Shaxmat-shashka boʻyicha “Biz aql-idrokli oilalarmiz” turnir musobaqasi oʻtkazildi

Qadimiy oʻyin sanalgan shaxmat maʼnaviyatimizning bir boʻlagi sifatida eʼzozlanadi va oʻsib kelayotgan yosh avlodning mantiqiy tafakkur darajasini oʻstirish uchun ular ushbu sport turi bilan shugʻullanishga keng jalb etiladi. Shaxmat va shashka oʻyinini yanada  kengroq targʻib etish, voyaga yetmagan yoshlarning boʻsh vaqtlarini mazmunli tashkil etish va ularni sport musobaqalariga ommaviy ravishda jalb etish maqsadida musobaqalar ham oʻtkazib boriladi.

 13-iyul kuni  Bolalar-oʻsmirlar sport maktabining shaxmat zalida oilalar oʻrtasida oʻzaro madaniy-sport aloqalarini yoʻlga qoʻyish maqsadida “Mahalla” kubogi uchun shaxmat-shashka boʻyicha “Biz aql idrokli oilalarmiz” turnir musobaqasi tashkil etildi. Musobaqada ovul va mahallalarda istiqomat qiluvchi oilalar, yaʼni 2 nafar 75 yoshgacha boʻlgan buva va buvi, 2 nafar 50 yoshgacha boʻlgan ota-ona hamda 2 nafar 16 yoshgacha boʻlgan farzandlardan tashkil topgan jamoalar qatnashdi. Mahallalararo bosqich gʻoliblari ishtirok etgan musobaqaning tuman bosqichi hakamlar hayʼati tomonidan odilona baholab borildi. Musobaqa yakunida Toʻlqin ovulidan Yoʻldoshevlar oilasi 1-oʻrin, Durunki mahallasidan Qurbonovlar oilasi 2-oʻrin, Kuyuk Koʻpir ovulidan Boltayevlar oilasi 3-oʻrin  gʻolibi deb topildi.

Gʻolib jamoalarga tashkilotchilar tomonidan diplom va esdalik sovgʻalar topshirildi.

D.Abdurahmonova.