“Xon” maishiy xizmat koʻrsatish maskani foydalanishga topshirildi

Bugun yurtimizda amalga oshirilayotgan keng koʻlamli bunyodkorlik hamda obodonlashtirish ishlari natijasida shahar-u qishloqlar, viloyatlar va tumanlar markazlari yangi zamonaviy koʻrinish kasb etmoqda. Joylarda koʻp qavatli binolarning qad koʻtarayotgani, maishiy xizmat koʻrsatish obʼektlari, istirohat bogʻlari, dam olish maskanlari kishi koʻzini quvontiradi hamda bu kabi bunyodkorlik ishlari orqali yurtdoshlarimizning turmush sharoitlari yaxshilanib, koʻplab sharoitlar hamda qulayliklar yaratilmoqda.

Amudaryo tumanida 15-iyul kuni ochilish marosimi oʻtkazilgan “Xon” aholiga maishiy xizmat koʻrsatish maskanida ham hamyurtlarimiz uchun qator zamonaviy maishiy xizmat turlari yoʻlga qoʻyilgan. Zamonaviy qiyofaga ega boʻlgan mazkur 3 qavatli bino oldida oʻrnatilgan favvora bino koʻrkiga koʻrk qoʻshmoqda.

Maishiy xizmat koʻrsatish maskaning ochilish marosimida tuman hokimi Sultonboy Yoʻldashev hamda tuman faollari ishtirok etdilar. Tuman hokimi binoning ochilishi bilan barcha yigʻilganlarni, shuningdek, tadbirkorni va ishchi-xodimlarni, tumanimiz aholisini qizgʻin tabrikladi.

Tuman hokimi oʻz soʻzida “Xon” maishiy xizmat koʻrsatish maskani rahbari, tadbirkor Rustam Yusupovning kelgusidagi ishlarida, shu kabi yangi loyihalarni amalga oshirishida yangi zafarlar hamda muvaffaqiyatlar tiladi.

Shuningdek, tuman faollari ham maskanning barpo etilishi barcha amudaryoliklar uchun quvonchli voqea boʻlganligini qayd etdilar hamda tadbirkor va maishiy xizmat koʻrshatish maskani xodimlarining kelgusidagi faoliyatlarida omad tiladilar.

Shundan soʻng yigʻilganlar binodagi shart-sharoitlar hamda qulayliklar bilan qindan tanishdilar.

Aytish kerakki, “Xon” aholiga maishiy xizmat koʻrsatish maskani qurilishi uchun tadbirkorning oʻz mablagʻi hisobidan 1 mlrd. 150 mln soʻm pul mablagʻi sarf etilgan. Qurilish ishlari “Amudaryo qurilish materiallari” masʼuliyati cheklangan jamiyati tomonidan, sifatli hamda zamonaviy qurilish materiallaridan foydalanilgan holda amalga oshirilgan.

Bunyodkorlik ishlariga 100 nafar quruvchi-ishchilar jalb etilgan. Bino 3 qavatdan iborat boʻlib, birinchi qavatida goʻzallik saloni, oziq-ovqat va kiyim-kechak doʻkonlari mavjud.

Ikkinchi qavatida zamonaviy qandil-u bejirim oʻrindiqlar bilan jihozlangan katta restoran, uchinchi qavatida eng soʻnggi urfdagi, sifatli mebellar bilan jihozlangan, mehmonlar uchun barcha qulayliklarga ega boʻlgan mehmonxona hamda katta fitnes zali joylashgan.

Mazkur maishiy xizmat koʻrsatish maskani ishga tushishi bilan 12 nafar yurtdoshlarimiz ish bilan taʼminlangan.

Marosimga yigʻilganlar binodagi barcha zamonaviy shart-sharoit hamda qulayliklar bilan yaqindan tanishdilar. Mazkur bino Mangʻit shahri koʻrkiga koʻrk qoʻshishi bilan birgalikda shahar aholisi va tumanimizga tashrif buyurgan mehmonlarning dam olishi va madaniy hordiq chiqarishi uchun xizmat qiladi. Bino hudud aholisi uchun mamlakatimiz mustaqilligining 30-yilligi oldidan oʻziga xos sovgʻa boʻldi, desak yanglishmaymiz.

Tuman hokimligining Axborot xizmati.