Xalq deputatlari Amudaryo tuman Kengashining 12-sessiyasi toʻgʻrisida AXBOROT

Joriy yilning 19-avgust sanasida tuman hokimligining majlislar zalida Xalq deputatlari Amudaryo tuman kengashining navbatdagi 12-sessiyasi boʻlib oʻtdi. Sessiya majlisida Xalq deputatlari tuman Kengashi deputatlari, tuman hokimi oʻrinbosarlari, hokimlik masʼul xodimlari, huquq-tartibot organlari, boʻlimlar rahbarlari hamda ommaviy axborot vositalari vakillari ishtirok etdilar. Sessiya ishini tuman hokimi Sultonboy Yoʻldashev ochdi hamda olib bordi.

Sessiya kun tartibida qator masalalar muhokama qilindi. Xususan, kun tartibidagi dastlabki masala tuman Tibbiyot birlashmasi boshligʻining karantin talablari bosqichma-bosqich yumshatib borilishi munosabati bilan fuqarolar sanitariya talablariga qatʼiy rioya etishlari zarurligi, aholiga birlamchi tibbiy-sanitariya yordamining oʻz vaqtida yuqori va sifatli koʻrsatilishi yuzasidan tuman aholisiga murojaati tinglandi.

Murojaatda keltirilganidek, oʻtgan oylar davomida tumanimizda koronavirus infektsiyasi bilan bogʻliq epidemiyalogik vaziyatni yumshatish, aholiga tibbiy xizmat koʻrsatish sifatini oshirish va davolash joylarini kerakli dori-darmonlar bilan taʼminlash hamda birlamchi tibbiy-sanitariya muassasalarining ish faoliyatini yaxshilash boʻyicha bir qator ishlar amalga oshirilmoqda. Tumanda infektsiyadan zararlangan bemorlarning davolanishi uchun 100-oʻrinli boʻlimlar tashkil qilinib, zarur dori-darmon, asbob-uskunlari, tibbiyot xodimlari bilan toʻliq taʼminlandi. Shuningdek, tumanimizda koronavirus infektsiyasi bilan kasallanganlar soni oshib ketgan holatda, bemorlarga tegishli tibbiy yordam koʻrsatish uchun qoʻshimcha 150-oʻrinli karantin muassasasi tashkil etilgan. Xalqimizga sifatli va tez tibbiy yordam koʻrsatish maqsadida 15 dona tez tibbiy xizmat koʻrsatish avtomashinalari hamda COVID-19 belgilari boʻlgan fuqarolarni maxsus shifoxonalarga yotqizish boʻyicha 13 ta mobil guruh ish olib bormoqda.

Murojaat soʻnggida joriy etilgan karantin qoidalariga qatʼiy rioya qilishlari kerakligi aholi oʻrtasida doimiy ravishda targʻib qilib borilishi lozimligi hamda pandemiyani yengishga barcha birdek hissa qoʻshishi muhim ahamiyatga ega ekanligi taʼkidlandi.

Sessiya kun tartibidagi navbatdagi masala – huquqbuzarliklarning oldini olish va ularning profilaktikasi holati yuzasidan tuman Ichki ishlar boʻlimi boshligʻi oʻrinbosari, huquqbuzarliklar  profilaktikasi boʻlinmasi boshligʻining hisobotida taʼkidlanganidek, tumanda siyosiy-ijtimoiy muhitni barqarorlashtirish, jinoyatchilikka qarshi kurashish, huquqbuzarliklarning oldini olish, huquq-tartibot hamda fuqarolar xavfsizligini taʼminlash, diniy ekstremizm va uning turli koʻrinishlariga qarshi kurash borasida samarali ishlar qilinmoqda.

Tuman mahalla va oilani qoʻllab-quvvatlash boʻlimi tomonidan davlat organlari, jamoat tashkilotlari bilan birgalikda notinch va muammoli oilalarni aniqlash, maʼnaviy-axloqiy muhitni sogʻlomlashtirish, nizoli holatlarning oldini olish, oilaviy munosabatlarni hamda reproduktiv salomatlikni mustahkamlash borasida amalga oshirilayotgan ishlar toʻgʻrisidagi masala – kun tartibidagi navbatdagi masala boʻlib, u xususda tuman Mahalla va oilani qoʻllab-quvvatlash boʻlimi boshligʻining birinchi oʻrinbosari soʻz yuritdi.

Hisobotda keltirilishicha, tumanda xotin-qizlar oʻrtasida huquqbuzarliklarning barvaqt oldini olish borasida, birinchi navbatda, huquqbuzarlikka moyilligi boʻlgan 17 nafar ayol-qizlar, jazoni ijro etish muassasalaridan ozod qilingan 2 nafar xotin-qizlarning ijtimoiy reabilitatsiyasi va moslashishi boʻyicha yakka tartibda ish olib borilgan. Shu davrga qadar chet davlatlarga chiqib ketgan ayol-qizlarning 296 nafari qaytib kelgan boʻlib, ulardan 143 nafarining bandligi taʼminlangan. Shuningdek, boʻlim mutasaddilari tomonidan Ichki ishlar boʻlimining roʻyxatiga olingan 15 ta oila bilan tushuntirish ishlari hamda yakka suhbatlar oʻtkazilgan. Natijada  ushbu oilalar aʼzolari murosaga keltirilgan, 9 tasining notinchligiga barham berilgan. Boʻlim xodimlarining samaralali faoliyati tufayli tumandagi ajrim yoqasiga kelib qolgan 52 ta oilalarning 36 tasi yarashtirilgan.

Sessiya majlisida shundan soʻng, navbatdagi – tumanda Oʻzbekiston Respublikasi Prezidenti tomonidan koronavirus pandemiyasiga doir qabul qilingan Farmon va Qarorlarda belgilangan vazifalarning ijrosi xususidagi masala muhokamasiga oʻtildi. Ushbu masala yuzasidan tuman hokimi oʻrinbosari, investitsiyalar va tashqi savdo boʻlimi boshligʻining hisoboti tinglandi.

Hokim oʻrinbosari oʻz hisobotida tumanda investorlarni jalb qilish, investorlar uchun yaratilayotgan qulay sharoitlar hamda investitsiya loyihalarini amaliyotga tadbiq qilish boʻyicha koʻrilayotgan chora-tadbirlar, investitsiya dasturlarining bajarilish holati, toʻqimachilik va tikuv-trikotaj mahsulotlarini yetkazib berish borasida amalga oshirilgan chora-tadbirlar xususida soʻz yuritdi.

Sessiya kun tartibiga kiritilgan barcha masalalar muhokama qilinib, koʻrib chiqildi hamda tegishli qarorlar qabul qilindi.

Tuman hokimligi Axborot xizmati.