Oʻzbekiston Respublikasi Fermer, dehqon xoʻjaliklari va tomorqa yer egalari Kengashi raisi Aktam Haitov Amudaryo tumanida boʻldi

4-noyabr kuni Oʻzbekiston Respublikasi Fermer, dehqon xoʻjaliklari va tomorqa yer egalari Kengashi raisi Aktam Haitov tomorqa yer egalarining faoliyati bilan yaqindan tanishish va ularni qiynayotgan muammolarni oʻrganish, hal qilishda amaliy yordam berish maqsadida tumanimizga tashrif buyurdi.

Oʻzbekiston Respublikasi Fermer, dehqon xoʻjaliklari va tomorqa yer egalari Kengashi raisi Aktam Haitov tumandagi soha masʼullari hamrohligida dastlab Toʻlqin ovulidagi tomorqalar holatini koʻrish va yer egalari bilan suhbatlashish maqsadida hududga tashrif buyurdi. Mehmonlar dastlab ovuldagi tajribali dehqon Oʻrozimbat Kamolovning tomorqasida boʻlib, tomorqa yer egasining yerdan samarali foydalanayotganiga guvoh boʻldilar.

Oʻrozimbat Kamolov tomorqasida turli sabzavot mahsulotlarini yetishtirib, tumanimiz bozorini toʻldirishga hissa qoʻshayotgan dehqonlardan biri. Qolaversa, ovulda mevali daraxtlar ekib, yurtdoshlarimiz dasturxonini har xil mevalar bilan toʻldirayotgan bogʻbon Farhod Boboniyozov ham 1 gektar yer maydonida toʻqsonbosti ekinlar ekib, parvarish qilmoqda. Aytish kerakki, yerdan unumli va oqilona foydalanish dehqonchilikda muhim ahamiyat kasb etadi. Oʻz ishining ilmini olgan dehqon borki, albatta, bu jihatning samarasini yaxshi biladi. Buni bilgan har bir dehqon yerni boʻsh qoldirmaslik, mavsumiy va iqlim sharoitiga mos ekinlar ekib, takroriy hosil olish harakatida boʻladi.

Shundan soʻng, masʼullar Kuyuk koʻpir ovulidagi Sardor Sobirov fermer xoʻjaligida yerlarni lazer uskunasi vositasida tekislashning afzalliklarini koʻrsatish boʻyicha tashkil qilingan seminarda ishtirok etdilar. Seminar ishtirokchilariga lazer uskunasi yordamida yerni tekislash natijasida suvning tejalishi, hosildorlikning oshishi aniq raqamlar misolida tushuntirilib, bu usulni amaliyotga keng joriy etish boʻyicha olib borilayotgan ishlar haqida maʼlumotlar berildi.

Ushbu usulda tekislangan ekin maydonlarini sugʻorishda 25 foizgacha suvni tejash va hosildorlikni 10 foiz oshirish amaliyotda isbotlangan. Tumanimiz sharoitimizda esa bu juda yaxshi koʻrsatkich. Boisi, ekin maydonlaridagi baland-pastlik ayrim dalalarda 50 santimetrgacha farq qiladi. Bunday sharoitda ekin bir tekis qonib suv ichmaydi, hosildorlik kutilganidan ancha kam va suv sarfi juda yuqori boʻladi. Koʻrgazmali seminarda ushbu texnologiyani qoʻllash orqali suvdan oqilona foydalanish, hosildorlikni sezilarli darajada oshirish bilan birga, tuproq shoʻrlanishining oldini olishga ham erishilishi taʼkidlab oʻtildi.

Aktam Haitov Oʻzbekiston Respublikasi Prezidentining “Aholi tomorqalaridan foydalanish samaradorligini oshirishning qoʻshimcha chora-tadbirlari toʻgʻrisida”gi Qarori ijrosini taʼminlash borasida amalga oshirilayotgan ishlarni oʻrganish maqsadida “Amudaryo tomorqa xizmat” masʼuliyati cheklangan jamiyatida ham boʻldi. Tumanimizda tomorqa yerlardan unumli foydalanish, tomorqani haqiqiy daromad manbaiga aylantirishga katta hissa qoʻshayotgan ushbu jamiyat tomonidan bugungi kunda samarali faoliyat olib bormoqda.

“Amudaryo tomorqa xizmat” masʼuliyati cheklangan jamiyati tomonidan bugungi kunda tomorqachilik klasteri tashkil etishni loyihalashtirish ishlari toʻligʻi bilan yakunlangan boʻlib, jamiyatning ustav fondi 3 mlrd. 800 mln. soʻmni tashkil qiladi. Tuman hokimi qarori bilan jamiyatga urugʻ, koʻchat va mineral oʻgʻit sotish doʻkonlari hamda issiqxona qurish uchun 3,3 gektar yer maydoni ajratib berilgan.

Oʻzbekiston Respublikasi Fermer, dehqon xoʻjaliklari va tomorqa yer egalari Kengashi raisi Aktam Haitov Oʻrta qalʼa ovuli xududidagi “Oʻrta qalʼa chorvadori” agrofirmasidagi asalarichilikni rivojlantirish borasida amalga oshirilayotgan ishlar bilan ham tanishdi.

Bogʻ mahallasi hududida joylashgan mazkur agrofirmada tadbirkor va fermer Erkin Rasulov boshchiligida tuman qishloq xoʻjaligining asalarichilik tarmogʻi yanada rivojlantirilishiga hissa qoʻshilayotir. Ushbu agrofirmani tashkil qilish uchun Erkin Rasulov Oʻzbekiston fermer, dehqon xoʻjaliklari va tomorqa yer egalari Kengashi huzuridagi jamgʻarma hisobidan 1 mlrd. 200 mln. soʻm kredit oldi. Hozirda agrofirmada 1000 ta asalari uyasi mavjud. Asalarichilik agrofirmasining tashkil qilinishi bilan tumandagi 30 nafarga yaqin yoshlarning bandligi taʼminlandi.

 Tumandagi qishloq xoʻjaligi sohasida amalga oshirilayotgan ishlar bilan tanishgan Aktam Haitov soha masʼullari va dehqon, fermerlarga zarur tavsiyalar hamda koʻrsatmalar berdi.

Charos Arslonova.