Oʻzbekiston Liberal demokratik partiyasi tuman kengashining boshlangʻich partiya tashkiloti yigʻilishi boʻlib oʻtdi

Tadbirkorlar va ishbilarmonlar harakati – Oʻzbekiston Liberal Demakratik partiyasi jamiyatda oʻzining siyosiy oʻrni va mavqeyiga ega partiya hisoblanadi. Partiya aʼzolari tomonidan joriy yilda oʻtkaziladigan eng katta siyosiy voqea – Oʻzbekiston Respublikasi Prezidenti sayloviga tayyorgarlik ishlari jadal surʼatlarda tashkil etilmoqda.

Partiyaning Amudaryo tumani kengashi partiya maqasad va vazifalari, dasturi doirasida samarali faoliyat yuritib kelmoqda. Joriy yilning 11-avgust kuni Oʻzbekiston Liberal-demokratik partiyasi tuman kengashi tomonidan tumandagi Turkmaniston muqobil mashina-traktor parki huzuridagi boshlangʻich partiya tashkilotida yigʻilish boʻlib oʻtdi.

Yigʻilishda partiyaning tuman kengashi apparat rahbari Madamin Kazakov, partiya deputati Fozil Qurbonboyev, deputat, Turkmaniston muqobil mashina-traktor parki rahbari Abduqodir Tleumuratovlar hamda partiyaning boshlangʻich tashkiloti aʼzolari ishtirok etdilar.

Yigʻilishda soʻzga chiqqanlar bugungi kunda Oʻzbekiston Liberal-demokratik partiyasi maqsad va vazifalarini amalga oshirishda Amudaryo tuman kengashining samarali faoliyati, partiyaning boshlangʻich tashkiloti tomonidan amalga oshirilayotgan ishlar xususida soʻz yuritdilar.

Taʼkidlanganidek, Tadbirkorlar va ishbilarmonlar harakati – Oʻzbekiston Liberal-demokratik partiyasi tuman kengashi bugungi kunda 3962 nafar aʼzolariga ega. Partiya aʼzolari 65 ta boshlangʻich tashkilotga birlashgan holda faoliyat yuritib kelmoqda. Partiya aʼzolari partiyaning asosiy maqsadlaridan biri siyosiy kuch sifatida birlashgan holda tadbirkorlar, ishbilarmonlar va fermerlarning yanada kengroq faoliyat yuritishlari uchun yangi imkoniyatlar yaratish, ularning istiqbolini ham nazariy, ham amaliy jihatdan asoslab berish, jamiyatning mazkur qatlami manfaatlarini himoyalash va ertangi kunini taʼminlash borasida tizimli ishlarni tashkil etishmoqda.

Shuningdek, partiya mamlakatimizda bozor islohotlarini yanada chuqurlashtirishning eng muhim muammolarini hal qilishda tashabbuskor boʻlish va faol ishtirok etish, mamlakatni modernizatsiya qilish va iqtisodiyotni barqaror rivojlantirish, tadbirkorlik erkinligining amaliy kafolatlarini taʼminlash, haqiqiy mulkdorlar qatlamini shakllantirish yoʻlidagi toʻsiqlarni bartaraf etish, tadbirkorlik subʼektlarini huquqiy himoya qilish tizimini yanada takomillashtirish kabi ustuvor vazifalar ijrosini taʼminlab kelmoqda.

Shu bilan birga partiya maqsad va vazifalari mohiyatini aholi eʼtiboriga samarali tarzda yetkazish, joylardagi ijtimoiy-iqtisodiy muammolarni muntazam oʻrganib borish, ularni partiyaviy vositalar bilan hal etish, shu jumladan mintaqalarni ijtimoiy-iqtisodiy rivojlantirishda foydalanilmayotgan zaxira va ichki imkoniyatlarni izlab topish va aholi turmush farovonligini oshirishga qaratilgan dasturlarni amalga oshirmoqda.

Tadbir davomida partiya safiga yangidan aʼzolar qabul qilindi hamda ularga masʼullar tomonidan aʼzolik guvohnomalari va partiya logotipi tushirilgan sovgʻalar topshirildi.

Tuman hokimligining Axborot xizmati.