OʻZBEKISTON “ADOLAT” SDP AMUDARYo TUMAN KENGAShINING IV PLENUMI BOʻLIB OʻTDI

Shu yilning 19-may kuni tuman hokimligi majlislar xonasida Oʻzbekiston “Adolat” sotsial demokratik partiyasi tuman Kengashining IV plenumi boʻlib oʻtdi.

Plenumda Oʻzbekiston “Adolat” SDP Qoraqalpogʻiston Respublika Kengashi raisi oʻrinbosari R.Oʻtarboyev, partiyaning tuman Kengashi aʼzolari, partiyadan saylangan deputatlar va faollar, ommaviy axborot vositalari xodimlari ishtirok etdilar.

Plenumda “Oʻzbekiston “Adolat”  SDP Amudaryo tuman Kengashining 2020-yilgi  faoliyati yakunlari va 2021-yilga moʻljallangan ustuvor vazifalari” toʻgʻrisidagi va tashkiliy masala muhokama etildi.

Tadbirni partiya tuman Kengash raisi Mansur Oʻrozboyev ochdi va olib bordi. Kun tartibidagi ilk masala yuzasidan qilgan maʼruzasida taʼkidlashicha, Oʻzbekiston “Adolat” SDP Amudaryo tuman Kengashi oʻtgan 2020-yilda oʻz faoliyatini Oʻzbekiston Respublikasi Prezidentining Qonunchilik palatasi va Senati yigʻilishlarida hamda 26-yanvardagi Murojaatnomasi, partiyaning 2020-2024-yillarga moʻljallangan Saylovoldi dasturida belgilangan vazifalarni amalga oshirish boʻyicha ishlab chiqilgan Yoʻl xaritasiga muvofiq olib bordi.

Hisobot davrida mafkuraviy va dasturiy vazifalarni amalga oshirishga karatilgan 10ga yaqin partiya loyihalarni hayotga tatbiq etish choralari koʻrildi.

Jumladan, partiyaning “Muammo bilan yuzma-yuz” loyihasi doirasida barcha darajadagi deputatlik korpuslari va partiya faollari har haftaning chorshanba kunlari muntazam ravishda mahallalarda xalq bilan yuzma-yuz muloqotlar oʻrnatishdi.

Oʻtgan 2020-yil davomida ishchi guruhlar tomonidan Amudaryo tumani boʻyicha jami 32 ta mahallarda xalq bilan yuzma-yuz muloqotlar tashkil qilindi. Unda 153 ta xonadon va 19 ta xoʻjalik yurituvchi subʼektga tashrif buyurildi. Aholi tomonidan kelib tushgan 18 ta murojaatlar yuzasidan 13 ta deputatlik soʻrovlari yuborilib, 10 tasi ijobiy yechimini topdi, 3 ta murojaatlar huquqiy maslahatlar berish orqali hal etildi.

Shuningdek, davlat dasturi ijrosini taʼminlash maqsadida partiyaning “Adolat” siyosiy-huquqiy oʻquvlari kuni” loyihasi doirasida har haftaning seshanba kunlari har bir mahallalarda aholini keng jalb qilgan holda siyosiy-huquqiy oʻquvlar tashkil etildi. Ularda 235 nafar tinglovchi qamrab olindi.

Partiyaning “Bir oyda bir ishi oʻrni” loyihasi doirasida 8 nafar fuqarolar ish bilan taʼminlandi. Shundan 6 nafarini yoshlar, 2 nafarini ayollar tashkil etadi.

Partiya deputatlari va faollarining aholi bilan muloqotini yanada jadallashtirish, joylarda hududlarning ijtimoiy-iqtisodiy rivojlanishi, sogʻliqni saqlash, taʼlim sohalaridagi islohotlarga toʻsiq boʻlib kelayotgan muammolarni oʻrganib, ularning yechimini topish masalalari partiyaning barcha tuzilmalari eʼtibori markazida boʻlishi zarurligiga eʼtibor qaratildi.

Shuningdek, plenumda tashkiliy masala ham koʻrildi. Oʻzbekiston “Adolat” SDP tuman Kengashi raisligiga Oʻktamboy Yoʻldoshevni saylash toʻgʻrisida va partiya tuman Kengashi faoliyatining yanada samarali boʻlishiga xizmat qiluvchi qarorlar qabul qilindi.

Oygul RAJABOVA.