Bogʻdorchilik boʻyicha oʻquv seminari boʻlib oʻtdi

Soʻnggi vaqtlarda yurtimiz boʻylab, juda katta maydonlarda yangi, intensiv usuldagi bogʻlar barpo etilmoqda hamda eskilari qayta tashkil qilinmoqda. Ularning aksariyat qismini olma, gilos, shaftoli, olxoʻri, tok va yongʻoqzorlar tashkil qiladi.
Bogʻbon, dehqonlarimizning bilim va malakalarini oshirish, sohadagi yangiliklardan xabardor etib borish, yangi bogʻlarni toʻliq koʻkartirib olish, meva kasalliklaridan samarali himoyalash hamda moʻl hosil yetishtirishda muhim ahamiyat kasb etadi. Shuningdek, intensiv bogʻdorchilik ham bugungi kunda meva koʻchatlarini yetishtirishning juda ilgʻor texnologiyasidir.
Bugungi kunda mamlakatimizda boʻlgani kabi tumanimizda ham qishloq xoʻjaligi sohasining barcha tarmoqlari qatorida bogʻdorchilikni rivojlantirishga katta eʼtibor qaratilmoqda.
Joriy yilning 10-mart sanasida tuman hokimligining majlislar zalida yangi intensiv bogʻ va tokzorlarni barpo etish boʻyicha seminar-trening oʻtkazildi.
Mazkur seminar hududlarda intensiv bogʻdorchilikni rivojlantirish, mahalliy bogʻbonlarning malakasini oshirishlariga yordam koʻrsatish va shu maqsadda qoʻshimcha loyiha imkoniyati doirasida bogʻdorchilikka ixtisoslashgan tumanlarda kichik agrotexnik xizmat koʻrsatish markazlarini tashkil etishga amaliy yordam qilish maqsadida tashkil etildi.
Seminar Germaniya xalqaro jamiyati, yaʼni JAYZED firmasining Oʻzbekiston Respublikasidagi bogʻdorchilik yoʻnalishi boʻyicha loyiha koordinatori Umid Sayfiddinov, Oʻzbekiston Respublikasi Bogʻdorchilik va issiqxona xoʻjaligini rivojlantirish agentligining bosh mutaxassisi Hasan Moʻminovlar ishtirokida boʻlib oʻtdi. Shuningdek, Qoraqalpogʻiston Respublikasi bogʻdorchilik yoʻnalishi boʻyicha loyiha koordinatori Alisher Qodirov, Qoraqalpogʻiston Respublikalari Qishloq xoʻjaligi vazirligi bogʻdorchilik va issiqxona xoʻjaligini rivojlantirish agentligi boʻlim boshligʻi Djaxan Allamberganov, tuman Qishloq xoʻjaligi boʻlimi boshligʻi Islom Matkarimov va 60 ga yaqin tumanimiz bogʻbonlari seminar-treningda qatnashdilar.
Seminar-treningni tuman Qishloq xoʻjaligi boʻlimi boshligʻi Islom Matkarimov ochib berdi. U oʻz soʻzida yurtimizda qishloq xoʻjaligi sohalari, ayniqsa, bogʻdorchilik sohasining rivojlantirilishiga qaratilayotgan eʼtibor xususida keng toʻxtaldi.
Taʼkidlanganidek, mamlakatimizda qishloq xoʻjaligini, ayniqsa, chorvachilik, parrandachilik, bogʻdorchilikni rivojlantirish, bu borada yangi loyihalarni hayotga tatbiq etishga qaratilayotgan alohida eʼtibor oziq-ovqat mahsulotlari ishlab chiqarishni koʻpaytirishga, aholi farovonligini taʼminlashga xizmat qilmoqda.
Seminar-treningda Umid Sayfiddinov intensiv bogʻdorchilik sohasida fermer xoʻjaliklarida bugungi kunda hayotimizga tezlik bilan kirib kelayotgan yangi texnologiyalar aholini sifatli oziq-ovqat mahsulotlari bilan taʼminlash, jamiyat taraqqiyotini yanada jadallashtirish, turmushimiz farovonligini oshirish, hayotimizda oʻz yechimini kutayotgan ekologik, ijtimoiy va boshqa muammolarni bartaraf etishga qaratilganligi toʻgʻrisida soʻz yuritdi. Undan tashqari, intensiv bogʻdorchilikni rivojlantirish uchun dastlab yer tanlashni toʻgʻri tashkil etish, shudgorlash, tekislash, baxorgi-kuzgi shoʻr yuvish ishlariga katta eʼtibor qaratish, mevali daraxtlarga toʻgʻri shakl berish, mevali daraxtlarni payvandlash usullari va turlari, ularga har xil kimyoviy vositalar bilan ishlov berish usullari haqida batafsil maʼlumot berdi.  
Seminarda soʻzga chiqqan masʼullar tomonidan intensiv bogʻlar maydoni yildan yilga koʻpayib borayotgani eʼtirof etilib, yangi ekilgan koʻchatlarning yaxshi oʻsishi, rivojlanishi uchun iyun oyida tez-tez tomchilatib sugʻorish bilan birga koʻchat atrofiga ikkinchi marta 100-120 gramm azotli oʻgʻit solish tavsiya etildi.
Seminar juda qiziqarli oʻtdi. Tumanimiz bogʻbonlari soha boʻyicha oʻzlarini qiziqtirgan savollarga mutasaddilardan toʻliq javoblar oldilar. Bogʻdorchilikni rivojlantirish boʻyicha qator kerakli, yangi maʼlumotlarga ega boʻldilar.

Charos Arslonova, tuman hokimligining Axborot xizmati rahbari.