SAMANDARNING YuTUQLARI KOʻPAYMOQDA

Mamlakatimizda sportni, ayniqsa, bolalar sportini rivojlantirish borasida tub oʻzgarishlar amalga oshirilmoqda. Jismoniy tarbiya va sportning kelajak avlodni sogʻlom qilib tarbiyalashdagi oʻrni hisobga olinib, zamon talablariga javob beruvchi yangi-yangi sport inshootlari qurilib, foydalanishga topshirilmoqda.

Tumanimizdagi 38-sonli maktabning 9-sinf oʻquvchisi Samandar Madrahimov ham sport bilan endigina shugʻullana boshlaganiga qaramay, tumanimiz, qolaversa, Qoraqalpogʻiston miqyosida musobaqalarda oʻz vazn toifasida faxrli oʻrinlarni egallab kelmoqda.

U kurash boʻyicha 2004-2005-yillarda tugʻilgan bolalar oʻrtasida tumanimizdagi Bolalar-oʻsmirlar sport maktabi birinchiligi uchun oʻtkazilgan musobaqada 1-oʻrin, Vatan himoyachilari kuniga bagʻishlab, dzyudo kurashi boʻyicha 2002-2003-yillarda tugʻilgan oʻsmirlar oʻrtasida 60 kg. vazn toifasida 1-oʻrin, Nukus shahri 1-sonli Bolalar-oʻsmirlar sport maktabi ochiq birinchiligida ham 1-oʻrinni egalladi.

Samandarning qator nufuzli musobaqalarda gʻolib boʻlib, qoʻlga kiritgan medallari, faxriy yorliq va diplomlari kishining havasini keltiradi.

U maktabda aʼlo baholarga oʻqib, boʻsh vaqtlaridan unumli  foydalanib, mashqlarni kun sayin kuchaytirib bormoqda. Uning maqsadi jahon miqyosidagi musobaqalarda qatnashib, yurtimiz sport shaʼnining yuksalishiga hissa qoʻshishdir.

Xosiyat ZARIPOVA.