Amudaryoda 90-oʻrinli yangi MTT binosi qurilmoqda

Mamlakatimizda davom etayotgan koronavirus pandemiyasi tufayli koʻpgina faoliyat turlariga cheklovlar oʻrnatildi. Jumladan, Maktabgacha taʼlim tashkilotlarining ham faoliyati vaqtincha toʻxtatildi. Barcha hududlardagi bolalar dunyosiga xos bezatilgan, kichkintoylar yayrab-quvnab oʻsib-ulgʻayayotgan Maktabgacha taʼlim tashkilotlari binolari hozir kimsasiz. Biroq kasallik tarqalib ketishining oldini olish, jilovlashga erishish borasida mamlakatimizda koʻrilayotgan choralar tufayli yurtimizda sanitariya epidemilogik ahvol birmuncha yaxshilanmoqda.

Olib borilayotgan chora-tadbirlar tufayli kasallik bartaraf etiladigan, xalqimiz tinch-osoyishta hayotga qaytadigan kunlar umidida pandemiya sharoitida ham yurtdoshlarimiz ezgu niyatlar bilan mehnat qilishmoqda.

Toshyop ovulida Prezidentimizning qaroriga muvofiq Investitsiya dasturi asosida maktabgacha taʼlim tashkilotining 90-oʻrinli yangi binosi qurilishi jarayoni bilan tanishgan kishi buni sidqidildan his qilishi mumkin.

Davlatimizning ikki milliard olti yuz sakson besh million soʻmdan ziyod mablagʻi hisobiga qurilishi moʻljallangan binoni “Mangʻit Servis” masʼuliyati cheklangan jamiyati ishchilari bunyod etmoqda.

Ushbu obʼektda ayni kunlarda ovulning oʻttiz nafardan ziyod qoʻli gul usta yigitlari yoz jarizamasini ham pisand qilmay, mehnat qilishmoqda.

Obʼekt qurilish muddati 225 kunga moʻljallanganligi bois, ish unumi yuqori boʻlishi uchun quruvchilarga munosib sharoitlar yaratilgan boʻlib, tushlikda issiq ovqat, choy tashkil etilgan.

Hozirgi kungacha bino devorlari koʻtarilgan boʻlib, tomi beton plitalar bilan yopilayapti, deraza va eshiklariga zamonaviy romlar oʻrnatilayotir. Suvoq ishlariga ham kirishilgan boʻlib, jami 5 ta brigada quruvchilari inshootni oʻz muddatida, sifatli qurib bitkazishga harakat qilishmoqda.

Shunisi eʼtiborliki, Toshyop ovuli aholisi hududda shu vaqtgacha davlat Maktabgacha taʼlim tashkiloti yoʻqligidan,  yosh bolali onalar ishlashi uchun farzandlarini olis hududlardagi Maktabgacha taʼlim tashkilotlariga olib borishidan aziyat chekishar edi. Endilikda ovulning markazida qad rostlayotgan 90 nafar kichkintoylarga taʼlim-tarbiya berishga moʻljallangan bolalar maskani binosi ularga cheksiz quvonch bagʻishlamoqda.

Koʻzga koʻrinmas yov  - tojdor virusga qarshi olib borilayotgan umumxalq kurashi samara berib, yurtimizda tinchlik-osoyishtalik hukm suradigan damlar ham oz qolganiga umid qilamiz. Shunday damlarda Toshyopda qurilishi davom etayotgan mana bu davlat Maktabgacha taʼlim tashkiloti binosi ham muhtasham koʻrinishda, ovulning kichkintoy oʻgʻil-qizlarini oʻz bagʻriga chorlaydi, bolajonlarning yayrab-quvnab oʻsib-ulgʻayishlari uchun munosib sharoitlar yaratiladi.

Bu kabi ishlar mamlakatimizda bolajonlarni maktabgacha taʼlim tashkilotlariga toʻliq qamrab olish maqsadida amalga oshirilayotgan islohotlarning amaliy namunasidir. Bolajonlarimizni bogʻchaga toʻliq qamrab olish esa ularning maktabga tayyor holda borishiga, oʻz navbatida maktabda aʼlo baholarga oʻqib, yurtimiz taraqqiyotiga munosib hissa qoʻshadigan barkamol avlod boʻlib voyaga yetishiga xizmat qiladi.

Oygul PAJABOVA