Qonunchilik palatasi Spikeri oʻrinbosari tuman hududidagi aholi tomorqalari holati bilan tanishdi

Aholi tomorqalaridan samarali foydalanish, dehqon xoʻjaliklari, tomorqa yer egalari shaxsiy manfaatdorligi va masʼuliyatini oshirish borasidagi ishlarni oʻrganish maqsadida tumanimizga Oliy Majlis Qonunchilik palatasi Spikeri oʻrinbosari, Oʻzbekiston fermer, dehqon xoʻjaliklari  va tomorqa yer egalari kengashi raisi Aktam Hayitov tashrif buyurdi.

Kengash raisi Aktam Hayitov hamda kengashi huzuridagi fermer, dehqon xoʻjaliklari va tomorqa yer egalarini qoʻllab-quvvatlash jamgʻarmasi direktori Toʻlqin Sattorovlar Qoraqalpogʻiston  fermer, dehqon xoʻjaliklari va tomorqa yer egalari Kengashi raisi Quanish Nurimbetov, Qoraqalpogʻiston Pespublikasi Vazirlar Kengashi raisining oʻrinbosari, Mahalla va oilani qoʻllab-quvvatlash boʻlimi boshligʻi Sogʻindiq Turmanov, tuman hokimi Sultonboy Yoʻldashev hamda tuman fermer, dehqon xoʻjaliklari va tomorqa yer egalari Kengashi raisi Ilhom Polvonovlar hamrohligida hududdagi aholi tomorqalari holati bilan tanishdi.

Tumanda jami 32570 nafar tomorqa yer egalari mavjud boʻlib, ularda 5217,3 gektar ekin yerlari mavjud. Bu yil bahor mavsumida 4339,2 gektar yer maydonlariga ertaki ekinlar ekish rejalashtirilgan. Aholi tomorqalarida 2020-yil hosili uchun jami 878 gektar avgust-sentyabr piyoz va sarimsoq piyoz, 233 gektar kuzgi boshoqli don ekinlari ekilgan. Shuningdek, “Amudaryo tomorqa xizmat” MChJ tomonidan tomorqa yer egalarining ekin yerlariga motokultivatorlar, kimyoviy ishlov berish, mineral oʻgʻitlar, urugʻlar, mevali daraxt koʻchatlari yetkazib berish yoʻlga qoʻyilgan.

Aytish joizki, Prezident Sh.Mirziyoyev raisligida joriy yilning 8-aprel kuni koronavirus pandemiyasiga qarshi kurashishda joylardagi ishlar natijadorligi tahlili hamda oziq-ovqat xavfsizligini taʼminlash, aholi bandligi va daromadini oshirishning muhim manbai boʻlgan tomorqachilikni rivojlantirish masalalariga bagʻishlab oʻtkazilgan videoselektor yigʻilishida belgilangan vazifalar ijrosini taʼminlash maqsadida parlament aʼzolaridan iborat Ishchi guruhi tuzilgan edi. Endilikda hududlar, ayniqsa, qishloq xoʻjaligi sharoiti ogʻir boʻlgan tumanlarda ekinlar ekilishi ahvolini har oyda Ishchi guruh aʼzolari boʻlgan deputatlar va senatorlar tomonidan oʻrganiladi, aniqlangan muammo va kamchiliklarni bartaraf etish yuzasidan amaliy choralar koʻriladi.

Koronavirus pandemiyasi keltirib chiqarayotgan inqirozga qarshi kurashish sharoitida aholiga tomorqalaridan samarali foydalanishlariga har tomonlama koʻmaklashishni yoʻlga qoʻyish maqsadida tumanimizga tashrif buyurgan masʼullar Qilichboy va Doʻrman ovullaridagi aholi tomorqalarining ekilish holati bilan tanishib chiqdi. Masʼullar Boʻz solma mahallasida yashovchi Botir Arabovning tomorqa yer maydonida boʻlib, uning 50 sotix tomorqa yeri mavjudligini, 2 sotixli issiqxonasi borligini, tomorqada har xil sabzavotlar va boshqa poliz ekinlari ekilganligining guvohi boʻlishdi. Tashrif davomida masʼullar oʻz tomorqasidan samarali foydalanayotgan Qoramon mahallasidagi Yangiboy Sultonovning 40 sotixdan iborat yer maydonining 4 sotix qismida issiqxona tashkil qilganligini, 10 sotixga yaqin yerda mevali bogʻ barpo etganini va har xil sabzavotlar, poliz ekinlari ekilganini koʻrib, uni yanada rivojlantirish boʻyicha yoʻl-yoʻriqlar berib oʻtdilar. Shu mahallada yashovchi Norimbat Oʻrozmatovga ham tomorqasidagi 40 sotixga yaqin uzumzor bogʻni kengaytirish boʻyicha kerakli maslahatlar berdilar.

Masʼullar Bogʻ mahallasi hududidagi “Oʻrta qalʼa chorvadori” agrofirmasi rahbari Erkin Pasulov bilan ham uchrashishdi. Agrofirma rahbari Erkin Pasulov asalarichilikni rivojlantirish maqsadida Oʻzbekiston fermer, dehqon xoʻjaliklari va tomorqa yer egalari kengashi huzuridagi jamgʻarma hisobidan 1 mlrd. 200 mln. soʻm kredit olgan boʻlib, hozirgi kunda asalari uyasi 1000 taga yetkazildi. Shuningdek, 30 nafarga yaqin yoshlarni ish bilan taʼminlagan. Ishchi guruh aʼzolari agrofirma tomonidan amalga oshirilayotgan ishlar, shart-sharoitlar bilan yaqindan tanishib, mavjud muammo va kamchiliklar bilan qiziqdilar.

Ishchi guruh aʼzolari tuman masʼullariga aholiga oʻz tomorqasidan samarali foydalanishda har tomonlama koʻmaklashish, ekinlar ekilishi ahvolini muntazam oʻrganib borishni yoʻlga qoʻyish boʻyicha fikr-mulohazalarini bildirdi. Shuningdek, aniqlangan muammo va kamchiliklarni bartaraf etish yuzasidan amaliy choralar koʻrib borish, kam taʼminlangan va qarovchisi yoʻq oilalarga ilgʻor fermerlar biriktirish, tomorqa yerlariga ishlov berish, ekin ekish va parvarishlash boʻyicha yordamlashishni  ham tavsiya qildilar.

O. Xudoyberganova.