AHOLI SALOMATLIGIGA QARATILGAN YuKSAK EʼTIBOR

Prezidentimizning 2020-yil 29-dekabr kuni Oliy Majlisga va xalqimizga  qilgan   Murojaatnomasida davlat va jamiyatni rivojlantirish, xususan, sogʻliqni saqlash, aholiga sifatli tibbiy xizmat koʻrsatish sohasini yanada takomillashtirish borasida ustuvor yoʻnalish va vazifalar belgilab berildi. 2021-yil – “Yoshlarni qoʻllab-quvvatlash va aholi salomatligini mustahkamlash yili” deb eʼlon qilindi.

Bu bejiz emas, chunki yoshlarga eʼtibor yurt, millat kelajagiga boʻlgan eʼtibor hisoblanadi. Ogʻir pandemiya davri esa aholi salomatligini saqlash sohasining ham naqadar muhim ekanligini yana bir karra isbotladi. Shu jihatdan 2021-yil “Yoshlarni qoʻllab-quvvatlash va aholi salomatligini mustahkamlash yili”, deb nomlanishi ayni muddao boʻldi. Bu esa tibbiyot sohasining yanada taraqqiy etishida muhim ahamiyat kasb etadi.  Murojaatnomada kelgusi yillarda sohani rivojlantirish yoʻlida qanday tub islohotlar amalga oshirilishi qayd etildi. Xususan, kelgusi yilda ham koronavirus pandemiyasiga qarshi kurashni tizimli ravishda davom ettirish eng muhim vazifalarimizdan biri boʻlishi, buning  uchun 2021-yil davlat byudjetida 3 trillion soʻm zahira shakllantirilgani, ushbu mablagʻlar hisobidan, albatta, aholini koronavirusga qarshi emlash tadbirlari ham amalga oshirilishi taʼkidlandi.

Muhtaram Yurtboshimiz sanitariya - epidemiologiya xizmati sifatini oshirish, uning moddiy-texnik bazasini yaxshilash va zamonaviy laboratoriyalar tashkil etishga 200 million dollar yoʻnaltirilishini aytganlarida tibbiyot xodimi sifatida juda quvondim. Boisi, mablagʻlar sanitariya-epidemiologik vaziyatning yaxshilanishiga xizmat qiladi. Bu – xalqimizning tinch-osoyishta hayotini taʼminlaydi.

Pandemiya saboqlaridan kelib chiqqan holda, tibbiyot sohasini raqamlashtirish koʻlami yanada kengaytirilishi, ona va bola sogʻligʻiga eʼtibor kuchaytirilishi, shu maqsadda  15 yoshgacha boʻlgan bolalar va homilador ayollarga 7 turdagi vitaminlar, bolalar uchun parazitar kasalliklarga qarshi dori vositalari bepul tarqatilishi, bu jarayon bilan 2021-yilda 11 mln. nafar, 2022-yilda 17 mln. nafar aholi qamrab olinishi, natijada ayollar va bolalarni yod, temir, foliy kislotasi, vitaminlar va parazitlarga qarshi dorilar bilan bepul taʼminlash orqali aholi oʻrtasida kamqonlik 25 foizga kamaytirilishi joriy yil uchun dolzarb vazifa qilib qoʻyildi. Oʻylaymanki, davlatimizning buningdek gʻamxoʻrligi kelgusida oʻzining quvonarli natijalarini beradi.

Bir soʻz bilan aytganda, Prezidentimiz Murojaatnomasida sogʻliqni saqlash sohasini rivojlantirishga yuksak eʼtibor qaratilgan. Bu esa soha xodimlari zimmasiga ulkan masʼuliyat yuklaydi. 2021-yilda sogʻliqni saqlash sohasida amalga oshiriladigan tub islohot, yangilanish va oʻzgarishlar nafaqat xalqimizning buguni, balki ertasining ham porloq boʻlishiga xizmat qiladi,  aholi salomatligini saqlash, sogʻlom avlodning dunyoga kelishi, ularning har tomonlama yetuk boʻlib unib-oʻsishida muhim oʻrin tutadi.

Belgilangan vazifalarni bajarish, sogʻliqni saqlash tizimidagi yangilanishlarni amalga oshirish  mashaqqatli mehnat, fidoyilikni talab etadi. Tumanimizning tibbiyot sohasida mehnat qilayotgan shifokorlar va oʻrta tibbiyot xodimlari bu borada ham davlatimiz rahbari, butun xalqimizning ishonchini oqlashga harakat qiladi, deb sizlarni ishontiraman.

Faxriddin ABDULLAYeV,

tuman Tibbiyot birlashmasi boshligʻi.