Sportchilarimiz yutuqlari

1-sonli BOʻSM trener-pedagoglar jamoasi va yosh sportchilari uchun 2014 "Sogʻlom – bola yili” sportda juda ulkan yutuqlarga boy yil boʻlmoqda. Maktab yosh sportchilari, murabbiylari keyingi 5-6-yil davomida  Oʻzbekiston Respublikasi, Qoraqalpogʻiston Respublikasi va tumanimizda oʻtkazilgan sportning stol tennisi, tennis, boks, futbol, voleybol, yengil atletika, basketbol turlari boʻyicha doimo faxrli oʻrinlarni qoʻlga kiritib kelmoqdalar.

Yaqinda 10-12-avgust kunlari Navoiy viloyatining – Navoiy shahrida Oʻzbekiston Respublikasi BOʻSMda shugʻullanuvchi sportchilari oʻrtasida yengil atletika boʻyicha mamlakat birinchiligi oʻtkazildi. Bu musobaqada bizning BOʻSMda shugʻullanuvchi yosh sportchilar Qoraqalpogʻiston Respublikasi sharafini himoya qildilar. – Terma jamoamiz asosan 28-  va 36-maktab sportchilaridan iborat boʻldi. Boʻlib oʻtgan sport musobaqasiga BOʻSM murabbiyi Allambergan Aytboyev  yosh yengil atletikachi sportchilarni tayyorlab yaxshi natija koʻrsatdilar. Jumladan, 100 m.ga yugurishda Sojida Bekmanova 3-oʻrinni, 800 metrga yugurishda Ikrom Hayitboyev 2-oʻrinlarni  egalladi. Yengil atletikachi sportchilarni tayyorlashda 28-maktab jismoniy tarbiya fani oʻqituvchisi Maqsud Allaniyozovning ham hissasi katta. BOʻSM yosh stol tennischilarining bu yilgi qoʻlga kiritgan yutuqlari juda katta. Murabbiy Hamida Rajabovaning shogirdi Muhriddin Rajabov Qoraqalpogʻiston chempioni, Toshkent shahrida boʻlib oʻtgan "Sogʻlom avlod” kubogi musobaqasi gʻolibi boʻldi. Qoraqalpogʻiston sport maktablari shugʻullanuvchilari oʻrtasida Dilshodbek Rajabov ham Qoraqalpogʻiston chempioni sharafiga erishdi. Boks sporti boʻyicha sport ustaligiga nomzod  Bobur Ismoilov yaqinda Buxoro shahrida boʻlib oʻtgan Oʻzbekiston kubogi musobaqasida qatnashib qaytdi. Hozirgi paytda sportchilarimiz orasida Oʻzbekiston Respublikasi mustaqilligining 23 yilligiga bagʻishlab, sportning 8 turi boʻyicha BOʻSM birinchiligi oʻtkazilmoqda.

Yosh sportchilarimiz kelgusi yil Xorazm viloyatida boʻlib oʻtadigan "Umid nihollari" sport musobaqalarining final bosqichida muvaffaqiyatli ishtirok etish niyatida qunt bilan mashq qilmoqdalar.

B.Rajabov,

1-BOʻSM direktori oʻrinbosari.