“Agrobank” koʻchatlar yetkazib berdi

Koronavirus pandemiyasi tufayli butun dunyoda joriy etilgan karantinning mamlakatimizda ham davlat iqtisodiyotiga, barcha sohalar rivojiga salbiy taʼsiri namoyon boʻlmoqda. Bunday sharoitda iqtisodiy barqarorlikni saqlash, karantin qoidalariga amal qilgan holda oziq-ovqat xavfsizligini taʼminlash hamda aholi bandligi, daromadini oshirishning muhim manbai sifatida ayni paytda tomorqachilikni rivojlantirishga alohida eʼtibor qaratilmoqda. Albatta, bugungi qaltis vaziyatda tomorqadan unumli foydalanish har qachongidan ham muhim.

Oliy Majlis Qonunchilik palatasi Kengashi tomonidan deputatlar ishtirokida boʻlib oʻtgan videokonferentsiya tarzidagi yigʻilishda ham koronavirus pandemiyasiga qarshi kurashishda karantin sharoitidan kelib chiqqan holda aholi xonadonlarida tomorqadan samarali foydalanish borasida targʻibot ishlarini olib borish masalalari muhokama qilindi. Aholiga zaruriy tavsiya va koʻmak berish, bu orqali esa roʻzgʻorining butligiga erishish, uy sharoitida tomorqasidagi mavjud imkoniyatlardan foydalanib, bandligini taʼminlash boʻyicha choralar ishlab chiqildi.

Tumanimizda ham bu borada tegishli tadbirlar yoʻlga qoʻyilib, amalga oshirila boshlandi. Belgilangan chora-tadbirlarni amalga oshirish va karantin tufayli markaz bozorlariga kelib-ketishiga cheklov qoʻyilgan chekka hududlarda yashovchi aholiga sabzavot va poliz ekinlari urugʻlari, koʻchatlar yetkazib berish maqsadida “Agrobank” tijorat banki tuman filiali tomonidan koʻchma doʻkon tashkil etildi. Karantin qoidalariga rioya qilgan holda dezinfektsiyalangan mashinalar aholi talablaridan kelib chiqib, 15 turdagi sabzavot va poliz ekinlarining urugʻliklari, 9 turdagi koʻchatlarni yetkazishni boshladi.

Koʻchma doʻkonlar orqali yetkazib berilayotgan urugʻliklar sifatliligi, bozorga nisbatan narxining arzonligi bilan aholiga juda manzur boʻlmoqda.

16-aprel kuni Qangi ovuliga ham ushbu koʻchma doʻkon orqali aholi tomorqalari uchun har xil navdagi 220 quti va 300 dona pomidor koʻchatlari,  350 dona bodring, 200 dona karam, 350 dona qovun-tarvuz, 150 dona handalak, 150 dona gurvak qovun koʻchatlari, 150 quti bulgʻor qalampiri, 120 quti baqlajon koʻchatlari hamda 50 pachkada har xil urugʻliklar yetkazib berildi. Ovul aholisi noqulay ob-havo tufayli nobud boʻlgan ekinlari oʻrniga koʻchirish va ekish uchun ayni paytda zarur boʻlgan sifatli urugʻlik va koʻchatlarni arzon narxlarda sotib olishdi. Karantin paytida kasallik tarqalishining oldini olish, oʻzlarining uyda qolishlarini taʼminlash, ogʻirini yengil qilish, qulaylik yaratish maqsadida tashkil etilgan ushbu imkoniyat uchun aholi tashabbuskorlarga, tuman mutasaddilariga oʻz minnatdorchiligini bildirdi.

Tumanimiz chekka hududlarida joylashgan ovullar aholisida tomorqadan unumli foydalanish, imkon qadar koʻp daromad olish borasida oʻziga xos tajriba tobora shakllanib bormoqda, desak aslo mubolagʻa boʻlmaydi. Bu borada Qilichboy, Holimbeg, Doʻrman, Toʻlqin, Oq oltin va Uyshin ovullari aholisining tomorqalarida amalga oshirilayotgan ishlar, tashkil etilayotgan issiqxonalar, yetishtirilayotgan sabzavotlar, mevali va mevasiz daraxtlar koʻchatlari va yaratilayotgan bogʻlarni ibrat qilib koʻrsatsa arziydi. Aholining koʻpchilik qismi tomorqasini daromad manbaiga aylantirib, yashash sharoitini yaxshilashga, turmushini obod qilishga erishdi. 

Yer yuzida hukm surayotgan ayni tahlikali sharoit sabab oʻrnatilgan karantin tartibi va cheklovlariga amal qilib kelayotgan tumanimiz aholisi shu kunlarda ham yon-atrofdagilarga oʻrnak boʻlib, ekin maydonini obod etishmoqda. Erta bahorda ekilgan va unib chiqqan sabzavot nihollarini ob-havo injiqliklaridan himoya qilib, yaxshi kunlar umidida parvarish qilishmoqda. Koʻchma doʻkon orqali aholiga urugʻlik va koʻchatlar yetkazib berish xizmati ham tomorqalarida ekish mavsumi tugagunga qadar davom ettiriladi.

O.Xudoyberganova.