“MOHIDIL ShIFO MED” KLINKASIDA XALQARO DIABETGA QARShI KURASh KUNIGA BAGʻIShLAB XAYRIYa TADBIRI OʻTKAZILDI

Har yili 14-noyabr sanasi butun jahonda «Xalqaro diabetga qarshi kurash kuni” sifatida nishonlanib kelinadi hamda qandli diabet kasalligiga qarshi kurashga bagʻishlangan turli xil tadbirlar oʻtkaziladi. Ushbu kun insulin gormonini sunʼiy tarzda ajratib olgan va insulinoterapiyaga asos solgan Frederik Bantingning tavallud topgan kuni boʻlib, 1991-yilda Xalqaro diabet federatsiyasi va Jahln sogʻliqni saqlash tashkiloti hamkorligida alohida kun sifatida belgilangan. Frederik Bantingning kashfiyoti qandli diabet kasalligini toʻla davolash imkonini bermasa ham, kasallikni nazorat qilishga hamda kasallikka chalingan koʻplab insonlarning hayotini saqlab qolishga xizmat qilib kelmoqda.

Ushbu sana munosabati bilan 14-noyabr kuni tumanimizda ham “Mohidil Shifo med” xususiy klinikasida xayriya tadbiri oʻtkazildi. Klinika tomonidan qandli diabetga qarshi kurash kuni munosabati bilan tibbiy koʻrikdan oʻtkazish xizmati bepul tashkil etilishi oldindan maʼlum qilinganligi sababli ushbu kasallikka chalingan bemorlar tahlil topshirish maqsadida ertalabdan tashrif buyurdilar. Klinikaning tajribali hamda malakali shifokorlari barcha bemorlardan tahlil namunalarini olib, qandli diabet kasalligiga chalinganlik holatini aniqlashdi.

Tahlil natijalariga koʻra, 113 nafar qandli diabet kasalligi aniqlangan hamyurtlarimizga klinika tomonidan dori vositalari hamda vitamin preparatlari berildi. Kasallikka qarshi kurashda samarali boʻlgan “Trombo ASS”, “Glibenklamid”, “Vitazef”, “Zefak” kabi preparatlar bemorlarga bepul tarqatildi. Shu kuni klinikada barcha xizmatlar xayriya tarzida bepul amalga oshirildi. Klinika mudirasi Zulxumor Mamatqulova tashabbusi bilan oʻtkazilgan  mazkur tadbirda klinikaning jonkuyar shifokorlari Nargiza Yoʻldosheva, Muborak Nurimbetova, Zumrad Yernazarova, Zamira Yeshimbetovalar bu ishlarda jonbozlik koʻrsatdilar.

Shuningdek, klinikaning malakali shifokorlari bemorlarga kasallikni qanday nazorat qilish kerakligi borasida muhim tavsiyalar berdilar. Tadbir davomida boʻlib oʻtgan muloqot davomida bemorlarni qiziqtirgan savollarga javoblar berildi. Shuningdek, shifokorlar sogʻlom turmush tarzini shakllantirish lozimligi, bunda toʻgʻri ovqatlanishning ahamiyati, yurak qon-tomir kasalliklari, qandli diabet kabi yuqumli boʻlmagan kasalliklar butun dunyoda nogironlik darajasi ortishiga va bevaqt oʻlimlar soni koʻpayishiga sabab boʻlayotgani toʻgʻrisida gapirib, har qanday kasallikning oldini olish – davolashdan koʻra samarali ekanligini taʼkidlashdi. Bu kasalliklarni yuqori qon bosimi, tamaki va alkogol mahsulotlarini haddan tashqari koʻp isteʼmol qilish, qondagi xolesterinning yuqori darajasi, ortiqcha tana vazni, meva va sabzavotlarni yetarlicha isteʼmol qilmaslik va jismoniy faollikning sustlashishi kabi xavfli omillar keltirib chiqarishi tushuntirilib, qandli diabet va uning asoratlari, davolash usullari haqida tushunchalar berildi.

Charos Arslonova.