“Amudaryo-Agroservis” MTP MChJ texnikalari mehnat unumdorligini oshirishda muhim oʻrin tutmoqda

Mamlakatimizda qishloq xoʻjaligining tezkor rivojlanishi va mamlakat oziq-ovqat xavfsizligini taʼminlash imkonini beruvchi qishloq xoʻjaligi mahsulotlari ishlab chiqaruvchilarga mexanizatsiya va servis xizmatlarini koʻrsatish tizimini takomillashtirish boʻyicha kompleks chora-tadbirlar amalga oshirilmoqda.

Pespublikada qishloq xoʻjalik texnikasini ishlab chiqarish, yetkazib berish va servis xizmati koʻrsatish hamda qishloq xoʻjaligi mahsulotlarini ishlab chiqaruvchilarga mexanizatsiya xizmatlari koʻrsatishning yagona oʻzaro bogʻlangan tizimining yaratilishi qishloq xoʻjaligi korxonalari, “Oʻzagroservis” AJ tashkilotlarining servis korxonalari va mashina-traktor parklarini qayta jihozlashni taʼminlash imkonini bermoqda.

Bugungi kunda tumanimizda faoliyat yuritayotgan qishloq xoʻjaligi mahsulotlarini ishlab chiqaruvchilarga mexanizatsiya va servis xizmatlarini koʻrsatayotgan “Amudaryo-Agroservis” MTP MChJ samarali faoliyat olib bormoqda.

Mazkur xizmat koʻrsatish tashkilotiga 2018-yilda tuman “Agrobank” tuman filiali tomonidan yangi qishloq xoʻjaligi texnikalarini sotib olish uchun 5 foizli imtiyozli kredit mablagʻi ajratilib, korxona qayta shakllantirildi. Tuman fermer xoʻjaliklariga mexanizatsiya va servis xizmatini koʻrsatish – korxonaning asosiy ish faoliyati boʻlib hisoblanadi.

Shuningdek, tashkilot tumandagi qishloq xoʻjaligi mahsulotlarini ishlab chiqaruvchilar yerlarini haydash, chizellash, chel olish, yerlarni tekislash, gʻalla oʻrish, paxta ekish, kultivatsiya qilish, qolaversa, MTP ustaxonasida chilangarlik hamda ishdan chiqqan qishloq xoʻjalik texnikalariga texnik xizmat koʻrsatish kabi faoliyatlar bilan shugʻullanadi.

Hozirda “Amudaryo-Agroservis” MTP MChJda Jumaboy Xoʻjamurodovning rahbarligidagi bosh hisobchi, kadrlar boʻlimi mutaxassisi, tokarlar, payvandchilar, chilangarlar, traktor va kombayn operatorlari, qorovullar jami 25 nafar ishchi xodimlar xizmat qilishmoqda.

Shu oʻrinda taʼkidlash kerakki, soʻnggi yillarda mamlakatimizda mazkur xizmat koʻrsatish faoliyatini yanada rivojlantirishga katta eʼtibor qaratildi. Oʻzbekiston Pespublikasi Prezidentining “Qishloq xoʻjaligi mahsulotlari ishlab chiqaruvchilarga mexanizatsiya va servis xizmatlarini koʻrsatish samaradorligini oshirish boʻyicha qoʻshimcha chora-tadbirlar toʻgʻrisida” hamda Vazirlar Mahkamasining "Qishloq xoʻjaligi texnikasini yetkazib berish va respublika mintaqalarida ularga servis xizmati koʻrsatish samaradorligini oshirishga doir qoʻshimcha chora-tadbirlar toʻgʻrisida”gi qarorlari ushbu xizmat koʻrsatish tizimining yanada takomillashishida muhim dasturilamal boʻlmoqda.

Ushbu qonun hujjatlari qishloq xoʻjaligi texnikasini bir maromda ishlab chiqarish va ishlab chiqarilayotgan qishloq xoʻjaligi texnikasini zamonaviy usullarini qoʻllagan holda sotishni tashkil etishni yaxshilash, sifatli servis xizmati koʻrsatish uchun qoʻshimcha shart-sharoitlar yaratish, shuningdek, shu asosda mahalliy qishloq xoʻjaligi mashinasozligi korxonalarining moliyaviy ahvolini barqarorlashtirish maqsadiga xizmat qilmoqda.

Yaratilayotgan shart-sharoit hamda imkoniyatlardan samarali foydalangan holda faoliyat olib borayotgan Amudaryo Agroservis MTP MChJga 2019-yilda “Uzagrolizing” tashkilotidan yuqori unumli Keys-4088 rusumli gʻalla oʻrish kombayni lizingga olib kelindi. Hozirda operatorlar Shuhrat Yoʻldoshev va Oʻktam Xoʻjamurodovlar boshqaruvidagi mazkur kombayn tuman fermer xoʻjaliklari dalalarida gʻalla yigʻim-terimida faol qatnashmoqda.

Charos Arslonova.