Oʻzbekiston Fermer, dehqon xoʻjaliklari va tomorqa yer egalari Kengashi raisi A.Hayitov Amudaryo tumanida boʻldi

19-sentyabr kuni Oʻzbekiston Fermer, dehqon xoʻjaliklari va tomorqa yer egalari Kengashi raisi Aktam Hayitov tumanimizda boʻlib aholi tomorqalaridan samarali foydalanishni tashkil etish boʻyicha amalga oshirilayotgan ishlar bilan tanishish maqsadida Amudaryo tumaniga tashrif buyurdi.

Amudaryo tumanida har yili aholi tomorqasidan unumli foydalanish maqsadida erta bahordanoq serhosil urugʻlik navlarini tanlash, bogʻ-rogʻlar barpo etishda mevali daraxt koʻchatlarini saralash va ekish ishlariga alohida ahamiyat qaratiladi. Joriy yilda ham tomorqa ekinlaridan yuqori hosil olishni koʻzlagan tomorqa yer egalari astoydil mehnat qilib, tuman fermer, dehqon xoʻjaliklari va tomorqa yer egalari Kengashi tomonidan berilgan tavsiyalar asosida ekin ekib, “Har bir qarich yer boʻsh qolmasin!” shiori ostida tomorqani daromad manbaiga aylantirdilar.

Tumanimizda yerdan unumli foydalanib, bu borada katta natijalarni qoʻlga kiritayotgan, yuqori hosil va moʻl daromad olayotgan omilkor dehqonlar tajribasini oʻrganish, tomorqa maydonlariga bozorbop ekinlar ekilishini tashkil qilish, bu yilgi murakkab vaziyatni hisobga olgan holda tomorqada 2-3-marta hosil yetishtirish, xonadonlarda ixcham issiqxonalar qurish, bir vaqtning oʻzida tomorqa xoʻjaligida nafaqat dehqonchilik, asalarichilik va xonadon chorvachiligi kabi yondosh sohalarni ham rivojlantirish boʻyicha olib borilayotgan ishlar eʼtiborga molik. Bugungi kunda amudaryolik tomorqachilar nafaqat tumanimiz, balki qoʻshni tumanlar aholisi uchun ham moʻl-koʻl dehqonchilik mahsulotlari yetkazib berishmoqda.

Joriy yilning 19-sentyabr sanasida Oʻzbekiston Fermer, dehqon xoʻjaliklari va tomorqa yer egalari Kengashi raisi Aktam Hayitov tumanimizda boʻldi. Mehmon aholi tomorqalaridan samarali foydalanishni tashkil etish masalasida “Amudaryo tomorqa xizmat” masʼuliyati cheklangan jamiyati faoliyatini koʻzdan kechirdi.

Xususan, aholi tomorqalarida ixcham issiqxonalar qurish, oila chorvasi, ayniqsa, asalarichilik va parrandachilikni rivojlantirish maqsadida bank kreditlarini ajratish, ajratilgan kreditlardan maqsadli foydalanish holatlari oʻrganildi.

Oʻzbekiston fermer, dehqon xoʻjaliklari va tomorqa yer egalarini qoʻllab-quvvatlash jamgʻarmasi direktori Toʻlqin Sattorov, Qoraqalpogʻiston Respublikasi Fermer, dehqon va tomorqa yer egalari Kengashi raisi Quanish Nurimbetov, tuman hokimi Sultonboy Yoʻldashev hamda tuman Fermer, dehqon xoʻjaliklari va tomorqa yer egalari Kengashi raisi Ilhom Polvonovlar hamrohligida mehmonlar “Oʻrta qalʼa chorvadori” agrofirmasi faoliyati bilan yaqindan tanishdi.

Agrofirma rahbari Erkin Rasulov oʻtgan 2019-yilda 1 mlrd 200 mln soʻmlik bank krediti, Fermer, dehqon xoʻjaliklari va tomorqa yer egalarini qoʻllab-quvvatlash jamgʻarmasi mablagʻlari hisobidan asalarichilik tarmogʻini yoʻlga qoʻydi. Aktam Hayitov agrofirmada amalga oshirilayotgan ishlar bilan tanishar ekan, agrofirma rahbariyati va ishchilari erishayotgan yutuqlar, aholi dasturxoniga yetishtirib berilayotgan asal mahsulotlarining sifatiga yuqori baho berdi. Erkin Rasulov kredit mablagʻlaridan samarali foydalanish evaziga faqat 2020-yil mavsumida 2 tonnadan ortiq yuqori sifatli asal yetishtirib, 90 mln soʻm sof foyda koʻrdi. Shuningdek tadbirkor asalarichilik tarmogʻini tashkil etishni rejalashtirgan tomorqa yer egalariga shartnoma asosida 655 quti asalari uyalarini yetkazib berdi.

Aktam Hayitov agrofirma ishchilari uchun ajratilgan shart-sharoitlar, ularning oylik ish haqlari darajasi ham yaxshi ekanligini qayd etar ekan amudaryolik qishloq xoʻjaligi tadbirkorlarining ishlarini ommalashtirish, ayniqsa asalarichilikni yanada istiqbolli sohaga aylantirishda yoshlarning faol ishtirokini taʼminlash yuzasidan masʼullarga zarur tavsiyalar berdi.

Robiya Yoʻldosheva.