Amudaryo tumani hokimi S.Yoʻldashevning Oʻzbekiston Respublikasi Davlat mustaqilligining 30-yilligi munosabati bilan yurtdoshlarimizga bayram tabrigi

Assalomu alaykum, aziz yurtdoshlar!

Bugun biz xalqimiz hayotidagi unutilmas tarixiy voqea – Vatanimiz mustaqilligining oʻttiz yillik bayramini katta shod-u xurramlik bilan nishonlamoqdamiz.

Avvalo, Siz azizlarni, Sizlar orqali butun tumanimiz ahlini eng ulugʻ, eng aziz bayramimiz – Oʻzbekiston Respublikasi davlat mustaqilligining 30-yillik bayrami bilan chin qalbimdan samimiy muborakbod etaman!

Butun xalqimizga istiqlolning buyuk neʼmatlarini hadya etgan, bizning insoniy qadr-qimmatimizni, gʻurur va shaʼnimizni, din-u diyonatimizni qaytarib bergan Mustaqillik bayrami ajdodlarimiz necha asrlar davomida orzu qilgan buyuk neʼmatdir.

Xalqimizning metin irodasi, misliz kuch-qidrati orqali barcha sohalarda qoʻlga kiritayotgan yutuqlarimiz Yangi Oʻzbekistonda yangi bir uygʻonish davri – Uchinchi Renessans davriga poydevor yaratilayotganligidan dalolatdir. 

Vatanimizning istiqlol yillarida bosib oʻtgan shonli yoʻliga nazar tashlar ekanmiz, ertangi kunimizga, oʻz kuch va imkoniyatlarimizga boʻlgan ishonchimiz tobora ortadi.

Aziz yurtdoshlar!

Har yili xalqimizning eng ulugʻ, eng aziz bayrami yaqinlashishi bilan, oʻtgan davr mobaynida amalga oshirgan ishlarimizni sarhisob qilib, oʻzimizga yangi-yangi marralarni belgilab olishga odatlanganmiz.

Qayd etish kerakki, soʻnggi yillarda mamlakatimiz taraqqiyoti yoʻlida amalga oshirilayotgan islohotlar natijasida, barcha sohalarda sezilarli oʻzgarishlar kuzatilib, yangi yutuqlar qoʻlga kiritildi. Islohotlar samaradorligini oshirish borasidagi tizimli ishlar orqali mamlakatimizning eng chekka hududlari ham tobora rivojlanib, aholi turmush tarzi yaxshilanmoqda.

Tumanimizda ham islohotlar natijasida salmoqli ishlar amalga oshirilib, yangi rivojlanish bosqichiga qadam qoʻyilmoqda. Xususan, tumanda faol investitsiya siyosati yuritilib, yangi, zamonaviy korxonalar barpo etilmoqda, tadbirkorlik va xususiy mulkni rivojlantirish, barcha soha va tarmoqlarda yangicha yondashuvlarni joriy etishga alohida eʼtibor qaratilmoqda. Shuningdek, qishloq xoʻjaligi sohasini jadal rivojlantirishda  zamonaviy texnologiyalardan foydalanish, sohada samarali usullarni qoʻllash boʻyicha amaliy ishlar olib borilmoqda.

Aytish kerakki, muhtaram Prezidentimizning “2020–2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirish chora-tadbirlari toʻgʻrisida”gi qaroriga asosan tumanimizda 2020-2023-yillarda 406,6 mlrd. soʻmlik 76 ta investitsiya loyihalarini amalga oshirilishi orqali 2 571 ta yangi ish oʻrinlari yaratilishi rejalashtirilib, bu borada amaliy ishlar qilinmoqda.

Tumanimizda kichik biznes hamda tadbirkorlikni rivojlantirish masalalariga qaratilayotgan eʼtibor natijasida qiymati 87,4 mlrd soʻmlik 57 ta loyihalar amalga oshirilib, 1 995 ta yangi ish oʻrinlari yaratildi.

Taʼkidlash kerakki, soʻnggi yillarda amalga oshirilayotgangan “Obod qishloq” dasturi doirasidagi bunyodkorlik  ishlari  mamlakatimizning eng chekka hududlariga ham yangilanish nafasini, yaratuvchanlik ruhini olib kirmoqda. Insonlarning fikri, dunyoqarashi oʻzgarmoqda, qishloqlarimizda turmush madaniyati oshib bormoqda.

Tumanimizda “Obod qishloq” dasturi doirasida joriy yilda Xitoy ovuli hamda Jumurtov shaharchasida ovullarida jami 37 mlrd. soʻmdan ortiq ishlarni bajarish rejalashtirilgan boʻlib, ayni kunda qurilish va bunyodkorlik, obodonlashtirish ishlari qizgʻin davom ettirilmoqda.

Shuningdek, bugungi kunda tumanimizda aholining turmush farovonligini yanada yaxshilash maqsadida yangi ish oʻrinlarini tashkil qilish, namunaviy loyihalar asosida arzon uy-joylar qurish, muhandislik-kommunikatsiya va ijtimoiy infratuzilma bilan taʼminlash borasida ham keng koʻlamli ishlar bajarilmoqda.

Kam taʼminlangan, nogironligi boʻlgan insonlarga alohida gʻamxoʻrlik koʻrsatish, fuqarolarni ijtimoiy muhofaza qilish, jamiyatning himoyaga muhtoj qatlamlarini qoʻllab-quvvatlash masalalariga ham alohida eʼtibor qaratilmoqda.

Bu kabi izchil islohotlar, yuksalishlarning tom maʼnoda yangi bosqichga koʻtarilishi xalqimizning bugungi kunidan rozi boʻlib yashashiga, ertanggi kuniga va kelajagiga ishonch bilan qarab, Vatan taqdiriga dahldorlik tuygʻularining mustahkamlanishiga xizmat qilmoqda.

Ishonamanki, yurtdoshlarimiz ham oʻz bilimi va mehnati bilan mamlakatimiz taraqqiyotiga munosib hissa qoʻshib, yaqinlashib kelayotgan muhim ijtimoiy-siyosiy jarayon - Oʻzbekiston Respublikasi Prezidenti saylovida faol ishtirok etadilar.

Qadrli yurtdoshlar!

Bugun yurtimizning har bir goʻshasida katta shodiyona – mamlakatimiz mustaqilligining 30-yilligi keng nishonlanmoqda. Joylarda “Yangi Oʻzbekistonda erkin va farovon yashaylik!” shiori ostida bayram tadbirlari koʻtarinki ruhda davom etmoqda. Shu fursatdan foydalanib, Sizlarni va Siz orqali butun tumanimiz ahlini yana bir bor eng ulugʻ, eng aziz ayyom – mustaqilligimizning 30-yillik bayrami bilan chin qalbimdan tabriklayman!

Yurtimiz tinch, osmonimiz musaffo, turmushimiz farovon, mustaqilligimiz abadiy boʻlsin.

Eʼtiboringiz uchun rahmat!