AHOLINING IQTISODIY FAROVONLIGINI TAʼMINLASh BURChIMIZ

Amudaryo tumani Aholi bandligiga koʻmaklashish markazi tomonidan vaqtincha ishsiz fuqarolarning bandligini taʼminlash, pandemiya sharoiti bilan bogʻliq cheklovlar tufayli chet davlatlarga chiqib ishlash uchun ketaolmagan mehnat muhojirlarining daromad topishlariga koʻmaklashish, ularni kasbga oʻqitish, til oʻrgatish, tadbirkorlik faoliyatlarini boshlashlariga sharoit yaratish borasida tizimli ishlar amalga oshirilmoqda. Xususan, Bandlik Dasturiga muvofiq, 2020-yil davomida 5463 nafar fuqaroning murojaati roʻyxatga olinib, faol ish qidiruvchilardan 3281 nafari markaz tomonidan ishga joylashtirildi.

Shuningdek, 535 nafar ish bilan band boʻlmagan fuqarolarga ixcham issiqxonalar va sugʻorish vositalari uchun 1 mlrd. 627 mln. soʻmlik subsidiya ajratildi. Bundan tashqari, 7 nafar fuqarolarga malakasini oshirish uchun 12,4 mln. soʻm, 17 nafar fuqarolarga tadbirkorlikni yoʻlga qoʻyish maqsadida roʻyxatdan oʻtishlari uchun 3,8 mln soʻm subsidiya toʻlab berildi.

Oʻtgan 2020-yil davomida tumanda qishloq xoʻjaligi yoʻnalishida 4 ta kooperativ tashkil qilinib, ularga “Temir daftar”ga kiritilgan 110 nafar ishsiz fuqarolar jalb etildi va jamgʻarma mablagʻlari hisobidan 245,3 mln. soʻm subsidiya mablagʻlari yoʻnaltirildi.

Shuningdek, markaz tomonidan 2020-yilda 5-marta boʻsh ish oʻrinlari yarmarkasi tashkil qilinib, yarmarkaga 166 ta korxona va tashkilotlardan 1179 boʻsh ish oʻrinlari taklif qilindi va 89 nafar shaxsga ishga yoʻllanma berildi.

Jamoat ishlari jamgʻarmasiga ajratilgan mablagʻlar hisobidan jami 2093 nafar aholi jamoat ishlariga jalb qilindi va ularning ish haqi toʻlovi uchun jamgʻarmadan 2 mlrd. 850 mln. soʻm mablagʻ toʻlab berildi.

Tumanda 2020-yilda 1470 ta yangi ish oʻrinlarini yaratish rejalashtirilgan boʻlib, bu boradagi reja 112,4 foizga bajarildi. Bundan tashqari, 536 ta ishsiz fuqarolarga 215,2 mln. soʻmlik ishsizlik nafaqasi tayinlandi va toʻlab berildi.

Mehnat muhojirlarini ijtimoiy himoya qilish borasida amalga oshirilgan ishlar ham samarali boʻldi. Pandemiya tufayli yashash joylariga qaytib kelgan 3237 nafar mehnat muhojirlaridan 2723 nafarining bandligini  taʼminlashga erishildi.

“Xorijda vaqtinchalik mehnat faoliyatini amalga oshirayotgan fuqarolarni va ularning oila aʼzolarini himoya qilish kafolatlarini yanada kuchaytirish choralari toʻgʻrisida”gi farmon asosida 19 nafar fuqaroga maxsus komissiya tomonidan uy-joy olish uchun tavsiya berildi hamda ularga jami 346 mln soʻm mablagʻ uy-joyning boshlangʻich badali sifatida toʻlab berildi.

Tuman Aholi bandligiga koʻmaklashish markazi tomonidan yangi 2021-yilda ham aholining ishsiz qatlamini ijtimoiy himoyalash va qoʻllab-quvvatlash maqsadida mehnatga layoqatli ishsiz fuqarolar uchun kamida 1569 ta yangi ish oʻrinlari yaratilishi rejalashtirilmoqda. Joriy yilda Bandlik dasturiga muvofiq, 3505 nafar fuqaro ishga joylashtiriladi va  500 nafar ishsiz fuqarolarga 667,5 mln. soʻmlik ishsizlik nafaqasi tayinlanadi.

220 nafar vaqtincha ishsiz fuqarolar kasbga oʻqitiladi, 115 nafar mehnat muhojirlari turli xil yoʻnalishda kasbga va chet tillariga oʻqitiladi. Ehtiyojmand oilalarga 460 ta ixcham issiqxonalar qurib berish uchun 3 mlrd. soʻmlik subsidiyalar ajratilishi koʻzda tutilgan. 2500 nafar ishsiz fuqarolar jamoat ishlariga jalb qilinadi, shuningdek, 6 ta mehnat yarmarkasi oʻtkaziladi. Ushbu amalga oshiriladigan ishlar natijasida tumanda ishsizlik darajasini 9 foizga tushirish rejalashtirilmoqda.

Bu kabi koʻrilayotgan barcha chora-tadbirlar aholining ish bilan bandligini taʼminlash orqali ularning iqtisodiy farovonligini oshirish, ijtimoiy himoyasini kuchaytirish, kambagʻallikni qisqartirishga qaratilgani bilan ahamiyatlidir.

Farhod AHMADOV, tuman Aholi bandligiga koʻmaklashish markazi direktori.