SEKTORLAR RAHBARLARI YoShLAR BILAN UChRAShDI

Yosh avlodga eʼtibor har qachongidan ham dolzarb ahamiyat kasb etayotgan ayni davrda ularning orzu-istaklari, qiziqish va intilishlari bilan tanishish, shunga koʻra ragʻbatlantirish asosiy masalaga aylandi. Prezidentimiz ham bu borada 2020-yil 29-dekabr kungi Oliy Majlisga Murojaatnomasida va mamlakatimizda birinchi bor oʻtkazilgan Oʻzbekiston yoshlari forumida yoshlarga oid davlat siyosatini toʻlaqonli roʻyobga chiqarish boʻyicha eng dolzarb vazifalarni belgilab berdi.

Joriy yilning 3-fevral kuni Amudaryo tuman hokimligi majlislar zalida ushbu vazifalar ijrosini taʼminlash va yoshlarni qiynayotgan muammolar bilan tanishish, bartaraf etilishga koʻmaklashish maqsadida Prezidentning Qoraqalpogʻiston Respublikasidagi Xalq qabulxonasi mudiri Salauatdin Xudoybergenov boshchiligida yoshlar bilan uchrashuv oʻtkazildi.

Uchrashuvda Qoraqalpogʻiston Respublikasidagi Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi mudiri Rinat Aytmurodov, Qoraqalpogʻiston Respublikasi 4 ta sektor rahbarlarining oʻrinbosarlari yaʼni, Qoraqalpogʻiston Respublikasi Vazirlar Kengashi Raisining oʻrinbosari Murat Jumanov, Respublika Prokuraturasi boʻlim boshligʻi Alisher Rahimov, Respublika Ichki ishlar vaziri oʻrinbosari Islom Ahmedov hamda Respublika Davlat Soliq boshqarmasi boshligʻi oʻrinbosari Sabit Yerniyazov, Amudaryo tumani hokimi Sultonboy Yoʻldashev, Prezidentning Amudaryo tumanidagi Xalq qabulxonasi mudiri Erkin Rajabov, Bosh Vazirning Amudaryo tumanidagi Tadbirkorlar murojaatlarini koʻrib chiqish qabulxonasi mudiri Akbar Xoʻjamurodov va tumandagi boshqa korxona-tashkilotlar rahbarlari, faol yoshlar qatnashdi.

Masʼullar tomonidan dastlab, mamlakatimizda yoshlarga qaratilayotgan eʼtibor, ularning komil insonlar, kelajakka munosib vorislar boʻlib yetishishlari uchun yaratilayotgan imkoniyat va sharoitlar xususida soʻz yuritildi. Shuningdek, tumanda bu borada amalga oshirilayotgan chora-tadbirlar, asosan “Temir daftar” va “Yoshlar daftar”iga roʻyxatga olingan yoshlarga, tadbirkorlikka qiziquvchi yoshlarga qaratilayotgan eʼtibor kabilarga keng toʻxtalib, joriy yilda ham isteʼdodli yoshlarning qobiliyatlarini roʻyobga chiqarish, yosh avlodning jismoniy va maʼnaviy yetuk boʻlib ulgʻayishi, ular oʻrtasida sogʻlom turmush tarzini qaror toptirish hamda har tomonlama qoʻllab-quvvatlashga qaratilgan koʻplab loyihalarni amalga oshirish rejalashtirilgani toʻgʻrisida batafsil maʼlumot berildi.

Uchrashuv davomida “Yoshlar daftari”ga roʻyxatga olingan yoshlar orasida tadbirkorlikka qiziquvchi fuqarolarga berilayotgan imkoniyatlar, tumandagi yangi ish oʻrinlari, “Yoshlar: 1+1” dasturining aӽamiyati, biznes gʻoyani amalga oshirish va ajratilayotgan subsidiyalarning yangi mexanizmi boʻyicha interfaol usulda seminar-trening tashkil etildi. Shuningdek, kiber jinoyatning oldini olishga oid videorolik ham namoyish etildi.

Shundan soʻng, sektorlar rahbarlari, tegishli mutasaddilar tomonidan yoshlarni kiynayotgan muammolar, fikr va takliflar tinglanib, atroflicha oʻrganildi.

Uchrashuv davomida 91 nafar yoshlar oʻzlarini qiynab kelayotgan muammolari, takliflari bilan masʼullarga bartaraf etilishda koʻmak berishlarini soʻrab, murojaat qildi. Ulardan 24 nafarining murojaati joyida oʻrganilib, ijobiy hal qilindi.

Bosh vazirining Tadbirkorlar murojaatlarini koʻrib chiqish qabulxonasi mudiri Rinat Aytmurodov ham tadbirkorlikka qiziquvchi yoshlardan 7 nafarining murojaatini qabul qilib, tanlagan yoʻnalishlari boʻyicha ularga atroflicha tushunchalar berdi. Shundan 5 nafar murojaat egasining muammosi joyida bartaraf etildi.

Taʼkidlash joizki, uchrashuv davomida bandlik masalasi boʻyicha qilingan 20 ta murojaatga joyida yechim topildi. Murojaat qilgan yoshlar mutaxassisligiga, yoʻnalishlariga koʻra tuman Xalq taʼlimi, Maktabgacha taʼlim va shu kabi boshqa korxona va tashkilotlarga ishga joylashtirildi. Bundan tashqari, issiqxona qurish, yer bilan taʼminlash va kredit olish masalalari boʻyicha yoshlardan qabul qilingan murojaatlar ham ijobiy hal qilindi. Mazkur masalada murojaat qilgan yoshlarga ham muammolariga yechim topib, koʻmak berish boʻyicha masʼullarga tegishli topshiriqlar berildi va joyida hal qilinishiga erishildi.

Aytish joizki, yoshlar oʻrtasida soʻrovnoma oʻtkazish natijasida aniqlangan 6 ming 753 nafar ishsiz va muammosi mavjud boʻlgan yoshlar “Yoshlar daftari”ga kiritilib, 2021-yil davomida yoshlar bilan ishlash boʻyicha 9 ta yoʻnalish, 74 ta banddan iborat chora-tadbirlar dasturi ishlab chiqilgan. Ushbu dastur boʻyicha “Yoshlar daftari”ga kiritilgan 469 nafar yoshlar qurilish, 755 nafar yoshlar qishloq xoʻjaligi, 879 nafar yoshlar tarbirkorlik tarmoqlarida, 1210 nafar yoshlar oʻzini-oʻzi band qilish orqali, 511 nafar yoshlarga kredit ajratish, 95 nafar yoshlarga tadbirkorlik uchun bino ajratish, 512 nafar yoshlarni vaqtinchalik xaq toʻlanadigan jamoat ishlariga, 507 nafar yoshlar oʻz mutaxassisligi boʻyicha ishga joylashtirish orqali bandligi taʼminlanadi.

Bu kabi saʼy-harakatlar negizida yoshlarni Vatanimizga xizmat qiladigan, yurt taraqqiyotiga hissa qoʻshadigan yetuk insonlar qilib tarbiyalashdek yuksak maqsadlar mujassamdir.

Ozoda Xudoyberganova.