“Gʻazal mulkining sultoni” mavzusida ochiq dars tashkil qilindi

Mamlakatimizda ulugʻ mutafakkir shoir, oʻzbek mumtoz adabiyotida oʻziga xos oʻringa ega boʻlgan inson Alisher Navoiyning tavallud ayyomi keng miqyosda nishonlab kelinmoqda. Ayniqsa, taʼlim muassalarida turli xil tadbirlar, adabiy-badiiy kechalar tashkil qilinmoqda.

Tumanimizdagi barcha taʼlim maskanlari qatorida bizning 69-sonli umumtaʼlim maktabimizda ham ushbu sana munosib nishonlandi. Maktabimizda yuqori sinf oʻquvchilarining badiiy kechalaridan tashqari, boshlangʻich sinflarda Alisher Navoiy hayoti va ijodiga bagʻishlangan ochiq darslar ham oʻtkazildi.

Maktabning boshlangʻich sinf oʻqituvchisi Dilnoza Bobojonova esa ochiq dars tashkil qildi. Shoir tavalludining 579-yilligiga bagʻishlangan, “Gʻazal mulkining sultoni” deya nomlangan ochiq darsga 4-“A” sinf oʻquvchilari munosib tayyorgarlik koʻrishganini dars davomida namoyon qilishdi. Oʻqituvchi dastlab ushbu ochiq darsni “Ajdodlarga munosib avlod boʻlamiz!” shiori bilan boshladi. Soʻngra, ulugʻ shoirning asarlari oʻquvchi-yoshlarimiz tarbiyasidagi ahamiyati haqida toʻxtalib, shoir sheʼriyatidan parchalar keltirdi.

Oʻquvchilar 3 ta jamoaga ajratilib, bilimlari sinab koʻrildi. Har bir oʻquvchi sinf taxtasidagi mevalar rasmlari tushirilgan qogʻozchalarda aks ettirilgan Alisher Navoiy hayoti va ijodiga oid savollarga javob berdi.

Oʻquvchilarning shoir gʻazallarini yoddan ifodali oʻqishga harakat qilishlari ustozning oʻquvchilarda buyuk bobokalonimiz ijodiga boʻlgan qiziqishlarini uygʻota olganligidan dalolat beradi. Jajji bolajonlarning tarixiy shaxslar obrazlariga kirib, ijro qilgan sahna koʻrinishlari dars jarayoniga koʻtarinki ruh bagʻishladi.

Ochiq darsning qiziqarli oʻtishida Dilnoza Bobojonovaning mehnati katta boʻldi. Shunday jonkuyar, mehnatsevar ustozlarimiz bor ekan ajdodlarimizga munosib avlodni shakllantira olamiz.

Sapayeva Barno, 69-sonli maktabning ingliz tili fani oʻqituvchisi.