Sud raislari tadbirkorlar bilan sayyor uchrashuv oʻtkazishdi

Tumanimizdagi “Mangʻit” dehqon bozori binosida sud raislarining tadbirkorlar bilan sayyor uchrashuvi oʻtkazildi.

Uchrashuvda tuman Iqtisodiy sudi raisi Oʻtkir Sobirov, Fuqarolik sudi raisi Yerkin Uteniyazov, “Mangʻit” dehqon bozori masʼuliyati cheklangan jamiyati raisi Shavkat Yangiboyev hamda hududda savdo bilan shugʻullanayotgan tadbirkorlar ishtirok etdilar.
Sayyor uchrashuv Oʻzbekiston Pespublikasi Prezidentining “Tadbirkorlik subektlarini huquqiy himoya qilish tizimini yanada takomillashtirish chora-tadbirlari toʻgʻrisida”gi Farmoni, Oʻzbekiston Pespublikasining “Bankrotlik toʻgʻrisida”gi hamda “Korruptsiyaga qarshi kurashish toʻgʻrisida”gi Qonunlari mazmun-mohiyatlarini tadbirkorlarga keng turda tushuntirish, ularning muammolarini, takliflarini oʻrganish maqsadida tashkil qilindi.

Uchrashuv munosabati bilan oʻtkazilgan yigʻilishni Shavkat Yangiboyev kirish soʻzi bilan ochib, ushbu uchrashuvni tashkil qilishdan koʻzlangan maqsad haqida maʼlumot berdi. Shuningdek, bugungi kunda yurtimizda tadbirkorlik faoliyatini qoʻllab-quvvatlash maqsadida yaratilayotgan imkoniyatlar xususida alohida toʻxtaldi.

Tuman Iqtisodiy sudi raisi Oʻtkir Sobirov “Tadbirkorlik subʼektlarini huquqiy himoya qilish tizimini yanada takomillashtirish chora-tadbirlari toʻgʻrisida”gi Farmonining asosiy mazmuni haqida soʻzladi. Sud raisi taʼkidlab oʻtganidek, mazkur Farmon jamiyatni demokratlashtirish va yangilash, mamlakatni isloh qilish hamda modernizatsiyalash, sud-huquq tizimini yanada erkinlashtirish, nazorat organlarining tadbirkorlik subektlari faoliyatiga aralashuvini kamaytirish, ularning huquq va qonuniy manfaatlari himoya qilinishini taʼminlash, tadbirkorlik faoliyatining asossiz cheklanishiga yoʻl qoʻymaslik maqsadida qabul qilingan.

Ushbu qonun hujjatiga koʻra, tadbirkorlik subʼektlarining moliya-xoʻjalik faoliyatini tekshirish belgilangan tartibda davlat soliq xizmati organlari, ular tomonidan tekshirish davomida soliq va valyutaga oid jinoyat alomatlari aniqlangan taqdirda esa – Oʻzbekiston Pespublikasi Bosh prokuraturasi huzurida Iqtisodiy jinoyatlarga qarshi kurashish departamenti tomonidan amalga oshirilishi belgilangan. Shuningdek, sud raisi bugungi kunda mazkur Farmonga asosan, tadbirkorlik subektlariga huquqiy taʼsir choralarini qoʻllash bilan bogʻliq ishlar iqtisodiy sudlar tomonidan koʻrib chiqilayotganligi va ular boʻyicha tegishli qarorlar qabul qilinayotganligini ham qayd etib oʻtdi.

Mazkur Farmon mazmun-mohiyati yuzasidan yigʻilganlarning savollariga javoblar berilganidan soʻng, “Bankrotlik toʻgʻrisidagi” hamda “Korruptsiyaga qarshi kurashish toʻgʻrisida”gi Qonunlar xususida soʻz yuritildi.

Mutasaddilar “Bankrotlik toʻgʻrisidagi” ishlarni koʻrib chiqish tartibi haqida toʻxtalib, ushbu jarayonda jamoatchilikning oʻrni muhim ahamiyatga ega ekanligini taʼkidlashdi. Shu oʻrinda avvalo, har bir tadbirkor oʻz haq-huquqini bilishi lozimligini, buning uchun qonunlar, tegishli hujjatlar mazmun-mohiyatini oʻrganib borish zarurligini tushuntirishdi.

Soʻngra masʼullar “Korruptsiyaga qarshi kurashish toʻgʻrisida”gi Qonun haqida keng maʼlumot berib oʻtishdi. Ushbu Qonun hujjati 2017-yil 3-yanvar kuni qabul qilinib, 2019-yil 4-yanvar kunidan kuchga kirganligini, mamlakatimizda korruptsiyaga qarshi kurashish, ularga imkoniyat yaratib berayotgan sabab va omillarning oldini olish boʻyicha bir qator Qonun va qonun osti hujjatlari qabul qilinganligini aytib, bu boʻyicha batafsil tushunchalar berishdi. Qolaversa, korruptsiyaga qarshi kurashish sohasidagi davlat siyosatining asosiy yoʻnalishlari - aholining huquqiy ongi va huquqiy madaniyatini yuksaltirish, jamiyatda unga nisbatan murosasiz munosabatni shakllantirish, davlat va jamiyat hayotining barcha sohalarida bu illatning oldini olishga doir chora-tadbirlarni amalga oshirish ekanligini alohida taʼkidlashdi.

Aytish joizki, bunday uchrashuvlarni tashkil qilish mamlakatda qabul qilinayotgan huquqiy hujjatlarni aholi oʻrtasida targʻib qilish qonun ustuvorligini taʼminlashga, qolaversa, aholining huquqiy ongi va madaniyatini yuksaltirishga xizmat qiladi.

Charos Arslonova, tuman hokimligining Axborot xizmati.