“Biz OITSga qarshimiz. Biz sogʻlom turmush tarzi tarafdorimiz”

1988-yildan boshlab 1-dekabr butunjahon OITSga qarshi kurash kuni sifatida belgilanib kelinmoqda. Bu kun sogʻlom hayot tarzini ilgari surish, OITS xavfi haqida keng jamoatchilikni xabardor qilish, kasallikning keng tarqalishining oldini olish choralari haqidagi fuqarolarning bilimlarini oshirish borasida koʻpgina chora-tadbirlar amalga oshiriladi.

OITS shunday ayovsiz kasallikka jinsi, irqi, millati, elatidan qatʼiy nazar, nosogʻlom hayot kechiruvchi insonlarni oʻz  domiga tortaveradi, har yili dunyo miqyosida qanchadan-qancha odamlarning hayotiga zomin boʻlmoqda. Shuning uchun ham unga qarshi kurashishda ham xalqaro hamkorlik yoʻlga qoʻyilgan. Butun dunyoda 1-dekabr kunini sogʻlom turmush tarzi targʻiboti kuni sifatida nishonlashga ulkan ahamiyat qaratilmoqda.

Oʻzbekistonda ham 2001  yildan beri bu halokatli kasallikka qarshi  xalqaro hamkorlar bilan birga kurashib kelinmoqda. Amalga oshirilayotgan tibbiy-profilaktik qoʻshma dasturlar tufayli koʻpgina kishilarning  hayoti saqlab qolindi, kasallikni oʻz vaqtida aniqlash, sifatli parvarishlash, hayotiy zarur davolanish imkoniyatlari yaratildi.

Aniqlanishicha kasallik 80 foiz holatda nosogʻlom hayot kechiruvchilar - fohishalar, giyohvandlar, tanosil kasalliklari bilan tez-tez ogʻrib turuvchilarda uchrar ekan.

Respublikamizda OITS kasalligining oldini olish va unga qarshi kurash boʻyicha hamda bu kasallikni tarqatishga urinuvchi shaxslarni qattiq nazorat qilish haqida respublika qonuni va uzoq muddatga moʻljallangan dasturi tuzilgan. Yurtimizda OITSning tarqalib ketishining oldini olish choralaridan biri - unga qarshi kurashuvchi ixtisoslashtirilgan respublika markazi, viloyat va shaharlarda esa uning boʻlimlari tashkil etildi, diagnostika laboratoriyalari faoliyati yoʻlga qoʻyildi.

Eng avvalo bu kasallik odamdan odamga qanday yuqadi? Esda tutish lozimki, OITS odamdan odamga zino, zarursizlantirilmagan kesuvchi, sanchiluvchi asbob-uskunalar orqali, onadan bolaga  bola tugʻilayotganda yuqishi mumkin.
Birlashgan Millatlar Tashkilotining OIV OITS boʻyicha dasturi – YuNEYDSning bergan maʼlumlotlariga koʻra, bugungi kunda dunyo boʻyicha 37 million OIV infektsiyasi bilan yashayotgan kishilar roʻyxatga olingan. Mamlakatimizda shu yilning birinchi noyabr holatiga bunday shaxslar 42098 nafarni tashkil etadi. Ularni, bu kasallikdan aziyat chekayotganlarni qoʻllab-quvvatlash, ushbu global tibbiy-ijtimoiy muammoga odamlarning eʼtiborini yana bir bor jalb qilish va sogʻlom turmush tarzi afzalliklarini targʻib qilish maqsadida yurtimizda 1-dekabr – Butunjahon OITSga qarshi kurash kuni keng nishonlandi. Shuningdek, tumanimizda ham ushbu mashʼum kasallikning ogʻir oqibatlaridan ogoh etuvchi, ehtiyot choralari boʻyicha bilimlarni targʻib etuvchi tadbirlar oʻtkazildi. Ovul va mahallalarda, mehnat jamoalarida tibbiyot muassasalarida “Biz OITSga qarshimiz, biz sogʻlom turmush tarafdorimiz” shiori ostida oʻtkazilgan bunday tadbirlar aholining ushbu kasallikdan ogohligini oshirishga xizmat qiladi.

Jumaboy YaVQAShEV, tuman Tibbiyot birlashmasi

tashkiliy ishlar boʻilmi mudiri.