NAVROʻZ TAShRIFI

Vatan, muncha goʻzal bogʻ-u rogʻlaring,
Soylarga sir soʻylar hur qarogʻlaring.
Quyosh nurin ichgan qir-u togʻlaring,
Lolalar bazmiga xumor chogʻlaring,
Kamalak ranglarga chulgʻandi bugun!

Sabolar keltirdi ajib xush ifor,
Bagʻringda ne sehr, ne sinoat bor.
Jaranglar sochganda dillarda ashʼor,
Ogʻushing sogʻinib keladi bahor –
Entikib Ona Yer uygʻondi bugun!

Samoni titratdi momoguldirak,
Oftobin sogʻingan Hamaldan darak.
Oʻrik gullarini etib chirpirak,
Bogʻlarda izgʻirin kezar jonsarak,
Tun va kun bahoriy tenglandi bugun!

Amu sohillarin kezdim saro-sar,
Qadimiy Jayxundan topmayin asar.
Oʻrkachlari singan anov toʻlqinlar
Suvlar karvoniga bagʻrini bosar...
Koʻngilim daryoga aylandi bugun!

Har koʻngil daryodir bugun urpoqqa,
Mehr jomin tutib Qoraqalpoqqa.
Bir daryo oqmoqda Orol qum yoqda
Obi-hayot berib tuzli tuproqqa –
Moʻynoq yuraklarga joylandi bugun!

Ming yillik buloqlar koʻz ochdi goʻyo,
Asliga qaytganday Sir, Amudaryo.
Orol tomonlarda bor mehrigiyoh –
Ummonday talpinib turibdi Dunyo.
Koʻngil daryolari mavjlandi bugun!

Samolar bagʻrida ajib tantana,
Ketgan qushlar qaytib kelmoqda yana.
Bepoyon Orolqum kengliklariga
Bahor chechaklarin sochdi quvona.
Moʻynoq el Navroʻzga shaylandi bugun!

Abri bahor bilan undi naysonlar,
Iforin taratib gul-u rayhonlar.
Ajoyib! Mahliyo hatto jahonlar,
Kamalak rangiga doʻndi sayhonlar –
Ona Yer atlasday tovlandi bugun!

“Sumalakka!” – chorlov yangradi yurtda,
Surxon el, Buxoro va Samarqandda.
Bazmi Navroʻz qizib borar har kentda –
Toshkand-u Xorazm, azim Ustyurtda.
Tulporlar uloqqa chogʻlandi bugun!

“Kel ho, kel!” Bobolar qayrogʻin chalib,
Davralarga tushdi dillar yuksalib.
“Omon-omon”lardan, “Lazgi”dan olib,
Sozanda, goʻyanda – bari jamlanib,
Vatan Navroʻziga boylandi bugun!

Robiya YOʻLDOShEVA.