OʻZBEKISTONNING DAVLAT BAYROGʻI QABUL QILINGAN KUN MUNOSABATI BILAN TADBIRLAR OʻTKAZILDI

Oʻzbekistonning davlat ramzi boʻlgan bayrogʻimiz qabul qilingan 18-noyabr sanasi har yili bayram sifatida keng nishonlab kelinadi. Taʼlim-tarbiya maskanlarida oʻquvchi yoshlarimizni istiqlolning qadriga yetish, davlat razmlariga nisbatan hurmat tuygʻusini shakllantirish, yoshlarni milliy va umuminsoniy qadriyatlarga hurmat ruhida tarbiyalashga yoʻnaltirilgan turli tadbirlar tashkil qilinadi.

Tuman XTBga qarashli 82-sonli umumtaʼlim maktabida 18-noyabr kuni oʻtkazilgan maʼnaviy-marifiy tadbir ham shu maqsadlarni amalga oshirishga xizmat qildi. Tadbirda davlat ramzlari har bir yurtning dunyoda borligini namoyon etuvchi belgi ekanligi, ramzlarning mamlakatning dunyo siyosiy hayotidagi oʻrnini belgilashdagi ahamiyati xususida soʻz yuritildi.

Shuningdek, Oʻzbekiston bayrogʻi faqatgina Oʻzbekiston Respublikasi davlat ramzi emas, u shu yurtda tugʻilib, shu zaminda yashayotgan barcha el-elatlarning tinchlik va ahillik timsoli ekanligi, qalblarni qalblarga yaqinlashtiradigan, dillarni dillarga ulaydigan vositaga aylanganligi, dunyoning qaysi burchagida boʻlmang, bu bayroq qadrdon ona Vatanni yodga solishi alohida taʼkidlandi.

“Bayrogʻim – iftixorim” deya nomlangan mazkur tadbirda maktabning 6-7-8-sinflar oʻquvchilari faol ishtirok etdilar. Oʻquvchilar tomonidan davlat ramzlarqri, mustaqillik, vatan haqida ajoyib sheʼrlar aytildi. Istiqlolni, Vatanni, tinchlikni madh etuvchi kuy-qoʻshiqlar yangradi.

Ushbu sana munosabati bilan tashkil qilingan tadbir doirasida maktab oʻquvchilari oʻrtasida “Insholar tanlovi”, “Rasmlar tanlovi”, “Bahr-u bayt” kabi bellashuvlar oʻtkazildi. Mazkur bellashuvlarda oʻquvchilar oʻzlarining iqtidor va qobiliyatlarini namoyish etdilar hamda bilimlarini sinovdan oʻtkazdilar.  Tanlovlarda oʻquvchilarning ishtiroklari munosib baholanib, gʻolib va sovrindorlar taqdirlandilar. Xususan, “Insholar tanlovi” boʻyicha faxrli birinchi oʻrinni 7-”A” sinf oʻquvchisi Iroda Erdosheva, ikkinchi oʻrinni 6-“A” sinf oʻquvchisi Suhrob Rustamov, uchinchi oʻrinni 8-“A” sinf oʻquvchisi Gulnura Januzakovalar egalladilar.

Shuningdek, “Rasmlar tanlovi” boʻyicha birinchi oʻrin 7-“A” sinf oʻquvchisi Kamron Mambatsoliyevga, “Bahr-u bayt” bellashuvida gʻoliblik 8-“A” sinf oʻquvchisi Ruhshona Adamboyevaga nasib qildi. Gʻoliblar maktab maʼmuriyati tomonidan faxriy yorliq hamda esdalik sovgʻalari bilan taqdirlandilar.

Shu oʻrinda aytish kerakki, tumanimizda bilimga chanqoq, intiluvchan, iqtidorli, kitob oʻqishga mehri baland boʻlgan oʻquvchi yoshlarimiz juda koʻpchilikni tashkil qiladi. Ayniqsa, yoshlarimizning kitob oʻqishga boʻlgan qiziqishlari kundan kunga ortib bormoqda. Kitobsevar yoshlarimiz darsdan boʻsh vaqtlarini kitob mutolaa qilishga sarflamoqdalar.

Yoshlar orasida kitobxonlikni keng targʻib qilish maqsadida tashkil qilinayotgan barcha tanlovlarda tumanimiz yoshlari ham faol ishtirok etib kelmoqdalar. Xususan, “Dono” nashriyoti tomonidan oʻtkazilgan kitobxonlik tanlovida tuman XTBga qarashli 76-sonli umumtaʼlim maktabining kitobsevar oʻquvchilaridan iborat “Amu yoshlari” guruhi faol qatnashdilar. Uzoq va murosasiz baxslarda “Amu yoshlari” jamoasi oʻzlarining badiiy adabiyotga boʻlgan qiziqishlarini, adabiy asarlardan olgan bilimlarini toʻla namoyon etdilar hamda tanlovning Qoraqalpogʻiston Respublikasi bosqichida faxrli 2-oʻrinni egalladilar. Tumanimiz kitobsevar yoshlarining qoʻlga kiritgan yutuqlari bir qancha qiziqarli kitoblar jamlanmasi bilan ragʻbatlantirildi.

18-noyabr – Oʻzbekiston bayrogʻi qabul qilingan kun munosabati bilan maktabda tashkil qilingan “Bayrogʻimiz – faxrimiz” nomli tadbirda gʻoliblikni qoʻlga kiritgan “Amu yoshlari” jamoasi tuman XTB tomonidan ajoyib kitoblar va esdalik sovgʻalari bilan taqdirlandilar. Tuman XTBning Maʼnaviy-axloqiy tarbiya va bolalarning ijtimoiy himoyasi shoʻʼba rahbari Zafar Abdullayev oʻquvchilarni bayrogʻimiz qabul qilingan sana ham sovrindorlik bilan samimiy tabrikladi. Shuningdek, oʻquvchilarni kitobxonlik tanloviga munosib tayyorgarlik koʻrishda oʻz hissasini qoʻshgan Nusrat Kamolovga minnatdorchilik bildirdi.

Fursatdan foydalanib, barcha hamyurtlarimizni bayrogʻimiz qabul qilingan kun bilan tabriklaymiz. Ona yurtimizdagi tinchlik va osudalik hech qachon bizni tark etmasin, bayrogʻimiz baland-balandlarda Oʻzbekiston deb atalmish jannatmakon yurt shaʼni, shon-u shavkatidan darak berib hilpirayversin!

Charos Arslonova, tuman hokimligining Axborot xizmati rahbari.