Amudaryo tumanida 9 ta fermer xoʻjaliklarining 113 gektar paxta dalalarida tomchilab sugʻorish yoʻlga qoʻyildi

5-sentyabr kuni Qilichboy ovuli Besh ovul mahallasida faoliyat yuritayotgan “Farhodov Asadbek” fermer xoʻjaligi dalasida tomchilab sugʻorishni joriy etishning afzalliklari xususida seminar oʻtkazildi. Seminarda taʼkidlanganidek, global iqlim oʻzgarishi natijasida soʻnggi yillarda davriy ravishda suv tanqisligi kuzatilmoqda. Shu sababli yer osti suv zaxiralaridan samarali foydalanish hamda suv tejovchi texnologiyalarni joriy etish ichki bugunning dolzarb masalasi hisoblanadi.

Prezidentimizning 2018-yil 27-dekabrdagi qaroriga asosan gʻoʻza yetishtirishda tomchilatib sugʻorish texnologiyalaridan foydalanish boʻyicha loyihalarni amalga oshirayotgan paxta xomashyosi ishlab chiqaruvchilarini davlat tomonidan qoʻllab-quvvatlashning taʼsirchan tizimini joriy etish ustuvor vazifa etib belgilangan edi.

Oʻzbekiston Respublikasi Vazirlar Mahkamasining 2019-yil 6-fevral kungi qarori bilan “Paxta xom ashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlarini qoplash tartibi toʻgʻrisidagi nizom” tasdiqlandi.

Bu borada tumanimizda ham qator amaliy ishlar qilinmoqda. Joriy yilda tumanda 113 gektar paxta maydonlarida tomchilab sugʻorishni joriy etish rejalashtirilib, loyihaning umumiy qimati 2 milliard 200 million soʻmni tashkil qiladi.

Shu kungacha tumandagi “Xudoybergenova Omongul” fermer xoʻjaligining 32 gektar yerida 600 million soʻmlik, “Farxodov Asadbek” fermer xoʻjaligining 10 gektar maydonida 200 mln. soʻmlik va yana 7 ta fermer xoʻjaliklarining jami 71 gektar maydonlarida umumiy qiymati 1 milliard 200 million soʻmlik ish hajmi bajarildi. Tuman boʻyicha jami boʻlib 9 ta fermer xoʻjaliklarining paxta dalalarida tomchilab sugʻorish yoʻlga qoʻyilib, vegetatsiya mavsumi davomida gʻoʻza nihollari 3-martadan sugʻorildi.

Seminarda tuman hokimi S.Yoʻldashev va boshqalar taʼkidlanganlaridek, ekinlarni tomchilatib sugʻorish bir qancha afzalliklarga ega. Jumladan, oʻsimlikning talabiga mos ravishda suv beriladi, tuproqdan suv kam bugʻlanadi, dalada begona oʻtlar boʻlmaydi. Qolaversa, suv tuproqqa singib ketmaydi va oqavaga tashlanmaydi. Sugʻorish jarayonida moddiy resurslar sarfi va qoʻl mehnati kamayadi, suv va oʻgʻitlarni yetkazib berish osonlashadi. Shuningdek, oʻsimlikning suv va oʻgʻitni tuproqdan olishi osonlashadi. Tomchilatib sugʻorishda boshqa sugʻorish usullariga nisbatan ekin turiga qarab 20 foizdan 60 foizgacha suv tejaladi. Hosildorlik miqdori va sifati oshadi. Mineral oʻgʻit suv bilan berilishi sababli, oʻgʻit sarfi bir necha baravarga kamayadi. Bir soʻz bilan aytganda, tomchilab sugʻorish ancha mablagʻni tejab, moʻl hosil olish imkonini beradi.

Seminarda kelgusi yillarda tomchilab sugʻoriladigan maydonlar hajmini oshirish masalalari muhokama qilindi.