakatimiz Prezidenti Farmoniga muvofiq, 2019-yil 1-oktyabrdan boshlab, oʻzi ishlab chiqargan qishloq xoʻjaligi mahsulotlariga va Oʻzbekiston Respublikasida ishlab chiqarilgan oziq-ovqat mahsulotlariga nisbatan belgilangan qoʻshilgan qiymat soligʻi boʻyicha imtiyozlar bekor qilinadi.
2019-yil yanvar oyidan sentyabr oyigacha 1 mlrd. soʻmdan ortiq pul aylanmasi (tushumi)ga ega boʻlgan yoki 50 gektardan ortiq qishloq xoʻjaligiga moʻljallangan yer maydonlariga ega boʻlgan yagona yer soligʻi toʻlovchilari endilikda qoʻshilgan qiymat soligʻi toʻlovchilari hisoblanadilar. Bunda 2019-yil 1-oktyabrdan boshlab belgilangan pul aylanmasi (tushumi) chegaraviy darajasiga yetgan yagona yer soligʻi toʻlovchilar ushbu darajaga erishilgan oydan keyingi oyning 1 sanasidan boshlab qoʻshilgan qiymat soligʻini toʻlashga oʻtadilar. Maʼruzachi oʻz soʻzida mazkur Farmon asosida tumanimizda odilona soliq siyosatining olib borilishi natijasida joriy yilning ikkinchi yarmida byudjetga tushumlar miqdorining keskin oshirilishiga erishish chora-tadbirlari koʻrilishini taʼkidladi.
Yigʻilish ishtirokchilarini qiziqtirgan savollarga batafsil javoblar qaytarildi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
