ELEKTR TAʼMINOTIDAGI MUAMMOLAR BARTARAF ETILIB, AHOLIGA QULAYLIK YaRATILMOQDA

Hududiy elektr tarmoqlari korxonalari yetkazib berilgan elektr energiyasini isteʼmolchilarga taqsimlab beradi. Shu kunlarda mamlakatimizda kuzatilayotgan anomal issiq harorat tufayli elektr energiyasidan foydalanish ham keskin ortib, elektr energiyasi taqsimotida muammolar yuzaga kelmoqda.

Aholi xonadonlari, tashkilot va muassasalarda qoʻshimcha sovutish uskunalaridan foydalanish hamda qishloq xoʻjaligi ekin maydonlarini sugʻorish nasoslari toʻla quvvatda ishlayotganligi, elektr energiyaga boʻlgan talab keskin oshib ketishi  hisobiga, elektr energiya ishlab chiqarishda quvvat va elektr energiya tanqisligi yuzaga kelmoqda. Bu esa tizim faoliyatini kunu tun tashkil etish, avariyalar va  nosozliklarni tezkorlik bilan bartaraf etish boʻyicha zarur choralar koʻrishga undamoqda.

Amudaryo tumanidagi Elektr taʼminoti korxonasi tomonidan ham bu borada tegishli ishlar amalga oshirilmoqda. Soha vakillari kuzatilayotgan nosozliklarni qisqa muddatlarda bartaraf etish, elektr tarmoqlarida belgilangan reja asosida modernizatsiya va rekonstruktsiya ishlarini amalga oshirish orqali aholi turmush farovonligini oshirishga oʻz hissalarini qoʻshmoqda.

Mazkur yilda, ayniqsa, “Obod qishloq” dasturiga kiritilgan Xitoy ovuli va Jumurtov shaharchalarida aholiga qulaylik yaratish, elektr taʼminotini yaxshilash maqsadida qator ishlar amalga oshirildi. Bugungi kungacha Xitoy ovuliga 1 dona yangidan transformator punkti oʻrnatildi. Shuningdek, kuchlanishi 0,4 kilovolt 3,2 km. havo elektr uzatish tarmogʻi tortilib, yangidan 70 dona temir-beton ustunlar oʻrnatish ishlari bajarildi. Jumurtov shaharchasi hududida ham kuchlanishi 0,4 kilovoltli havo elektr uzatish tarmogʻi yangilanib, 1 dona transformator punkti oʻrnatildi. Bundan tashqari, ushbu hududlardagi elektr uzatish havo tarmoqlarida, mavjud transformator punktlarida joriy taʼmirlash  ishlari ham davom ettirilmoqda. 

Prezidentimizning 2016-yil 23-noyabrdagi «2017-2021-yillarda past kuchlanishli elektr tarmoqlarini yanada modernizatsiya qilish va yangilash dasturi toʻgʻrisida»gi Qarori ijrosini taʼminlash maqsadida tuman Elektr taʼminoti korxonasi ishchi-xodimlari tomonidan boshqa hududlardagi transformator podstantsiyalari taʼmirlanib,  eskilari yangi, yuqori kuchlanishli transformatorga almashtirilishi natijasida aholi yashash xonadonlari hamda tadbirkorlik subʼektlarining elektr taʼminoti yanada yaxshilanishiga erishildi.

Bundan tashqari,  past kuchlanishli elektr uzatish havo tarmoqlari toʻliq koʻrikdan oʻtkazilib, havo tarmoqlarini daraxt shoxlaridan tozalash, simlarni tortish, nosoz holatga kelib kolgan qurilmalarni yangisiga almashtirish ishlari amalga oshirilmoqda. Shuningdek, tuman hududidagi yer ostidan oʻtgan elektr uzatish kabel tarmoqlarini taʼmirlash ishlari ham jadallik bilan olib borilmoqda.

Shu paytga qadar tuman hududida 16 dona transformator punktlari va elektr tarmoqlari mukammal taʼmirlandi. Undan tashqari, Chordara, Namuna mahallalari, Qipchoq shaharchasida 1 donadan yangi transformator oʻrnatilib, elektr taʼminoti yaxshilandi. Shuningdek, Gulzor mahallasi hududida joylashgan koʻp qavatli uylarga ham qoʻshimcha ravishda yangidan transformator oʻrnatib berildi.

Yil oxirigacha yana 19 ta transformator punktlarida mukammal taʼmirlash ishlari olib borilishi rejalashtirilgan. Shuningdek, Doʻrman, Qilichboy va Oʻrtaqalʼa ovullarida hamda Oybek nomli va Beshtom mahallalarida qoʻshimcha yangidan transformator punktlari oʻrnatilib, tuman aholisining elektr taʼminoti yaxshilanadi.

Elektr taʼminotining mavsumda barqaror ishlashini taʼminlash, aholiga qulay sharoit yaratishga qaratilgan bunday saʼy-harakatlar xalq hayoti, turmush tarzini yaxshilash, farovonligini oshirishda muhim ahamiyat kasb etmoqda.

O. Xudoyberganova.