IJRO INTIZOMINI YaNADA MUSTAHKAMLASh YuZASIDAN RESPUBLIKA MIQYoSIDAGI OʻQUV-AMALIY SEMINARI OʻTKAZILDI

Qoraqalpogʻiston Respublikasi davlat hokimiyati va boshqaruvi organlarida ijro intizomiga masʼul rahbarlarning hujjatlar bilan ishlashini tashkil etish, shaxsiy masʼuliyatini oshirish hamda ijro intizomini yanada mustahkamlash yuzasidan oʻquv-amaliy seminar oʻtkazildi.

1-mart kuni Amudaryo tumani hokimligi majlislar zalida oʻtkazilgan ushbu oʻquv-amaliy seminarda Oʻzbekiston Respublikasi Vazirlar Mahkamasi masʼullari, Qoraqalpogʻiston Respublikasi Vazirlar Kengashi raisi Qahramon Sariyev qatnashdi. Shuningdek, Respublika hududidagi boshqa vazirliklar, davlat organlari, tegishli tashkilotlar mutasaddilari, barcha tumanlar masʼullari ishtirok etdilar. 

Videokonferentsaloqa tarzida oʻtgan oʻquv-amaliy seminarda dastlab Oʻzbekiston Respublikasi Vazirlar Mahkamasining Hududlarni kompleks rivojlantirish, kommunikatsiyalar, qurilish va uy-joy kommunal xoʻjaligi masalalari kotibiyati mudiri oʻrinbosari Mansurbek Jumaniyozov maʼruza qildi. Taqdimot materiallari asosidagi maʼruza davomida Oʻzbekiston Respublikasi Prezidenti va Hukumati hujjatlari hamda topshiriqlarining Qoraqalpogʻiston Respublikasidagi ijrosi holati va barcha darajadagi rahbarlar masʼuliyati toʻgʻrisida tushunchalar berildi.

Shundan soʻng, Oʻzbekiston Respublikasi Adliya vaziri oʻrinbosari Muzraf Ikramov Prezidentimizning “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF–6166-son Farmonining mazmun-mohiyati va joriy etilgan yangi tizimning alohida jihatlari haqida maʼruza qildi. Maʼruzalardan keyin seminar ishtirokchilari oʻzlarini qiziqtirgan savollarni berib, batafsil javoblar oldilar.

Seminar davomida Oʻzbekiston Respublikasi Hisob palatasi inspektori Baxtiyor Yunusovning Oʻzbekiston Respublikasi Prezidenti hujjatlari va topshiriqlari ijrosini taʼminlashda Hisob palatasiga yuklatilgan vazifalar, Axborot texnologiyalari va kommunikatsiyalarini rivojlantirish vaziri birinchi oʻrinbosari Oleg Andreyevich Pekosning Oʻzbekiston Respublikasi Prezidenti va Hukumati hujjatlari va topshiriqlarini rasmiylashtirish, ularning ijrosini tashkil etishda axborot-kommunikatsiya texnologiyalaridan foydalanish samaradorligini oshirish hamda "Ijro.gov.uz" ijro intizomi idoralararo yagona elektron tizimi toʻgʻrisidagi maʼruzalari tinglandi. Ushbu maʼruzalar yuzasidan ham muzokaralar oʻtkazilib, tinglovchilarni qiziqtirgan savollarga atroflicha javoblar berildi.

Shuningdek, oʻquv-amaliy seminar davomida masʼullar tomonidan qilingan maʼruzalarda norma ijodkorligi, hujjatlar loyihalarini ekspertizadan oʻtkazish hamda qonun hujjatlarini targʻib etishda yuridik xizmatlarning ustuvor vazifalari, jismoniy va yuridik shaxslarning murojaatlari bilan ishlashda tahlillar, muammolar va ularning yechimlari xususida maʼlumotlar berildi.

Qoraqalpogʻiston Respublikasi Vazirlar Kengashida norma ijodkorligi, normativ-huquqiy hujjat loyihalarini huquqiy ekspertizadan oʻtkazishi hamda Qoraqalpogʻiston Respublikasi Vazirlar Kengashida Jismoniy va yuridik shaxslarning murojaatlari bilan ishlash boʻyicha tashkil etilgan tizim toʻgʻrisida ham maʼruzalar qilinib, tinglovchilarga prezident Farmon va Qarorlari, davlat hujjatlari ijrosini amalga oshirish boʻyicha yoʻl-yoʻriqlar, batafsil tushunchalar berildi.

Seminarda Amudaryo tumani hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari Maʼmurjon Temirboyev Oʻzbekiston Respublikasi Prezidentining 2020-yil 11-avgustdagi 4804-sonli Qarori ijrosining “viloyat – tuman – mahalla” tizimi asosida tashkil etilishi boʻyicha maʼruza qildi.

Undan tashqari, oʻquv-amaliy seminar davomida Xoʻjayli va Shumanay tumanlari hokimligi studiyasidan ham maʼruzalar tinglandi. Xoʻjayli tumani hokimligi tashkiliy-nazorat guruhi rahbari Xalilla Xolmurodov tuman hokimligida qonunchilik hujjatlari va topshiriqlarning ijrosini taʼminlashda ijro nazoratini tizimli yoʻlga qoʻyish chora-tadbirlari toʻgʻrisida, Shoʻmanoy tumani hokimligi devonxonasi mudiri Amonboy Qargʻabayev esa tuman hokimligida jismoniy va yuridik shaxslarning murojaatlari bilan ishlash toʻgʻrisida maʼlumot berib oʻtdilar.

Muzokara va ochiq muloqot tarzida oʻtgan oʻquv-amaliy seminar ishtirokchilari kun tartibadi muhokama qilingan masalalar yuzasidan keng tushunchalarga, batafsil maʼlumotlarga ega boʻldilar.

Ozoda Xudoyberganova.