Aholining tibbiyotga oid muammolari oʻrganildi

Mamlakatimizda aholi murojaatlari bilan ishlash, ularni yillar davomida qiynab kelayotgan muammolarni oʻrganish hamda hal qilish borasida mutlaqo yangicha tizim yaratildi. Insonlarning muammoli masalalari masʼullarning diqqat markazida boʻlib, ularga har tomonlama amaliy yordam berilmoqda.

Joriy yilning 12-avgust kuni Amudaryo tuman hokimligida aholining tibbiyotga oid murojaatlarini oʻrganish, muammolarga joyida yechim topish va ularni ijobiy hal qilishga qaratilgan sayyor qabul boʻlib oʻtdi.

Sayyor qabulda Oʻzbekiston Respublikasi Sogʻliqni saqlash vazirligi boshqarma boshligʻi Farhod Rahimqulov, Oʻzbekiston Respublikasi Virusologiya instituti direktori Botir Tadjiyev, tuman hokimi Sultonboy Yoʻldashev, tuman Tibbiyot birlashmasi boshligʻi Fahriddin Abdullayev hamda aholi vakillari ishtirok etdilar.

Sayyor qabulda masʼullar mamlakatimizda sogʻliqni saqlash tizimida olib borilayotgan islohotlarni izchil davom ettirish, aholi salomatligini saqlash borasida belgilangan ustuvor vazifalar ijrosini taʼminlash yuzasidan amalga oshirilayotgan keng qamrovli ishlar xususida soʻz yuritdilar.

Qabul mobaynida fuqarolar tomonidan 15 dan ortiq murojaatlar kelib tushdi. Murojaatlarning asosiy qismi nogironlik guruhini belgilash, dori-darmon bilan taʼminlanishda, tayanch-harakat aʼzolari, asab tizimi, buyrak va nafas yoʻllari xastaliklaridan davolanishda amaliy yordam soʻrash mazmunida boʻlib, ularning aksariyati qabul jarayonining oʻzida ijobiy hal qilindi.

Sayyor qabul jarayonida aholining muammoli masalalari toʻgʻridan toʻgʻri yechimga yoʻnaltirildi. Ochiq muloqotlarda xastaligi mavjud fuqarolarning har biri xastaligiga qarab ixtisoslashtirilgan ilmiy-amaliy tibbiyot markazlari hamda respublika tibbiyot muassasalariga shu kunning oʻzida yoʻnaltirilib, zarur tibbiyot amaliyotlari bajarilishi belgilab olindi. Muddat talab qilinadigan muammolar yuzasidan tegishli soha xodimlariga topshiriqlar berildi.

Aytish kerakki, bugungi kunda joylarda aholi bilan bevosita muloqot qilish, mavjud muammolarni joyida hal etish davlatimiz siyosatining ustuvor yoʻnalishiga aylangan. Shu maʼnoda, Sogʻliqni saqlash vazirligi tomonidan muntazam tashkil etilayotgan sayyor qabullar tibbiyot xodimlari zimmasiga ham katta masʼuliyat yuklaydi.

Shundan kelib chiqib, xalq bilan yanada samarali muloqotni yoʻlga qoʻyish, ularning hayotiy ehtiyoj va talablarini yaqindan bilish, xususan, yurtimizda koʻrsatilayotgan kafolatlangan hamda boshqa tibbiy xizmat turlari boʻyicha hal etilmagan muammo yoki takliflarni atroflicha oʻrganib, ularga oʻz vaqtida yechim topish muhim ahamiyat kasb etadi.

Aholi salomatligini tiklash, insonlarni salomatligi borasidagi muammolarini hal qilishga har tomonlama koʻmak berish maqsadida tumanimizda tashkil etilgan sayyor qabulda ishtirok etgan fuqarolar sogʻlik atalmish ulkan boylikni asrab-avaylashda oʻz yordamini ayamayotgan shifokorlarga oʻz minnatdorligini bildirishdi.

Tuman hokimligining Axborot xizmati.