Bugʻdoy dalalarida kuzgi parvarish ishlari sifatli amalga oshirilmoqda

“Yoʻldoshboy Nasimbek” fermer xoʻjaligi Boʻz yop ovulidagi eng peshqadam fermer xoʻjaliklardan biri hisoblanadi. Xoʻjalikning ilgʻor dehqonlari paxta va gʻalla boʻyicha belgilangan shartnomaviy rejalarni doim tumanda birinchilardan boʻlib, ortigʻi bilan uddalashadi.

Toʻliboy Xoʻshmonov rahbarlik qilib kelayotgan mazkur fermer xoʻjaligida 22 nafar pudratchi mehnat qiladi. Shuningdek, xoʻjalikning oʻz texnikalari ham mavjud. Koʻp yillardan beri ishlab kelayotgan tajribali mexanizatorlar TTZ-80-11 chopiq  va VT-150 surim traktorlari, dominator kombaynlar yordamida ish unumini oshirib kelishmoqda.

Joriy yilda mirishkor dehqonlar 47 gektar yerga chigit qadashdi. Pudratchi va ishchilar tekis unib chiqqan nihollarni astoydil parvarish qilishdi. Gʻoʻzalar oʻz vaqtida oziqlantirilib, yetarli miqdorda sugʻorildi. Natijada paxtadan moʻl hosil yetishtirildi va xoʻjalikning paxta boʻyicha shartnomaviy rejasi muddatidan oldin bajarildi. Davlatga rejadagidan ortiq “oq oltin” topshirishga erishgan pudratchilar mehnatlariga yarasha daromadga ham ega boʻlishdi.

 “Yoʻldoshboy Nasimbek” fermer xoʻjaligida  8 gektar yerga “Asr” navli bugʻdoy ekildi. Ayni paytda ishchilar xoʻjalik rahbari Toʻliboy Xoʻshmonov bosh-qoshligida dondan ham moʻl va sifatli hosil olishga erishish maqsadida nihollar parvarishi bilan band. Gʻalla yetishtirilayotgan dalalarda  barcha agrotexnik tadbirlar belgilangan muddatda bajarib borildi. Oʻz vaqtida suvdan unumli foydalanilib, sifatli sugʻorildi. Shu bois bugʻdoy maysalari tekis unib chiqib, baravaj oʻsdi. Kuzgi parvarishga alohida eʼtibor qaratilgani natijasida nihollar toʻliq tupladi.

Ekin maydonlarida barcha agrotexnik tadbirlarning sifatli amalga oshirilishi boshoqli don ekinlaridan yuqori hamda sifatli hosil olishga puxta zamin yaratadi. Fermer va xoʻjalik ishchilari gʻalladan ham moʻl hosil olishga erishib, sarbaland xirmon bunyod etish uchun astoydil mehnat qilishmoqda.

O. Xudoyberganova.