TOMORQA YeRLARDAN FOYDALANISh HOLATINI OʻRGANISh MAQSADIDA REYD OʻTKAZILDI

Oʻzbekiston Respublikasi Prezidenti Shavkat Mirziyoyev raisligida 18-mart kuni mahalla va oila muammolarini oʻz vaqtida aniqlash hamda hal etish masalalari boʻyicha videoselektor yigʻilishi oʻtkazildi. Mazkur yigʻilishda muhtaram Prezidentimiz tomonidan berilgan topshiriqlar ijrosi yuzasidan  tuman Mahalla va oilani qoʻllab-quvvatlash  boʻlimi, Davlat soliq inspektsiyasi,  tuman Fermer, dehqon xoʻjaliklari va tomorqa yer egalari Kengashi hamkorligida aholining tomorqa yerlaridan foydalanish holatini oʻrganish maqsadida reyd tashkil etildi.

Masʼullar Farovon mahalla fuqarolar yigʻinida xonadonma-xonadon yurib, bahor mavsumi boshlanishi munosabati bilan tomorqa yer egalarining tomorqalaridan samarali foydalanishi, obodonlashtirish holati, oilaviy muhiti, hojatxona va molxonalarining ahvoli, tandirlarining joylashgan maydoni, tomorqasida mevali va mevasiz daraxtlar koʻchatlari, gul koʻchatlari ekilganligini koʻrib chiqdilar.  Undan tashqari, tomorqa yer uchastkalari maydonlari, tuproq-iqlim sharoiti va suv taʼminotidan kelib chiqib, ekin turlari, mevali daraxtlar turi va soni, chorva mollari va parrandalar soni, shuningdek, ularning yil davomida tomorqa yer uchastkasida yetishtiradigan mahsulot turlari va sotish hajmlarini ham oʻrgandilar.
Maʼlumot oʻrnida aytish kerakki, tumanda jami 32570 ta tomorqa yer egalari mavjud boʻlib, ularda 5217,3 gektar ekin yerlari mavjud.  2020-yil bahor mavsumida ertaki ekinlar 4339,2 gektar yer maydonlariga, jumladan, 158 gektar sabzi, 180,5 gektar piyoz, 15,8 gektar sarimsoq piyoz, 225,6 gektar bodring, 169,2 gektar kukatlar, 694,3 gektar kartoshka, 477,3 gektar poliz ekinlari, 631,8 gektar pomidor ekinlarini ekish rejalashtirilgan.       

Shuningdek, 2658,8 gektar yerga oʻrtaki, yaʼni takroriy ekinlari ekish rejalashtirilgan. Jumladan, 72,1 gektar sabzi, 95,9 gektar bodring, 224,3 gektar kukatlar, 318,3 gektar kartoshka, 240 gektar poliz ekinlari, 119,9 gektar pomidor, 981,8 gektar boshqa ekinlar ekilishi koʻzda tutilgan.

2020-yilda tumandagi 49 ta ovul va mahallalardagi aholi tomorqalarida 1-1,5 sotixli 5,4 gektar yer maydonda 450 ta ixcham issiqxonalar tashkil qilindi va ertagi ekinlar koʻchatlari yetishtirilmoqda.

Farovon mahallasi hududida 429 ta xonadonda  istiqomat qiluvchi oilalar soni 503 ta, aholi soni 2351 nafarni tashkil qiladi. Oʻrganish davomida  ularning orasida tomorqalaridan samarali foydalanayotgan, ertaki ekinlarni oʻz vaqtida ekib, tomorqalarini obodonlashtirgan xonadonlar borligi maʼlum boʻldi.

Oʻtkazilgan reyd davomida tomorqa yer maydonlari qarovsiz qolgan yoki samarasiz foydalanib, obodonlashtirilmagan xonadonlar borligi ham aniqlandi.

Farovon mahalla fuqarolar yigʻinida Navbahor va Yakkatut koʻchalarida yashovchi 6 nafar tomorqa yer egalariga tuman Davlat Soliq inspektsiyasi va tuman Fermer, dehqon xoʻjaliklari va tomorqa yer egalari Kengashi tomonidan tomorqa yer maydonlaridan samarali foydalanishni tashkil etish va obodonlashtirish ishlari olib borish toʻgʻrisida ogohlantirish xatlari va unga muvofiq 1-aprel kuniga qadar muddat berildi. Berilgan muddatda tomorqa yer maydonlaridan samarali foydalanishni tashkil etmagan tomorqa yer egalariga tuman Davlat Soliq inspektsiyasi tomonidan joriy yil uchun hisoblangan yer soligʻining uch barobari miqdorini qoʻllash toʻgʻrisida tushuntirildi.

Baʼzi xonadonlarda hali uy egalarining koʻchib kelmaganligi, yashamayotganligi aniqlansa-da, bu xonadondagi tomorqadan ham unumli foydalanishlari shart ekanligi, agar tomorqadan unumli foydalanilmasa, bu xonadonlarning egalariga ham tuman Davlat Soliq inspektsiyasi tomonidan  joriy yil uchun hisoblangan yer soligʻining uch barobari miqdori qoʻllanilishi toʻgʻrisida batafsil tushunchalar berildi.

Endilikda tumanimizda barcha ovul va mahallalardagi xonadonlarda ularning tomorqa yerlaridan samarali foydalanishini oʻrganish reydlari muntazam oʻtkazilib boriladi va davom etadi.

Maʼlumki, oʻtgan yillar davomida davlatimiz tomonidan Qonunlar, muhim Farmon va Qarorlar, davlat dasturlari qabul qilinishi hamda ularning ijrosi izchil bajarilishi fermer, dehqon xoʻjaliklari va tomorqa yer egalarining qishloq xoʻjaligi mahsulotlarini ishlab chiqaruvchi asosiy subʼektlar sifatida shakllanishiga zamin yaratdi.  
 

O. Rajabova.