XALQ DEPUTATLARI TUMAN KENGAShINING 23-SESSIYaSI TOʻGʻRISIDA AXBOROT

29-dekabr kuni Amudaryo tumani hokimligining majlislar zalida Xalq deputatlari tuman Kengashining 23-sessiyasi boʻlib oʻtdi.

Sessiya majlisida Qoraqalpogʻiston Respublikasi Mahalla va oilani qoʻllab-quvvatlash vazirining birinchi oʻrinbosari Maryam Ahmedova, tuman hokimi Sultonboy Yoʻldashev, hokimlik masʼul xodimlari, huquq-tartibot organlari, boʻlimlar, jamoat tashkilotlari rahbarlari hamda ommaviy axborot vositalari vakillari ishtirok etdilar. Sessiya ishiga tuman hokimi Sultonboy Yoʻldashev raislik qildi hamda olib bordi.

Sessiyada kun tartibidagi dastlabki – tuman mahalliy byudjetining 2021-yilgi asosiy koʻrsatkichlari toʻgʻrisidagi masala yuzasidan tuman Moliya boʻlimi boshligʻi Ulugʻbek Bekniyazovning hisoboti tinglandi. Hisobotda 2021-yilda tuman mahalliy byudjetining daromadlari va xarajatlari haqida batafsil maʼlumotlar berildi.

Kun tartibidagi navbatdagi masala – “Temir daftar”dagi roʻyxat boʻyicha yordamga muhtoj oilalarga manzilli yordam koʻrsatish va aholining, ayniqsa, xotin-qizlar va yoshlarning bandligini taʼminlash boʻyicha amalga oshirilayotgan ishlar boʻyicha Mahalla va oilani qoʻllab-quvvatlash boʻlimi boshligʻi Alisher Yoʻldoshevning hisoboti tinglandi. Deputatlarga “Temir daftar”ga kiritilgan ehtiyojmand oilalar, ularni moddiy qoʻllab-quvvatlash boʻyicha koʻrilgan choralar, 2020-yil davomida tumanda yaratilgan yangi ish oʻrinlari hamda xotin-qizlar va yoshlarni ish bilan taʼminlash boʻyicha amalga oshirilgan ishlar haqida batafsil maʼlumotlar berildi.

Sessiya kun tartibiga qoʻyilgan navbatdagi – yer ajratish, egalik qilish, foydalanishga va ijaraga berish masalalarini koʻrib chiquvchi doimiy komissiya qaroriga doir masala yuzasidan tuman hokimi oʻrinbosari Fayzulla Saʼdullayevning hisoboti tinglandi. Hisobotda kontraktatsiya shartnomalarini bajarmagan hamda oʻz xohishiga koʻra faoliyatini toʻxtatayotgan fermer xoʻjaliklari rahbarlarining arizalari koʻrib chiqilib, ularning egaligidagi yer maydonlari tuman zahira yer fondi hisobiga qaytarib olingani taʼkidlab oʻtildi.

Shuningdek, sessiyada Xalq deputatlari tuman Kengashi deputatlarini moddiy va maʼnaviy ragʻbatlantirish toʻgʻrisidagi masala ham koʻrib chiqildi. Doimiy komissiyalar tomonidan tavsiya qilingan nomzodlar orasidan Ilhom Polvonov “Adolatli deputat”, Maqsud Saʼdullayev “Mehnatkash deputat”, Hamro Xodjayev “Xalqparvar deputat” dep topildi. Xalq deputatlari tuman Kengashining avvalgi chaqirigʻida faoliyat yuritgan deputat Gulasal Matyakubova “Faxriy deputat” deb topildi.

Sessiyada shuningdek, Qoraqalpogʻiston Respublikasi Joʻqorgʻi Kengesining 28-maydagi qaroriga asosan Oʻzbekiston Respublikasi Prezidenti tomonidan koronavirus pandemiyasiga doir qabul qilingan Farmon va Qarorlarida belgilangan vazifalarning bajarilishi boʻyicha amalga oshirilgan chora-tadbirlar ijrosi atroflicha muhokama qilinib, muzokaralar oʻtkazildi.

Karantin tadbirlarini yumshatish doirasida faoliyatiga ruxsat berilgan sohalar, ayniqsa, ishlab chiqarish, xizmat koʻrsatish va savdo korxonalarida sanitariya qoidalariga qatʼiy amal qilinishi, hududda koronavirus infektsiyasi kirib kelishining oldini olish, aholi orasida sogʻlom turmush tarzini keng turda targʻib qilish, sanitariya va gigiyena qoidalariga amal etilishi, aholini dori-darmonlar, tibbiy buyumlar, tibbiy texnika va eng zarur mahsulotlarga boʻlgan talablarni taʼminlash boʻyicha amalga oshirilayotgan ishlarning samaradorligi toʻgʻrisidagi masala ham deputatlar tomonidan keng muhokama qilindi.

Sessiyada shuningdek, “2017-2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Ilm, maʼrifat va raqamli iqtisodiyotni rivojlantirish yili”da amalga oshirishga oid tuman dasturining ijrosi, tumanda huquqbuzarliklarning oldini olish va ularning profilaktikasi boʻyicha amalga oshirilayotgan ishlar hamda sessiya vakolatiga kiruvchi boshqa masalalar ham muhokama qilindi.

Sessiya kun tartibida koʻrilgan barcha koʻrilgan masalalar yuzasidan tegishli qarorlar qabul qilindi.

Sessiya yakunida turli sohalarda mehnat qilib, davlat ravnaqi va jamiyat taraqqiyoti yoʻlidagi islohotlarni amalga oshirishda faol ishtirok etib kelayotgan bir guruh faollarga ham tuman hokimi tomonidan qimmatbaho sovgʻalar topshirildi.

Tuman hokimligining axborot xizmati.