QIShLOQ XOʻJALIGINI RIVOJLANTIRIShGA BAGʻIShLANGAN KOʻRGAZMALI SEMINAR OʻTKAZILDI

Mamlakatimizda qishloq xoʻjaligini rivojlantirishga qaratilayotgan eʼtibor sohada amalga oshirilayotgan islohotlarda oʻz ifodasini topmoqda. Ayniqsa, tarmoqlar boʻyicha jahon andozalariga mos innovatsion loyihalarni tatbiq etish, qishloq  xoʻjalik klasterlarini rivojlantirish, chorvachilik va meva-sabzavotchilik yoʻnalishlarida kooperativlar tashkil etish, pirovardida agrar sohani qishloq xoʻjalik mahsulotlarini yetishtiruvchi – ishlab chiqaruvchi – qayta ishlovchi tizimga aylantirish borasida keng qamrovli ishlar amalga oshirilmoqda. Bunda toʻrtta sektor kesimida soha taraqqiyotini jadallashtirish boʻyicha belgilangan rejaviy tadbirlar asosidagi oʻquv-seminarlari hamda koʻrgazmali seminarlar muhim ahamiyatga ega.

Joriy yilning 17-noyabr sanasida tumanimizda qishloq xoʻjaligi va chorvachilik sohasida amalga oshirilayotgan islohotlar hamda sohani rivojlantirishga qaratilgan asosiy vazifalarga bagʻishlangan koʻrgazmali seminar oʻtkazildi. Koʻrgazmali seminar ishida  tumanimizdagi toʻrtta sektor rahbarlari, qishloq va suv xoʻjaligi masalalari boʻyicha tuman hokimining oʻrinbosarlari, tuman qishloq xoʻjaligi boʻlimi, suv xoʻjaligi boʻlimi va tijorat banklari rahbarlari, barcha fermer xoʻjaliklari, klaster korxonalari rahbarlari hamda koʻrgazmali seminar kun tartibidagi masalaga aloqador tegishli tashkilotlar rahbarlari ishtirok etdilar.

Kun tartibidagi asosiy masalani ishtirokchilarga toʻliq yetkazish maqsadida ushbu koʻrgazmali seminar koʻchma ravishda oʻtkazildi. Avvalo ishtirokchilarga tuman qishloq xoʻjaligi korxonalari tomonidan kuzgi-qishgi dala ishlarini samarali tashkil etish boʻyicha amalga oshirilishi lozim boʻlgan muhim va dolzarb vazifalar yuzasidan soha masʼullari zarur tavsiyalar berdilar. Shundan soʻng, Mangʻit MMTP hududidagi “Rasulov Erkin asalchi” fermer xoʻjaligida ekinlarni tomchilatib sugʻorish tizimini joriy etish maqsadida mazkur fermer xoʻjaligi dalalari boshida hovuz-tindirgichlar qurish ishlarining holati koʻzdan kechirildi. Shu barobarida ekinlarni tomchilatib sugʻorish texnologiyasining afzalliklari, samaradorligi hamda ishchi va texnika kuchidan foydalanishdagi tejamkorlik jihatlari koʻrgazmali vositalar orqali batafsil koʻrsatib berildi. Shu bilan birga tomchilatib sugʻorish orqali hosildorlikning oshishi, tejaladigan mablagʻ va ishlab chiqarish kuchlari xususida mutaxassislar aniq hisob-kitoblar boʻyicha maʼlumotlar berishdi.

Koʻrgazmali seminar tumandagi Doʻstlik MMTPda qizgʻin va ishchanlik ruhida davom etdi. MMTP hududidagi Navroʻzbek Boltaboyev rahbarligidagi fermer xoʻjaligida seminar ishtirokchilariga lazerli yer tekislash amaliyoti, shuningdek, ushbu usulda tekislangan yerning suvni tejashdagi samarasi maxsus texnika vositalari orqali koʻrsatildi. Agar lazerli yer tekislash agregatlari yordamida ekin yerlari ekishga tayyorlansa, ayniqsa, bahorgi ekish mavsumida yerda namlik yetarli darajada saqlanishi hamda urugʻning bexato unib chiqishi taʼminlanadi. Ayniqsa, gʻoʻza parvarishida suvdan rejali foydalanish imkoni yaratiladi.

Koʻrgazmali seminarda qishloq xoʻjaligi texnikalarini qish mavsumida ustaxonalarga yigʻish va taʼmirlash ishlarini olib borish boʻyicha amaliy tadbirlar ham namoyish etildi. Doʻstlik MMTP ustaxonasida davom etgan koʻrgazmali seminar qishloq xoʻjalik texnikalarini MMTP ustaxonasiga olib kelib, turi va rusumiga monand safga tizish, kamchiliklarini aniqlash, shu bilan birga taʼmirlash ishlarini olib borish ishlari amalda koʻrsatib  berildi.

Boʻlib oʻtgan koʻrgazmali seminar jarayonida fermer xoʻjaliklari rahbarlari tomonidan tushgan sohaga oid  savollarga masʼul mutasaddilar tomonidan javoblar berildi. Mazkur koʻrgazmali seminar orqali ishtirokchilar sohada yuz berayotgan yangiliklar va oʻzgarishlardan xabardor boʻldilar, shu bilan birga oʻzaro fikrlashib, tajriba almashdilar.

Robiya YOʻLDOShEVA.