Amudaryo tumanida Ichki ishlar organlari xodimlari kuni munosabati bilan bayram tadbiri tashkil qilindi
Ona vatanimiz – Oʻzbekiston tinchlik va osoyishtalik mamlakatidir. Tinch yurtda esa rivojlanish va taraqqiyot boʻladi. Shuning uchun ham yurtimiz tinchligini koʻz qorachigʻidek asrash, uni himoya qilish yosh-u keksaning muqaddas burchiga aylangan. Xalqimizning osoyishtaligini asrashda ichki ishlar idoralari xodimlarining xizmatlari alohida. Mamlakatimizda 25-oktyabr sanasi ichki ishlar organlari xodimlari kuni sifatida nishonlanishi soha xodimlarining xizmatlari yuksak qadrlanayotganidan dalolatdir. Har yili ushbu sana munosabati bilan soha xodimlari ishtirokida bayram tadbirlari tashkil etilib, tinchligimiz posbonlarining kasb bayramlari munosib nishonlanadi.
Qolaversa, bu yil mustaqil Oʻzbekiston Respublikasining Ichki ishlar vazirligi tashkil topganiga 30-yil toʻldi. Shu sababli bu gal soha xodimlarining kasb bayrami har doimgidan ham koʻtarinki ruhda, keng tarzda nishonlanmoqda.
Tinchlik va osoyishtalikni saqlashda kun-u tun fidoyilik namunalarini koʻrsatayotgan, jamoat tartibini saqlash, jinoyatchilikning oldini olishdek sharafli va masʼuliyatli burchiga sadoqat bilan xizmat qilayotgan ichki ishlar organlari xodimlari uchun 6-noyabr kuni Mangʻit shahridagi Madaniyat markazida katta bayram tadbiri tashkil etildi.
Bayram tadbirida tuman hokimi Sultonboy Yoʻldashev, deputatlar, davlat va jamoat tashkilotlari masʼullari, Ichki ishlar boʻlimida turli yoʻnalishlarda xizmat qilayotgan xodimlar, sohada uzoq yillar fidokorona mehnat qilgan faxriylar ishtirok etdilar.
Tadbirda tuman hokimi Sultonboy Yoʻldashev soʻzga chiqib, barcha ichki ishlar idoralari xodimlarini kasb bayramlari bilan samimiy tabrikladi. Tuman hokimi tabrik nutqida el-yurt tinchligini asrash, jamiyatda qonun ustuvorligini taʼminlash, jinoyatchilikka qarshi kurashish, bir soʻz bilan aytganda, muqaddas zaminimizdagi tinch va osuda hayotni taʼminlashdek masʼuliyatli vazifalarini sharaf bilan ado etayotgan tinchlik posbonlariga ulkan zafarlar yor boʻlishini, mustahkam sogʻliq, uzoq umr, baxt-saodat, xonadonlariga qut-baraka, sermashaqqat faoliyatlarida ulkan muvaffaqiyatlar tiladi.
Shuningdek, bayram tadbirida ichki ishlar sohasida uzoq yillar mobaynida fidokorona mehnat qilib kelayotgan faxriylardan Qoraqalpogʻiston Respublikasi IIV faxriylar kengashi kotibi, isteʼfodagi podpolkovnik Abdulla Yoʻldashev, Oʻzbekiston Respublikasi Prezidentining Amudaryo tumanidagi Xalq qabulxonasi mudiri, isteʼfodagi podpolkovnik Erkin Rajabovlar soʻzga chiqib, barcha hamkasblarni bayram bilan tabrikladilar.
Mehnat faxriylari taʼkidlaganlaridek, bugun ichki ishlar idoralari xodimlariga berilayotgan eʼtibor, shu barobarida soha xodimlarining masʼuliyati har doimgidan yuz karra oshgan. Ularning xizmatlari tufayli yurtimiz tinch, koʻngillarimiz xotirjam, farzandlarimiz baxtiyor. Ichki ishlar idoralari safida burchiga sodiq, Vatan uchun jonini ham berishga tayyor haqiqiy yurt himoyachilari, fidoiy xodimlar soni tobora ortib bormoqda.
Shundan keyin sohada samarali faoliyat olib borayotgan, hamkasblariga namuna boʻlayotgan bir guruh ichki ishlar organlari xodimlari tuman hokimligining tashakkurnomasi hamda qimmatbaho sovgʻalari bilan taqdirlandi.
Bayram tadbiri Qoraqalpogʻiston Respublikasi Ichki ishlar vazirligining ashula va raqs ansambli, tuman Madaniyat boʻlimining estrada xonandalari va sozandalari ijrosidagi ajoyib kuy-qoʻshiqlarga ulanib ketdi. Vatan, doʻstlik, tinchlik, sevgi-muhabbat, shukronalik mazmunidagi bir-biridan shoʻx-shodon taronalar bayramga koʻtariniki ruh bagʻishlab, barcha yigʻilganlarga yuqori kayfiyat ulashdi.
Shundan soʻng tuman ichki ishlar boʻlimi xodimlari uchun “Nur” toʻyxonasida katta bayram dasturxoni yozildi. Soha xodimlari bayram dasturxoni atrofida dildan suhbat qurib, maroqli hordiq chiqardilar.
Fursatdan foydalanib, kunlarni tunlarga, tunlarni tonglarga ulab, Vatanimiz tanchligi, osoyishtaligini taʼminlash yoʻlida xizmat qilayotgan barcha ichki ishlar organlari xodimlarini kasb bayramlari bilan tabriklaymiz! Siz bor ekansiz, yurtimiz tinch va hayotimiz farovon boʻladi, aziz posbonlar!
Tuman hokimligining Axborot xizmati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
