OLIY MAJLIS QONUNChILIK PALATASI DEPUTATINING AMUDARYoLIK YoShLAR BILAN UChRAShUVI OʻTKAZILDI

Ulugʻ maʼrifatparvar bobomiz Abdurauf Fitratning “Bu dunyo kurash maydonidir. Sogʻlom tan, oʻtkir aql va yaxshi axloq bu maydon qurolidir”, degan soʻzlari bugungi kunda ham oʻz ahamiyatini yoʻqotgani yoʻq. Shu boisdan ham oʻsib kelayotgan yosh avlodning chuqur ilm olishi, ularning ijodiy salohiyati va iqtidorini namoyish qilishlariga sharoit yaratish, globallashuv sharoitidagi xavf-xatarlarga va mafkuraviy xurujlarga mustahkam immunitetni  shakllantirish, hayotga qatʼiy ishonchga ega qilib tarbiyalashga ulkan eʼtibor qaratilmoqda. Bu borada yoshlar maʼnaviyatini yuksaltirish va boʻsh vaqtlarini mazmunli tashkil etish yuzasidan Yurtboshimiz belgilab bergan beshta muhim tashabbus doirasida eʼtiborga arzigulik ishlar amalga oshirilayotir.

Muhtaram Prezidentimiz Farmoni bilan “Yoshlarni qoʻllab-quvvatlash va aholi salomatligini mustahkamlash yili” Davlat dasturining qabul qilinishi yoshlar hayotida muhim oʻzgarishlarga asos boʻlishi shubhasiz.

Dasturda ijtimoiy sohani rivojlantirish va yoshlarni qoʻllab-quvvatlash boʻyicha kompleks chora-tadbirlar hamda muhim vazifalar belgilab berilgan.

Shu munosabat bilan Oliy Majlis Qonunchilik palatasi deputatlari oʻzlari saylangan hududlarda boʻlishib, belgilab berilgan vazifalarning joylarda ijrosini taʼminlashga hissa qoʻshish, yoshlar orzu-intilishlarini tinglash, muammolariga yechim topish maqsadida yoshlar bilan uchrashuvlar oʻtkazishmoqda.

2-fevral kuni Mangʻit shahrida faoliyat yuritayotgan 9-sonli Bolalar musiqa va sanʼat maktabida 4-Amudaryo saylov okrugidan Oliy Majlis Qonunchilik palatasiga Oʻzbekiston Milliy tiklanish demokratik partiyasidan saylangan deputat Zumrad Bekatova tumanimiz yoshlari bilan uchrashdi va samimiy suhbatlashdi.

Uchrashuv yigʻilishiga tumanimizning turli sohalarda mehnat qilayotgan, taʼlim olayotgan va mehnat bilan band boʻlmagan 120 nafardan ziyod yoshlari ishtirok etdilar.

Uchrashuvni Yoshlar ishlari agentligi tuman boʻlimi boshligʻi Jasur Davletov ochdi. Soʻzga chiqqan Oliy Majlis Qonunchilik palatasi deputati Zumrad Bekatova mamlakatimizda yoshlarni har tomonlama qoʻllab-quvvatlash, huquqlari va qonuniy manfaatlarini himoya qilish tizimi tubdan isloh qilinib, takomillashtirilayotgani, yoshlarga eʼtibor kun sayin kuchaytirilayotganini aytib oʻtdi.

Xususan, joriy yildan boshlab oliy taʼlim muassasalariga kirish imtihonlarida eng yuqori ball toʻplagan 200 nafar yoshlar uchun Prezident granti joriy etiladi. Ilm yoʻlini tanlagan iqtidorli yoshlarni qoʻllab-quvvatlash maqsadida keyingi yildan boshlab, magistratura va doktorantura bosqichlari uchun Prezident stipendiyasi kvotasi ikki barobar oshiriladi, oliy oʻquv yurtlariga qabul qilishda ehtiyojmand oilalar qizlari uchun grantlar soni ikki barobar koʻpaytiriladi, bir oilaning ikki yoki undan ortiq  toʻlov-kontrakt asosida oʻqiyotgan farzandlari uchun imtiyozli kreditlar ajratiladi.

Yoshlar deputatning maʼruzasini qiziqib tingladilar va oʻzlarini qiziqtirgan savollarini berib, atroflicha javoblar oldilar. Uchrashuv yigʻilishida tuman hokimligi tashkiliy nazorat guruhi rahbari Gʻulomjon Duysenboyev yoshlarni yaratilayotgan imkoniyatlardan unumli foydalanib oʻqish va ishda faol boʻlishga chaqirdi.

Tuman hokimligining axborot xizmati