Reproduktiv salomatlikni mustahkamlash maqsadida oʻquvchi-yoshlar tibbiy koʻrikdan oʻtkazilmoqda

Reproduktiv  salomatlik – bu  odamdagi  reproduktiv tizim va uning faoliyatiga bogʻliq  barcha masalalarda  faqat kasallik  va kamchiliklar  yoʻqligi boʻlibgina qolmay, balki toʻliq jismoniy, aqliy, ijtimoiy  muvaffaqiyatlarga erisha olish darajasidir. Oilada farzandlar dunyoga kelishi, onaning va tugʻilajak bolaning salomatligi uchun maqbul sharoitlarni yaratish  tufayligina bunga erishiladi. Bunda  faqat tugʻilajak farzandlar soni emas, balki  oilalar farovonligini taʼminlash,  ularda ijobiy psixologik iqlimning  hukm surishiga erishish,  onalar va bolalar salomatligini saqlash,  oilaning  tom maʼnodagi mustahkamligini saqlash ham nazarda tutilgan.

        Mamlakatimizda   keyingi yillarda shu boisdan ham  aholi reproduktiv salomatligini mustahkamlash, onalar va bolalar, oʻsmirlar  sogʻligʻini muhofaza qilish maqsadida  aholini maqsadli patronaj va profilaktik koʻriklar bilan  qamrab olishga, kasalliklarni barvaqt aniqlashga va bartaraf etishga  alohida eʼtibor qaratilmoqda.

         Shu maqsadda  har yilgi anʼanaga  muvofiq  tuman Tibbiyot birlashmasi   maʼmuriyatining 2020-yil 15-yanvardagi  buyrugʻiga koʻra, tumanimizdagi  maktabgacha taʼlim tashkilotlarida tarbiyalanayotgan,  maktablarda taʼlim-tarbiya olayotgan va oilalarda tarbiyalanayotgan voyaga yetmagan  bolalarni , oʻquvchi-yoshlarni  tor doiradagi mutaxassis shifokorlar  ishtirokida chuqurlashtirilgan  tibbiy  koʻrikdan oʻtkazish ishlari boshlanib ketdi.

Tumanimizda yashovchi 199 ming 31 nafar aholining  69 ming 229 nafarini voyaga yetmaganlar tashkil qiladi. Shundan maktablarda taʼlim olayotgan oʻquvchilar soni  38218  nafardir.  2019-yilda oʻtkazilgan  chuqurlashtirilgan tibbiy koʻrikka jami voyaga yetmaganlarning 99,98 foizi qamrab olindi. Natijada 54 ming 135 nafari sogʻlom  ekanligi, 13 ming 602  nafarida turli kasalliklar alomatlari  mavjudligi aniqlangan edi. Shundan  13 ming 502 nafar bolalar sogʻlomlashtirildi.

      Joriy yil 20-yanvardan boshlangan voyaga yetmaganlarni tibbiy koʻrikdan oʻtkazish ishlariga  8 ta brigada jalb qilindi. Ularning safiga  psixonevrolog, stomatolog, oftalmolog, quloq-tomoq burun kasalliklari, jarroh-ortoped, endokrinolog, oʻsmirlar va bolalar ginekologi  shifokorlari,  UZI mutaxassislari  kiritilgan boʻlib, taʼlim muassasalariga tashrif buyurgan holda tibbiy koʻrik ishlari boshlab yuborildi.  

Chuqurlashtirilgan tibbiy koʻrikdan  oʻtkazish ishlari  tumanimizning 55-sonli va 31-sonli maktablarida ham masʼuliyat bilan oʻtkazildi.  Koʻrik davomidagi natijalar boʻyicha hisobotlar  sinflar rahbarlariga taqdim etildi. Kasallik aniqlangan holatlarda ularga qayta  tekshiruv va davolanish uchun tuman  koʻptarmoqli markaziy poliklinikasiga  borishlari tavsiya qilindi.  

Shunday vaqtlarda ota-onalar ham farzandlari salomatligiga eʼtiborli boʻlib, shifokorlar tavsiyalariga amal qilsalar,  har xil kasalliklarning oldi olingan boʻlar edi. Axir kasallikni davolatgan koʻra oldini olish afzal ekanligi barchaga ayon haqiqat.

Tumanimizda voyaga yetmaganlarning  chuqurlashtirilgan tibbiy koʻrigini   shu yil may oyining 15 sanasigacha oʻtkazish rejalashtirilgan.

       O.RAJABOVA.