Amudaryo tumani hokimi Sultonboy Pajapbayevich Yoʻldashevning tuman tadbirkorlariga murojaati

Hurmatli tadbirkorlar!

Hammangizga maʼlumki, soʻnggi yillarda mamlakatimizda tadbirkorlikni rivojlantirish va qoʻllab-quvvatlash boʻyicha qator amaliy ishlar qilindi. Kichik va oʻrta biznes rivoji yoʻlidagi byurokratik toʻsiqlarni bartaraf qilish, tadbirkorlarga qulaylik va sharoitlar yaratish maqsadida yangi Qonunlar, Farmon va qarorlar qabul qilindi. 

Yaqindagina, 7-noyabr kuni oʻtkazilgan videoselektor yigʻilishida muhtaram Prezidentimiz “Har bir tadbirkorga – koʻmakdosh, yelkadosh va madadkormiz!” gʻoyasini ilgari surdi.

Prezidentimiz alohida taʼkidlaganlaridek, “Bundan buyon taraqqiyot va farovonlikka faqatgina tadbirkorlikni rivojlantirish va qoʻllab-quvvatlash orqali erishish mumkin”.

Amudaryo tumanida ham tadbirkorlarni qoʻllab-quvvatlash, ularning samrali faoliyat yuritishlari uchun sharoitlar yaratish borasida tizimli ishlar amalga oshirilmoqda.

Birgina Prezidentimizning oʻtgan yili Qoraqalpogʻiston Pespublikasiga qilgan tashrifi davomida bergan topshiriqlari boʻyicha olib borilayotgan ishlar natijasinida tumanimizda 136 mlrd. soʻmdan ortiq, jumladan salkam 10 mln. dollarlik xorijiy investitsiya mablagʻlari hisobidan 65 ta loyihalar amalga oshirilishi rejalashtirilgan. 1-noyabr holatiga ularning 52 tasi ishga tushirildi, qolgan loyihalar boʻyicha ham ishlar davom ettirilmoqda.

Bundan tashqari, 2020-2021-yillarda amalga oshirilishi rejalashtirilgan investitsiya loyihalari doirasida qiymati salkam 200 mlrd. soʻm, shu jumladan 3,5 mln. dollarlik xorijiy kredit liniyalari hisobidan 78 ta loyihalar amalga oshirilishi va 765 ta yangi ish oʻrinlari yaratilishi  moʻljallangan.

Biz nima uchun tadbirkorlarni qoʻllab-quvvatlashimiz kerak?

Sababi, tumanimizda ish bilan band aholining 54 foizi, ishlab chiqarilayotgan mahsulotlarning 100 foizi, koʻrsatilayotgan xizmatlarning 100 foizi tadbirkorlar hissasiga toʻgʻri keladi. Bugungi kunda tuman boʻyicha 1078 ta tadbirkorlik subʼektlari faoliyat koʻrsatmoqda.

Birgina 2019-yilning oʻtgan 10 oyi davomida tuman boʻyicha jami 1326 ta yangi ish oʻrinlari yaratilgan boʻlsa, ularning 1273 tasi, yoki 96 foizi tadbirkorlar hissasiga toʻgʻri keladi.

Yana bir marta taʼkidlamoqchimanki, tadbirkorlik bilan shugʻullanayotgan, yoki oʻz faoliyatini boshlash niyatida boʻlgan tashabbuskorlar uchun barcha masalalar boʻyicha koʻmakdosh boʻlamiz va yuzaga keladigan har qanday muammoni hal qilishda amaliy yordam koʻrsatishga tayyormiz.

Chunki biz masʼullar uchun kun tartibidagi ustuvor masala – tadbirkorlar bilan bevosita muloqot qilish, ularning dardini eshitish va muammolarini hal qilishdir.

Aziz tadbirkorlar!

Siz uchun eshiklarimiz hamisha ochiq.

Sizning har bir loyihangiz shaxsiy nazoratimiz ostida boʻladi. Loyihani ishlab chiqishdan, to uni amalga oshirishgacha boʻlgan barcha jarayonda bevosita koʻmak berish birinchi galdagi vazifamiz boʻladi.

Sizning loyihangiz – tumanimizning ertangi kelajagi va aholimiz farovonligining kafolatidir. Siz tufayli tumanda ishsizlik qisqaradi, daromadlar oshadi, oilalarimiz, ayollarimiz va farzandlarimiz turmushidan minnatdor boʻlib, oʻz yurtida halovat topadi. Shunday ekan, bor kuch va gʻayratingizni oʻz faoliyatingizni yanada kengaytirib, biznesingizni rivojlantirishga qarating. Bu yoʻlda biz Sizga eng yaqin yordamchi, eng ishonchli kafil boʻlamiz!