XALQ DEPUTATLARI AMUDARYo TUMAN KENGAShINING 32-SESSIYaSI TOʻGʻRISIDA AXBOROT

11-may kuni Amudaryo tumani hokimligining majlislar zalida Xalq deputatlari tuman Kengashining 32-sessiyasi boʻlib oʻtdi.

Joriy yilning 11-may kuni boʻlib oʻtgan sessiya majlisida sektor rahbarlari, tuman hokimi oʻrinbosarlari, hokimlik masʼul xodimlari, huquq-tartibot organlari, boʻlimlar, tijorat banklari rahbarlari, fuqarolarning oʻzini oʻzi boshqarish organlari raislari hamda ommaviy axborot vositalari vakillari ishtirok etdilar. Sessiyani tuman hokimi Sultonboy Yoʻldoshev ochdi va olib bordi.

Sessiya kun tartibida turli masalalar muhokamaga qoʻyildi.

Sessiya kun tartibidagi dastlabki – Prezident Shavkat Mirziyoyevning 2021-yil 8-apreldagi “Hududlarda tadbirkorlikni rivojlantirish hamda 2021-yil uchun bandlik dasturining ijrosini samarali tashkil etish  chora-tadbirlari toʻgʻrisida”gi tegishli bayonida belgilangan “mahallabay” ishlash tizimi orqali aniqlangan  “oʻsish nuqtalari”dan kelib chiqib, har bir mahallaning rivojlanish dasturini tasdiqlash toʻgʻrisidagi masala yuzasidan tuman hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari Maʼmurjon Temirboyev axborot berdi.

Taʼkidlanganidek, tumanda 3 boʻgʻinli “mahallabay” ishlash tizimini joriy qilish boʻyicha tuman hokimining 2021-yil 27-martdagi 11F-sonli farmoyishi qabul qilindi. Farmoyishga asosan, tumandagi 49 ta mahallaga iqtisodiy kompleks vakillaridan 44 nafar hamda tijorat banklardan 56 nafar jami 100 nafar masʼul xodimlar biriktirildi. Ishchi guruhlar tomonidan oʻrganishlar natijasida mahallalar tasniflandi. Mahallalarning tasniflanishi boʻyicha: 16 ta yashil, 30 ta sariq va 3 ta qizil toifadagi mahallalar ekanligi aniqlandi.

Mahallalarning oʻsish nuqtalari va pasportlari boʻyicha tumandagi 49 ta mahallalarning aniqlangan muammolari jamlanib, boshqaruv ofisiga taqdim etildi va ofis tomonidan 49 ta mahallalarning yoʻl xaritalari ishlab chiqildi. Shu bilan birga ushbu mahallalarning pasportlari yangilandi. Mahallalarni oʻsish nuqtalari orqali rivojlantirish maqsadida har bir mahallaning asosiy drayverlari, yaʼni oʻsish nuqtalari belgilab olindi.

Kun tartibidagi navbatdagi masala, yaʼni tuman Mahalla va oilani qoʻllab-quvvatlash boʻlimi tomonidan “Ayollar daftari”ni yuritish orqali xotin-qizlar muammolarini tizimli ravishda hal etish va “Ayollar daftari”dan chiqarish masalasi yuzasidan tuman hokimining oʻrinbosari – Mahalla va oilani qoʻllab-quvvatlash boʻlimi boshligʻi Alisher Yoʻldoshevning hisoboti tinglandi. Alisher Yoʻldoshev oʻz hisobotida hududlar kesimida “Yoshlar daftari” va “Ayollar daftari” ni shakllantirish, ularga kiritilgan yoshlar va xotin-qizlar bilan doimiy ishlash tizimini joriy etish boʻyicha bergan topshiriqlarining bajarilishi yuzasidan bir qancha ishlar amalga oshirilganini taʼkidlab oʻtdi.

Tumanda jami 1832 nafar xotin-qizlar “Ayollar daftari”ga kiritilgan. Bu boʻyicha “Yoʻl xarita” ishlab chiqilgan va 2021-yil yanvardan iyungacha boʻlgan 6 oy davrda reja asosida xotin-qizlarning bandligini taʼminlash boʻyicha chora-tadbirlar belgilangan. Reja asosida  2021-yil 30-aprel holatiga “Ayollar daftari”ga kiritilgan jami 1832 nafar ayollardan 1473 nafari bandligi taʼminlangan boʻlib, bu jami 86 foizni tashkil etadi.  Shuningdek, “Ayollar daftari”ga kiritilgan jami 225 nafar boquvchisini yoʻqotgan, ijtimoiy yordamga muhtoj 2-guruh nogironligi boʻlgan, qaramogʻida bir va undan ortiq I yoki II guruh nogironligi boʻlgan bolalari mavjud xotin-qizlarga 110 mln. 250 ming soʻmlik bir martalik yordam berilgan. “Ayollar daftari”ga kiritilgan tadbirkorlik qilish istagi bor 501 nafar ayoldan 328 nafariga oʻz faoliyatlarini yoʻlga qoʻyishlari uchun 4 mlrd. 209 mln. soʻmlik kredit olishda amaliy yordam koʻrsatilgan.                                                                

Ushbu masala yuzasidan tuman Mahalla va oilani qoʻllab-quvvatlash boʻlimi boshligʻining xotin-qizlarning ijtimoiy-siyosiy faolligini oshirish boʻyicha birinchi oʻrinbosari Muqaddas Beknazarova ham soʻzga chiqib, bu borada amalga oshirilayotgan chora-tadbirlar xususida maʼlumot berib oʻtdi.

Sessiya kun tartibidagi Amudaryo tumanida “Yoshlar daftari”ga kiritilgan ijtimoiy himoyaga muhtoj yoshlarning bandligini taʼminlash, ijtimoiy koʻmak koʻrsatish va kasbga oʻrgatish orqali ularni “Yoshlar daftari”dan chiqarish toʻgʻrisidagi masala yuzasidan esa tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlari boʻyicha oʻrinbosari Mahmud Shermetovning axboroti tinglandi.

Axborotda taʼkidlanganidek, tumanda 2021-yil davomida yoshlar bilan ishlashning yangicha tizimini joriy etish maqsadida, “mahallabay” oʻrganishlar orqali yoshlarning bandligini taʼminlash, kasb-hunarga oʻqitish, tadbirkorlikka jalb etish, shuningdek, ular oʻrtasida madaniyat, sanʼat, sport, axborot texnologiyalari va kitobxonlikni rivojlantirish maqsadida yangicha tizim asosida 9 ta yoʻnalish, 74 ta banddan iborat “Yoshlar dasturi” ishlab chiqilgan. Mazkur masala yuzasidan Xalq deputatlari tuman Kengashining 2-Chordara saylov okrugi deputati Muyassar Rahmatullayeva ham soʻzga chiqdi.

Kun tartibidan joy olgan – mahalliy byudjet mablagʻlari sarflanishida jamoatchilik ishtirokini taʼminlash masalasi toʻgʻrisida tuman hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari Maʼmurjon Temirboyev hisobot berdi. Ushbu masala boʻyicha tuman Moliya boʻlim mudiri Ulugbek Bekniyazov soʻzga chiqib, tumanda mahalliy byudjet mablagʻlari sarflanishi holati bilan tanishtirdi.

Tuman Mahalla va oilani qoʻllab-quvvatlash boʻlimi boshligʻining xotin-qizlar ijtimoiy-siyosiy faolligini oshirish boʻyicha birinchi oʻrinbosari Muqaddas Beknazarova sessiya kun tartibidagi – tumanda “Ayollar daftari”ga kiritilgan ayollarning bandligini taʼminlash va yordam koʻrsatish yuzasidan amalga oshirilgan ishlar toʻgʻrisidagi masala yuzasidan axborot berdi. Shuningdek, "Ayollar daftari"ga kiritilgan 1832 nafar xotin-qizlardan amalga oshirilgan yordamlarni hisobga olgan holda kredit ajratish boʻyicha 284 nafar, huquqiy yordam olishga muhtoj ayollar boʻyicha 12 nafar, psixologik maslahatga muhtoj ayollar boʻyicha 74 nafar, jami 370 nafar xotin-qizlar roʻyxati “Ayollar daftari”dan chiqarib berish uchun bugungi sessiyaga kiritilganini maʼlum qildi. Kun tartibidagi ushbu masala yuzasidan tuman Aholi bandligiga koʻmaklashish markazi direktori Farhod Ahmadov soʻzga chiqdi.

Sessiya kun tartibidagi keyingi – temir yoʻl tarmogʻi qurilishi rejalashtirilgan hududlardagi investitsiya loyihalarini amalga oshirishda aniqlangan muammolarni bartaraf qilish va pochta aloqa boʻlimlari binolarini davlat xususiy sheriklik shartlari asosida qurish toʻgʻrisidagi ikkita masala boʻyicha tuman hokimining sanoatni rivojlantirish, kapital qurilish, kommunikatsiyalar va kommunal xoʻjalik masalalari boʻyicha oʻrinbosari Jasur Norimovning hisoboti tinglandi.

Hokim oʻrinbosari davlatimiz rahbarining tashabbusi va bevosita topshiriqlari asosida tumanimiz xududida Qipchoq panton koʻprigi oʻrnida yangi 413 metrlik avtomobil va temir yoʻl qoʻshma koʻprigi hamda 79 km. uzunlikdagi temir yoʻl liniyasi qurilish ishlari jadal olib borilayotgani, shu munosabat bilan hududni xatlovdan oʻtkazish maqsadida tumandagi maʼsul tashkilotlar rahbarlari ishtirokidagi ishchi guruh tomonidan oʻrganish ishlari amalga oshirilgani, ularning natijalari xususida maʼlumot berdi. Shuningdek, Amudaryo tumani hududida jami

3 ta, Bobur nomli, Oʻrta qalʼa va Qilichboy ovullari hududlarida pochta aloqa boʻlimlari binolarini davlat xususiy sheriklik shartlari asosida yangidan qurish ishlarini amalga oshirish rejalashtirilganini taʼkidlab oʻtdi.

Sessiya kun tartibiga kiritilgan masalalar atroflicha koʻrib chiqildi va tegishli qarorlar qabul qilindi.

Ozoda Xudoyberganova.