“Jayhun ilhomlari” NNT tomonidan oʻtkazilayotgan tadbirlarda isteʼdodli va ijodkor yoshlar aniqlanmoqda

Tumanimizning qaysi bir burchagiga bormang, koʻngli orzu-umidlarga toʻla, bilim sirlarini puxta egallab, yuksak choʻqqilarga intilayotgan orzulari bir jahon yoshlarga duch kelasiz. Ana shunday iqtidorli oʻquvchilarni aniqlash, ularning isteʼdodlarini yuzaga chiqarishlarida koʻmaklashish maqsadida “Jayhun ilhomlari” notijorat nodavlat tashkiloti tomonidan umumtaʼlim maktablarida turli tadbirlar tashkil etilib, ular uchun yaratilgan sharoitlar bilan tanishilmoqda.
Iqtidorli va isteʼdodli yoshlar tumanimizdagi 49-sonli umumtaʼlim maktabida ham koʻplab topiladi. Ayni kunda maktabda 243 nafar oʻquvchi bilim sirlarini egallamoqda.

Maktabda Prezidentimiz tomonidan ilgari surilgan 5 ta muhim tashabbusning mazmun-mohiyatini oʻquvchilar ongiga singdirish, ular orasidan qobiliyatli yoshlarni tanlab olish, iqtidorli oʻquvchilarning imkoniyatlarini yuzaga chiqarish borasida keng koʻlamli ishlar amalga oshirilmoqda.

Biz soʻz yuritayotgan umumtaʼlim maktabida 15 ta fan va 9 ta sport toʻgaraklari mavjud boʻlib, bu toʻgaraklarga 225 nafar oʻquvchilar jalb qilingan. Adabiyot, teatr va sanʼat, musiqa, jismoniy tarbiya toʻgaraklariga oʻquvchilar faol qatnashishmoqda.
Musiqa toʻgaragi qatnashuvchilari boʻlgan raqqosa qizlar guruhi hududiy, tuman bosqichidagi tanlovlarda qatnashib kelishmoqda va katta tadbirlardagi chiqishlari ham barchaga manzur boʻlmoqda.

Maktabdagi kompyuter toʻgaragining ham faol aʼzolari koʻp. Toʻgarakda oʻquvchilarning kompyuter boʻyicha savodxonligi oshirib borilmoqda. Sport toʻgaraklarida esa oʻquvchilar shaxmat-shashka, voleybol, stol tennisi, futbol, yengil atletika turlari boʻyicha mashqlar oʻtkazishmoqda. Ayniqsa, maktabning sportchi oʻquvchilari tomonidan qoʻlga kiritilayotgan yutuqlar koʻzga tashlanmoqda. Hudud va tuman bosqichlarida maktabning yosh sportchilaridan Diyora Maqsudova 1,500 metrga yugurishda 2-oʻrinni, Umarjon Hojiqurbonov 200 metrga yugurish musobaqasida 1-oʻrinni egallab respublika bosqichida qatnashish huquqini qoʻlga kiritdi.
Maktabda oʻquvchilarning yanada chuqurroq bilim olishlari uchun kutubxona muntazam ishlab turibdi. Kutubxona mudirasi Gulbahor Tojiboyeva oʻquvchilarning kitob tanlashida, qulay sharoitlarda oʻqib mutolaa qilishlarida yaqindan yordam bermoqda.

Maktabning 8-sinf oʻquvchisi Oʻgʻiloy Chorshamova, 7-sinf oʻquvchisi Elmira Yoʻldoshevalar kutubxonaning eng faol oʻquvchilaridir. Elmira  Yoʻldosheva kelajakda ingliz tili oʻqituvchisi boʻlmoqchi. Buning uchun u bor imkoniyatlardan foydalanib, darsliklarga qoʻshimcha ravishda ingliz tilini oʻrganishga oid adabiyotlarni ham oʻqib-oʻrganmoqda.

Hozirgi kunda maktab direktori Shukurboy Ayimbetovning tashabbusi bilan yuqori sinf oʻquvchilari orasida “Kelajakda kim boʻlmoqchisiz” soʻrovnomalari oʻtkazilmoqda. Soʻrovnomaga javoban oʻquvchilar kelajakda qaysi kasb egasi boʻlishi, qaysi oliy oʻquv yurtlariga kirib oʻqishi haqida oʻzlarining fikrlarini bildirmoqdalar. Orzular tiniq, fikrlar uygʻoqligi soʻrovnomalarda aks etmoqda.

Tumanimizdagi 48-sonli umumtaʼlim maktabida ham bugungi kunda 370 nafar oʻquvchi bilim va taʼlim-tarbiya olmoqda. Beshta muhim tashabbus ijrosini va oʻquvchilarning boʻsh vaqtlaridan unumli foydalanishlarini taʼminlash maqsadidagi 16 ta fan toʻgaraklari ishlab turibdi. Bu toʻgaraklarga jami 250 nafar oʻquvchi jalb qilingan. Jumladan, birinchi tashabbus yoʻnalishida 4 ta, ikkinchi tashabbus yoʻnalishida 6 ta, uchinchi tashabbus yoʻnalishida 2 ta, toʻrtinchi tashabbus yoʻnalishida 1 ta va beshinchi tashabbus yoʻnalishida 3 toʻgarak faoliyat  yuritmoqda.

Maktabdagi “Adabiyotshunoslik” toʻgaragining aʼzolari 10-sinf oʻquvchisi Nafisa Shukurlayeva, 9-sinf oʻquvchisi Bekzod Xalillayevlar oʻzlari yozgan sheʼrlari bilan ancha tanilib qoldilar. “Yosh rassomlar” toʻgaragining  aʼzolari esa tasviriy sanʼat yoʻnalishida tuman, respublika bosqichlarida qatnashib, yuqori oʻrinlarni egallab kelmoqdalar. Toʻgarak qatnashchisi 5-sinf oʻquvchisi Dinora Aminboyeva tasviriy sanʼat sohasida oʻzining bilimdon ekanligini bilan ajralib turadi. Mazkur maktabda kompyuter saboqlari ham puxta oʻzlashtirilmoqda. Bu borada maktabning 8-sinf oʻquvchisi Ogʻabek Oʻrozboyev oʻzining bilimdonligi bilan barchani hayratga solmoqda.

Biz soʻz yuritayotgan 48-sonli umumtaʼlim maktabida sportning barcha turlari boʻyicha ish olib borilmoqda. Toʻgarak aʼzolari musobaqalarning hududiy, tuman bosqichlarida yuqori oʻrinlarni egallab kelmoqdalar. Maktabning 7-sinf oʻquvchisi Asadbek Oʻrinboyev erishayotgan yutuqlar barchaning quvonchiga sazovor boʻlmoqda.
Oʻquvchilar erishayotgan yutuqlar koʻp. Bu imkoniyatlardan foydalanib, ular yanada baland choʻqqilarni zabt etadilar.
Ha, oʻquvchilarning orzulari bir jahon. Ular kelajakda yuksak choʻqqilarni koʻzlab olgʻa intilmoqdalar. Oʻquvchilarning katta maqsadlarga erishishida mehribon ustozlar qoʻl-qanot boʻladilar, albatta.

Oʻrozali PEYIMOV, "Jayhun ilhomlari" NNT raisi.