Senat tomonidan maqʼullangan qonun hujjatlari mazmun-mohiyatiga bagʻishlangan yigʻilish boʻlib oʻtdi

Joriy yilning 13-iyul sanasida tuman hokimligining majlislar zalida Oʻzbekiston Respublikasi Oliy Majlisi Senati aʼzosi Botir Matmuratov ishtirokida yigʻilish boʻlib oʻtdi. Yigʻilishni tuman hokimi Sultonboy Yoʻldashev ochdi hamda olib bordi. Unda tuman hokimligi masʼul xodimlari, sektorlar rahbarlari, Xalq deputatlari tuman Kengashi deputatlari, hokim oʻrinbosarlari, boʻlimlar boshliqlari, korxona-tashkilot rahbarlari, mahalla fuqarolar yigʻini raislari hamda ommaviy axborot vositalari vakillari ishtirok etdilar.

Mazkur yigʻilish Oʻzbekiston Respublikasi Oliy Majlisi Senatining oʻn oltinchi yalpi majlisida maʼqullangan qonunlar va koʻrib chiqilgan boshqa masalalar yuzasidan aholi oʻrtasida targʻibot ishlarini amalga oshirish, yuqori palataning tegishli qarorlarida belgilangan topshiriqlar ijrosini oʻrganish, ushbu masalalarda xalq deputatlari mahalliy Kengashlariga amaliy yordam koʻrsatish hamda fuqarolar murojaatlari bilan joyida ishlash maqsadida oʻtkazildi.

Yigʻilish kun tartibidagi Oʻzbekiston Respublikasi Prezidenti tomonidan imzolangan “Vijdon erkinligi va diniy tashkilotlar toʻgʻrisida”gi Qonunning mazmun-mohiyati boʻyicha tuman Adliya boʻlimi boshligʻi Moʻminjon Matyusupov maʼruza qildi.

Taʼkidlanganidek, ushbu Qonun fuqarolarning dinga yoki shunga mos eʼtiqodga oʻz munosabatini belgilash va ifodalash hamda hech qanday qarshiliksiz dinga eʼtiqod qilish va diniy rasm-rusumlarni bajarish huquqlarini taʼminlaydi. Shuningdek, mazkur hujjat ijtimoiy adolat va tenglikni, fuqarolarning dinga munosabatidan qatʼi nazar, ularning huquq va manfaatlari himoya qilinishini kafolatlaydi hamda diniy tashkilotlarning faoliyati bilan bogʻliq munosabatlarni tartibga solib turadi.

Soʻngra “Korruptsiyaga qarshi kurashish faoliyatini samarali tashkil etishga doir qoʻshimcha chora-tadbirlar toʻgʻrisida”gi Prezident qarori mazmun-mohiyati hamda ahamiyati yuzasidan tuman prokurori Javlon Muftullayev maʼruza qildi.

Maʼruzada taʼkidlanganidek, mazkur qaror mamlakatimizda korruptsiyaga qarshi kurashish va korruptsiyaviy holatlarning barvaqt oldini olish tizimi samaradorligini oshirish, ushbu jarayonga jamoatchilikni keng jalb etish va korruptsiyaga nisbatan murosasiz munosabatda boʻlish muhitini shakllantirish maqsadida qabul qilingan.

Qaror bilan 2021-yil 1-sentyabrdan boshlab davlat hokimiyati va boshqaruvi organlari, davlat unitar korxonalari va muassasalari, davlat ulushi 50 foizdan yuqori tashkilotlarda ishga qabul qilishni ochiq tanlov asosida amalga oshirish hamda tanlov doirasida oʻtkaziladigan sinov tadbirlarini internet tarmogʻi orqali real vaqt rejimida kuzatishni nazarda tutuvchi tartib joriy etilishi belgilandi.

Yigʻilish kun tartibidagi masalalar yuzasidan senator Botir Matmuratov oʻz fikr-mulohazalarini bildirdi. Senator oʻz soʻzida Oʻzbekiston Respublikasi Prezidenti tomonidan imzolangan “Vijdon erkinligi va diniy tashkilotlar toʻgʻrisida”gi Qonun va “Korruptsiyaga qarshi kurashish faoliyatini samarali tashkil etishga doir qoʻshimcha chora-tadbirlar toʻgʻrisida”gi qarorining imzolanishi mamlakatimizda olib borilayotgan yangi bosqichdagi islohotlarning amaliy ifodasi ekanini qayd etdi.

Shu bilan birga, mamlakatimizda davlat organlari va tashkilotlarining faoliyatida ochiqlik, oshkoralik va shaffoflikni taʼminlash hamda mansabdor shaxslarning aholi oldidagi hisobdorligini yoʻlga qoʻyish orqali davlat boshqaruvida samarali va taʼsirchan jamoatchilik nazoratini amalga oshirish uchun zarur sharoitlar yaratilganligi taʼkidlandi.

Shu maqsadda korruptsiyaviy xavflarni aniqlash va tizimli tahlil qilish, ularni keltirib chiqaruvchi omillarni bartaraf qilish uchun masʼul boʻlgan alohida organ — Korruptsiyaga qarshi kurashish agentligi tashkil etilganligi hamda davlat hokimiyati organlari va yirik xoʻjalik yurituvchi subʼektlarda korruptsiyaga qarshi ichki nazorat tuzilmalari faoliyati yoʻlga qoʻyilayotganligi korruptsiyani bartaraf qilishning muhim omillaridan ekanligini aytdi.

Yigʻilish ishtirokchilari mazkur qonun hujjatlari yuzasidan fikr-mulohazalarini bildirdilar, oʻzlarini qiziqtirgan savollar bilan murojaat qildilar hamda tegishli javoblar oldilar.

Charos Arslonova, tuman hokimligining Axborot xizmati rahbari.