Xalq deputatlari Amudaryo tuman Kengashining 42-sessiyasi toʻgʻrisida AXBOROT

2021-yil 15-dekabr kuni Xalq deputatlari Amudaryo tuman Kengashining navbatdagi – 42-sessiyasi boʻlib oʻtdi.

Sessiya majlisida tuman Kengashi deputatlari, hokim oʻrinbosarlari, hokimlik masʼul xodimlari, boʻlimlar, fuqarolarning oʻzini oʻzi boshqarish organlari raislari hamda ommaviy axborot vositalari vakillari ishtirok etdi.

Sessiya kotibligiga 8-Boʻston saylov okrugidan deputat Maxsud Sadullayev saylandi.

Sessiya kun tartibiga “Oʻzbekiston Respublikasi Prezidentining 2021-yil 23-noyabrdagi 20-sonli qarori ijrosi toʻgʻrisida”gi hamda “Amudaryo tumani xalq taʼlimi boʻlimiga qarashli maktablarda boʻsh (vakant) direktor lavozimiga oʻtkazilgan tanlov yakunlari boʻyicha nomzodga kelishim berish toʻgʻrisida”gi masalalar kiritildi.

Sessiya kun tartibidagi birinchi masala boʻyicha tuman fermer, dehqon xoʻjaliklari va tomorqa yer egalari Kengashi raisi Ilxom Palvanov hisobot berdi.

Hisobotda taʼkidlanganidek, Oʻzbekiston Respublikasi Prezidentining 2021-yil 23-noyabrdagi 20-sonli qaroriga asosan fermer xoʻjaliklari va klasterlar foydalanishidagi past hosilli paxta va gʻalla ekinlaridan qisqartirilgan yerlar hisobidan jami 2242 gektar yer maydoni fuqarolarga 10 sotixdan 1 gektargacha boʻlgan oʻlchamda ochiq elektron tanlov orqali ijara huquqi asosida berilishi belgilangan. 2022-yilda 897 gektar yer maydonini shunday tartibda ajratish koʻzda tutilgan.

Hisobotda qishloq xoʻjaligida ishlab chiqaruvchilarini yanada qoʻllab-quvvatlash, fermer, dehqon xoʻjaliklari va tomorqa ekin maydonlaridan foydalanish samaradorligini taʼminlash, pirovard natijada yer egalarining daromadlarini koʻpaytirish boʻyicha amalga oshirilayotgan ishlar xususida keng turda maʼlumotlar berildi.

Sessiyada Qoraqalpogʻiston Respublikasi xalq taʼlimi vazirligi tomonidan tumandagi 3-, 7-, 11-sonli maktablar direktorligi lavozimiga oʻtkazilgan tanlov yakunlari boʻyicha tavsiya qilingan nomzodlarga kelishim berish masalasi ham koʻrib chiqildi.

Deputatlar 3-sonli maktabi direktori lavozimiga nomzod Jetkerbay Ibragimov, 7-sonli maktabi direktori lavozimiga nomzod Atabek Xidirbayev va 11-sonli maktabi direktori lavozimiga nomzod Ulugʻbek Mamutovlarning kelgusi 3-yilda amalga oshiradigan ishlari boʻyicha dasturlari bilan tanishdilar.

Soʻngra deputatlar orasidan sanoq komissiyasi aʼzolari saylanib, ochiq ovoz berish natijalariga koʻra 3-sonli umumiy oʻrta taʼlim maktabi direktori lavozimiga Jetkerbay Ibragimovni, 7-sonli umumiy oʻrta taʼlim maktabi direktori lavozimiga Atabek Xidirboyevni, 11-sonli umumiy oʻrta taʼlim maktabi direktori lavozimiga Ulugʻbek Mamutovni tayinlash toʻgʻrisidagi tavsiyalarga kelishim berish haqida xalq deputatlari tuman Kengashining qarori qabul qilindi.

Sessiya kun tartibiga kiritilgan masalalar atroflicha koʻrib chiqildi va tegishli qarorlar qabul qilinib, shuning bilan sessiya oʻz ishini yakunladi.

Tuman hokimligining axborot xizmati.